雋雋滿月嘞 ...

今日係雋雋滿月嘅日子 ... 話咁快就生咗雋雋一個月嘞?? 好似好唔真實但係又好似覺得d時間唔止一個月咁 ....可能成日BF，攪到d時間顛倒晒，個人生活都好似未重新納入正軌咁，除咗去見Dr MO同孟博士，我都冇正式出過街，坐月嘅日子都真係幾悶呢 .... 不過可以成日對住BB同埋要佢乜嘢事都依附我嘅日子都唔會好多同好長，所以我同老公都好珍惜，就算好攰同瞓得麻麻，我哋都會覺得係值得同開心 ...

雋雋，baba mama希望你健康、快樂、幸福，一生與神同行，願天父時刻祝福你及保守你ah!!!

今 日冇乜特別慶祝，因為 BB車要多幾日先送到，冇車仔出去唔係好方便，baba其實諗過揸車出去帶我去Baby Outlet度換過條大d嘅Slingling、同埋同雋雋去影相，不過又好似好攰，所以暫時都未知出唔出去好，但baba就買咗蛋糕返嚟食lor .... heehee ... 雋雋，好抱歉你未食得ga，baba mama真係衰，唔預你一份

小雋雋 slide show - 15-25.02.2009

好煩 ...

今早baba返工前幫雋雋換片片 .... sighs 又噴屎嘞，點解次次都係baba中招??? 係咪有d乜嘢程序出錯咗呢??? 雋雋，你乖乖啦 .... 換片片唔好喊到拆天咁、同埋唔好成日噴屎同jump茶畀baba啦，佢好愛你ga ....

前日我教姐姐換片手腳比較慢，我都好驚佢換會點算呢?? 真係放心唔落，你話我哋第日要出去得返佢同媽咪會點呢??餵奶媽咪都ok，但換片都係姐姐做好d lor，費事佢隻手輪盡ma .... 之前又教姐姐幫佢沖涼，又係麻麻哋，佢都係適宜做返家務好d，根本如非必要我哋都係想自己同BB沖返，睇見佢d進度咁慢又"nup lor"，更加確定我呢個諗法係冇錯 .... 其實由一開始都唔expect姐姐參與好多湊BB工作，但係又會諗第日我哋真係要兩個人出晒去又點呢?? 好似前兩次老公同我出去睇醫生已經令我哋兩個心掛掛又驚餐懵嘞，希望姐姐真係會快d有進步啦 ....

皮膚好敏感，好辛苦，眼皮都腫埋，呢兩日已經好少少 .... 星期五去睇中醫，都知BF唔好食中藥，不過見吓孟博士都好，我諗生完d體質真係改變咗，我重係成日覺得好熱，一熱d敏感皮膚位置又會紅多d，沖完涼又係差 d，所以都真係要會一會佢睇吓d飲食上面有冇嘢要戒口、同埋真係要好好調理返至得嘞 .... 不過真係好唔開心，乜心情都冇晒 ....

都唔止，今日部printer又壞，同上次一樣咁壞法，呢個HP真係好煩，最煩係攪到我冇得影印同埋老公d emails唔可以print 出嚟，超唔方便，又要攞去star house維修，我宜家點去jeh??

噴屎記 ...

前兩個星期，雋雋小王子送大禮囬baba mama ... 就係換片片時突然噴屎，d稀爛嘅屎屎+水就由上至下流向下方，攪到牆壁屎漬斑斑，好恐怖，用藍威寶 + 酒精狂抹一輪都係黃金遍遍

琴日，又再一次噴屎，冇錯，又係直標向牆身，好得今次有床墊吸咗大部份，冇再向下流，但同時佢又再vv + poo poo，攪到成張尿墊都係，好惡攪 ，雋雋就係好似身處一大堆蛋花之中 .... 好嘞，都係唔好再形容咁多，我都覺得好嘔心 ....

雋雋，你可唔可以唔好成日再"jump"茶畀baba同噴屎屎ah??

琴日度雋雋頭圗已經由35cm去到39cm，同我哋一樣個頭好大 .... 身長就由51cm去到大約58cm嘞，繼續努力，快高長大ah!!

不過佢大得咁快，換嚟就係我兩隻手腕都好痛又唔係好夠力抱佢，我一向都係竹籤手，最肥嘅時候兩隻前臂都係好幼、就嚟斷咁樣。好記得以前中學想打排球，但係 琴老師成日叫我唔好打咁多、免得就免，因為好傷手腕、會影響彈琴。阿仔，如果我再咁抱你落去，你又愈來愈大隻又重、我手腕又愈來愈痛，我 ... 仲可以彈到琴嗎?? 用到力嗎?? 又再抱得起你嗎?? 近日只係不停貼Phiten Tapes，好d，但都係痛，希望唔會令手腕傷咗啦 .... .... 自此之後mama貼咗一大塊床墊o係牆壁度，以防下次又再發生同類事件 ....

