未夠一歲時買畀雋雋嘅簡單拼圖，間中畀佢玩，不過興趣唔大，慢慢對顏色有興趣，不過都係唔玩。幫佢砌好，轉頭就幫你反轉倒晒出嚟 .... 後來開始鐘意車，反應多少少，不過都唔會點砌，加上未係好識擺位，所以好快又唔玩 ... 最愛都係倒晒出嚟 ... haha
今日，媽媽好開心，因為係雋雋第一次自己砌好晒成幅拼圖，顏色同圖案都係雋雋自己配對好同擺好位，所以覺得佢進步咗好多，起碼知道佢原來係有興趣玩、同埋記得媽媽教過佢嘅嘢 ...
冇刻意買d好大舊嘅積木畀雋雋玩，第時無論考學校定係真係自己玩，都係玩d正常size嘅，咁不如一早畀佢玩呢d啦 .... 相對一個十六個月大嘅小朋友嘅手，呢d正常size積木又係好似細咗一d，所以雋雋好多時都砌唔正個位，媽媽有幫佢，但有時都忟忟哋又好快唔玩 .... 不過近來佢d手眼協調好咗好多，起碼d佢會砌得正個位、將d積木踏起，同埋見到佢有d興趣同意欲玩其他嘢，又有興趣油吓顏色、彈吓琴打吓鼓，唔係一味只愛玩車，爸爸媽媽戾放心一d ....
成日好嘈好多嘢講 .... 幫完佢都識say thank you (手勢 + 講聲"thx"/"橋" + 飛吻動作同步進行 .... hee ...) .... 識God / Jesus / Bible / Amen，宜家食飯前都知道要祈禱小手 ... 識玩 pull-back o個類形車仔 .... 識洗手 ... 識用相機亂咁影相 ... 識成日O係媽媽手袋偷嘢玩 ... KAKA ... 仲有好多古靈精怪嘢 ...
成日好痴身 .... 去個廁所、或者沖涼、或者入廚房煮飯，佢都有九成機會係喊 .... 喊住口叫"媽媽"、"媽媽"、"媽媽" .... 不過成日錫媽媽，又好開心囉 .... ^^
成日食垃圾，隨地執到嘢都放入口，不過今個星期進步好多，雋雋會執起自己放落去垃圾桶、或者攞畀媽媽，唔再放入口，放心好多，突然間覺得佢好生性 .... ^^
記性好，小朋友專利，講一次、兩次就記得，有時都估佢唔到 ... 所以千祈唔好亂咁同佢哋講嘢 .... :p
開始識跑來跑去、而口唔再只係行來行去，成日突然"pa" o係度，嚇死媽媽 ... 果然係一隻小牛，趕牛咁趕、捉牛咁捉，疲於奔命 ....
食嘢，其實都自己"筆"到食物嘞，不過好多時費事佢食得慢、特別係出街時候，所以都係媽媽餵多，間歇性佢自己講"筆""筆""筆" .... 咁就畀雋雋自己"筆"自己食啦 ....
飲，一向就唔擔心，從小訓練佢飲好多水、好多湯，見雋雋去到邊都成日有一支湯入鏡就知啦，不過都要多謝雋婆，因為雋婆d湯好好飲，所以雋雋就真係好有口福 .....
見佢少少肥肥白白就知啦，又高大又健康，都應該唔會太差 .... 餐餐有菜又有肉又有生果，又似媽媽食得好清淡，連麥皮都鐘意食，所以都唔太擔心，希望佢呢個習慣會一直延續到長大後都係咁 ....
好快要返學嘞，雖然係遊戲班形式、又會有媽媽陪上堂，不過係比較接近正常返學模式，希望雋雋會開心又學習到更多，畢竟o係屋企可以教佢嘅 .... 可能係有限，同埋可能冇乜系統 .... 所以媽媽同雋雋都要一齊學習嘞 ....
期待雋雋更多嘅進步 ....您進步好似媽媽都有少少進步 ....
每次見到都好開心、好感動 ....
多謝雋雋您呢個小BB帶畀媽媽咁多快樂嘅小時小刻 ....
