近來真係好煩，因為雋婆同姐姐住緊間屋已經賣咗，而且7月16號要交吉畀新業主，煩在宜家樓價貴連帶租金又貴，更幣就係全個昇仔好少租盤，一係又係d業主貪心開價開到好狼死，加上現時27樓雋婆間屋個業主係新手、第一次買樓、又係第一次租樓畀人，試過d律師樓手續又唔記得去攪 租又唔追 .... (haha 好得佢遇到我哋係好租客咋，唔係走佢數都真係唔知 .... )，更離奇係同我哋個租約未完就去攪晒d賣樓手續，好嘞 .... 攪到我哋宜家未揾到樓畀雋婆、而新業主係會自住，交吉期毫無走棧餘地 .... 在煩多一成係，我哋相熟agent Abby已經幫我哋揾到個6座盤 (其實想宜家o係返2座一齊樓上樓下就最方便，不過唔得同屋苑都算啦，已經好好!!)，租又減到落$10,500，全屋苑最平 (當然唔及宜家9,500平啦 ...sighs ....)。無奈 .... 呢個6座現有租客買咗星河明居但係舊業主遲咗交吉，係要delay到8月中先搬走，即係我哋兩邊都衰晒冇得走棧 .....
咁可以點呢??? 前兩日去睇咗幾個盤，一個o係隔離3座，原本係獨身女子，dirty & dusty .... 又搬走埋個隨樓附送嘅雪櫃 + 洗衣機，兩間房嘅setting亦只適合d單身人士，仲要係入牆傢俬，樓本唔可能租 ....唯一係肯減租到$11,000 ..... 原價$13,000，咁嘅樣 .... 祝佢好運租得出啦 ....
另一間，8座，大少少，但廳同雋婆房望到小小墳景，其實雋bama就唔覺得有乜嘢，不過雋婆畢竟係老人家又少少迷信，真係唔知佢點諗，未帶佢去睇，間屋就好乾淨企理，又係肯減租到$11,000 .... 宜家只係拖字訣，希望呢幾日快在睇多幾間、又望呢間未出租，咁都叫做仲有個不太壞嘅後備屋可以租嗎 ....
o係度多謝姐夫Tommy，o係佢幫我哋揾熟人介紹先可以咁快揾到d盤，其實有好多間ga，不過其他3-4間d租去到$13,800 .... 傻ga!!!! 根本負擔唔到囉 .... 為雋婆租都算，另一間房畀姐姐住，根本好似半個主人咁，幾時都話做我哋二人嘆啦，有自己咁大間房、唔駛湊小朋友、只做家務、仲要有雋婆幫返佢轉頭 .... sighs .....
之前雋婆o係屯門間屋畀d細路貪玩中火呀，d警察打嚟時嚇死我哋，度門燒燶晒，警察話o係o個條村好常見，你知啦，雋婆中過風，雖則宜家行得走得，不過自己一個o係入面住真係好驚，有事都唔知走唔走得切 .... 加上住呢度方便大家有個照應同佢返醫院覆診，所以我哋都係傾向捱貴租畀佢一齊住近d囉 ....
其實最後都有另一個方案，就係一齊住，雋ma呢間屋就打死都唔賣嘞，係自己樓價最低位時買，仲係新地樓，宜家及將來都唔會買得返，所以只有放租、然後出去買 / 租一間大嘅，4個人 + 個小朋友，雋婆舊屋傢俬 + 雋氏現有大量傢俬雜物，即係起碼要租1000呎或以上啦，理想係隔離宇晴，不過d樓價同租都升到"ba ba"聲，炒家多呀 .... sighs .....
前日又有去睇mei foo，Abby有個望荔枝角公園、1,200幾呎 (=宜家新樓成15-1600呎ga ...)，開積靚又間隔好用，又有工人房同士多房，好perfect，唯獨兩個toilets少少舊 (好怪，全屋都係全新裝修，但就唔整toilets ....)，雋bama經歷過上次mei foo租"黑"樓呢一役之後，真係好驚 ..... 好驚化妝樓 (雖然呢間唔係，因為業主係住開一期凸海嘅超有錢富婆，一路放租開，所以唔係化妝樓同埋唔會攞間樓去賣，避咗成日要搬嘅風險 ....)，跟住又好驚住唔慣舊樓 (雖然又翻新晒，而且呢兩座自己畀$$換晒新lift 同埋要拍卡先可以仕大廈同搭lift .... )，畢竟我咊住開昇仔呢邊又新又好方便，今年尾又通埋去地鐵站，所以 .... 都唔知點咁 ....
好忐忑不安 ....
不過過去揾工、租樓、買樓 .... etc經驗提醒我自己，就係忐忑就唔好做，唔係就衰緊兼後悔，所以呢 .... mei foo ..... o係短期內，都係忘記咗佢先啦 ....
希望天父開路，呢幾日畀d好價又可以o係昇仔嘅樓我哋睇，快快脆 ... 租咗佢，然後又要開始執嘢預備搬堅嘞 .....