轉奶粉轉到七彩篇 ...

o係醫院三日，雋雋都係食人奶 + Enfamil A+，因為未上奶，第一日我都係補葡萄糖水畀佢，第二三日先補A+ 奶水，ok 冇問題、亦冇敏感 ...

出院後上奶嘞，其實頭幾日都係全人奶咁滯，之後都主力係餵人奶，係夜晚有時老公餵 (我太攰要瞓ah ....) 就餵泵出嚟嘅奶 + 奶粉 ... 宜家凌晨太攰雋雋又喊得勁都要餵奶粉 .... 總括嚟講每日只係2-3餐餵奶粉

入院前已買定一罐森永縮安酸 (低敏天才奶粉)，因為老公family history好多敏感嘢 ... 我又有鼻敏感，好高危，所以先會選擇呢隻奶粉，仲係好貴添；但結果係雋雋唔係好鐘意食 ... 唯一扭肚餓扭到無可再扭先肯好快飲晒 ....

baba mama 決定試普通森永，因為有人話過森永縮安酸係冇咁好味。結果係 .... 雋雋小王子口味要求都好高，一食又係嗱埋晒口面，好勉強先捱咗幾次 ... 再一次報銷全罐奶粉 ... 真肉赤!!

畀佢飲返A+，冇事wor，可能佢一出世後就接觸人奶同A+，所以食到，但係就好多痰，成晚聽到佢he he ... her her .... 好辛苦咁，所以都有d擔心....

最後baba又去買咗明治，因為d人話香濃d，所以即管試吓 ... 不過今次冇咁蠢，我哋只係買一盒旅行裝畀佢試，只需$45 jeh，化算好多 ...

今次終於成功嘞，我哋終於通過雋雋小王子嘅嚴密測試，唔再係面燶燶咁飲奶，baba mama終可放下心頭大石 .... 但講到底，雋雋都係最愛飲人奶，就算泵出嚟老公餵佢都飲得超快lor ....

呢 件事係一個提醒 + 教訓，好多時為人父母都想將最好嘅供應畀仔女，自己覺得好就好想佢都鐘意、又希望佢哋跟自己o個套，特別當佢哋重係好細個唔識 / 冇能力去作出選擇嘅時候。雋雋呢次轉奶粉事件係一個好例子，我哋揀幾貴幾好都冇用，最終食嘅係佢，佢唔鐘意就唔鐘意、咁樣浪費咗d嘢我哋都冇辦法、亦都唔 想，唯有o係將來選擇其他嘢時都要小心，同埋考慮阿仔真正需要多d，唔好樣樣都係父母覺得好就認為仔女都會覺得好 ...

小雋雋初生 slide show

小雋雋從天父處來到我們的家!!!

姓名：旨雋
英文名：Aaden
出生日期：29/01/2009 (星期四 / 年初四)
出生時間：凌晨...
地點：浸會醫院 (2號產房)
體重：3kg / 6.6lbs.
身長：51cm
頭圍：35cm
出院體重：2.9kg .... 第9日大去健康院已經去返3.1kg嘞 ... very good!!!
特徵：
似mama - 棕色頭髮、豬膽樽鼻、長長的腳趾及手指、肚臍型態、喊聲、咀形(baba話似我，但我覺得似baba多d ... )、眼 (人哋話開咗嘅時候...)

似baba - 眼 (人哋話合埋嘅時候... 特別笑o個時嘅香蕉眼型 ...)、眉形、長睫毛、大汗

似佢自己 - 眼仔碌碌、鐘意o都長個小咀、大耳珠、強而有力飛毛腿、肚餓/換片片/扭抱會喊到拆天 (好似虐兒咁聲 .... o係醫院姑娘已經話佢係咁 ....)、好嗲 ... 喊聲好似女仔、好似有d怕黑

傻mama 1.5小時順產感恩篇 ....

26/1 年初一：
下 晝6點幾瞓醒見紅，即刻沖涼洗頭食d嘢，然後老公陪我去浸會check吓，好緊張 ... 見冇陣痛，所以老公都唔expect我要入院住，只係叫姑娘同我做個一小時CTG ... 果然冇乜料到，之後又帶住個走佬袋返番屋企等陣痛 / 穿水再入院 ... 今日就當係一個drill 啦 ....

27/1 年初二：
仍然見紅，不過都係冇乜動靜 ... 我同老公都覺得有d古怪，我又覺得見紅得嚟又好似有d滲羊水，但唔肯定。老公話打畀Dr MO，雖然佢o係香港，不過都係放緊假，我又唔好意思，所以話睇多日先算 ...

28/1 年初三：
同 琴日情況一樣，今日老公重要返醫院巡房半日，攪到大家提心吊膽，所以老公忍唔住打咗畀Dr MO，佢叫我不如返浸會check多一次有冇穿羊水再call佢 .... 老公放工返嚟仲買埋好味點心畀我食 (唔知點解我心情好忐忑不安，好似食最後的晚餐咁 .... 仲有d upset，好似知道就快生，有d唔捨得咁 ... 好古怪)。沖涼洗頭後、下晝成4點幾終於出發去醫院，去到有另一個孕婦都係同我差唔多情況，係第二胎，剛check完真係滲咗羊水又冇陣痛，佢老公係christian、叫聰哥，佢好好人，一路同我哋傾計又同老公分享經驗，好開心!

其 實新年好多人冇入院，d nurse都話算唔忙嘞，不過都等咗成半個鐘先到我驗，一驗就知龍與鳳 .... 緊係滲緊羊水啦，我呢個mama真係傻傻吓，姑娘即刻叫我辦入院手續，心情更加忐忑同好緊張呢!!!! 不過d姑娘好好人ah，係真係好好，都唔知點講 .... 肥mama姑娘一路拖住我又同我講笑、等我冇咁緊張呢 ...

Dr MO 話穿咗水就要催生嘞，因為已經第三日，唔出個B驚會有感染 ..... 佢吩咐姑娘幫我塞粒藥，睇吓會唔會有陣痛，另外又再做多次一小時嘅CTG。6點幾Dr MO嚟到睇我，當然冇動靜啦，都係開咗一度 ... 但係一d痛都冇。佢叫我食個light dinner，然後今晚最遲9點要幫我催生，唔好拖咁耐 ....

食完飯冇耐拆咗機就要去待產 室，好唔捨得嘅感覺，又有d驚驚添 ... 9點半姑娘幫我打黃豆落antibiotics，因為都係驚BB會感染，老公一直o係身邊陪住我，開始有好輕微痛，不過一路提自己要用多d腹式呼吸 (瑜伽老師話可以減痛一半，所以點都要做 ...)，咁又好ok，頭一個鐘都冇乜事、亦唔駛用笑氣 ....

好似約10點都冇乜大 痛，姑娘提議打一支止痛針，係可以等個人relax d、咁樣個子宮亦可以開快d ... 老公叫我打，咁就打啦。然後姑娘嚟話要幫我穿水，因為太耐都未穿 .... 真係痛到我痴線，我都忍唔住叫咗句"好痛ah"，唔識講 ... 痛入心，即時d暖暖嘅羊水就流咗出嚟嘞 .... o個一刻我知道 ... 我好快會生、我哋會好快見到阿仔，個心祈禱要開快d、痛少d、快d完成任務 .....

10點半推我入2號產房，差唔多11點 Dr MO都返咗嚟，姑娘仲好似再加多d催生藥，Dr MO見我都好似冇乜嘢，仲話我痛得好斯文又唔係好叫痛 ... 其實唔係，當時好快就開到3度，真係感覺到幾痛，除咗腹式呼吸我仲要開始聞笑氣嘞，不過我同vally一樣咁理智，我只係畀自己每次聞笑氣時只可吸4-6 吓，唔可以聞咁多，因為唔想自己好wing咁 .... 老公換咗衫入埋產房陪我，一邊鼓勵我又一邊幫我計時，當時平均每兩分鐘就痛一次嘞，到11點幾痛到我手都震埋，姑娘就叫我唔好咁樣聞笑氣，佢話d人痛到話 d笑氣止唔到痛係因為用錯方法，佢叫我一痛就大力吸、一直吸到覺得唔痛、唔好慳住只吸幾吓，咁樣我會好辛苦。

我一路聞但d痛一路多咗好多 好多，姑娘見我咁辛苦都諗係咪咁快嚟料、又幫我check吓，原來話咁快我已經開到7度幾8度，老公同d姑娘話好叻呀，叫我繼續努力，同時都幫我減返好多 催生藥，因為都冇乜必要再落，另外又再call返Dr MO入產房隨時幫我接生。o個刻真係痛到典床典蓆咁，又唔畀我用力，我又冇晒力揸住個笑氣罩、要老公幫我揸，條腰就好似wendy話畀人打斷咁痛、對腳因 為d止痛藥又麻痺晒，唯一好係我之前聞好少笑氣所以個人仲好清醒，只係有少少暈船浪feel，同埋超級口乾(已經兩個幾鐘冇得飲水....)。Dr MO入嚟睇我，佢竟然仲笑我話我終於識得叫吓同叫痛、不過仍然好斯文同唔夠癲 .... 激死我，但係好消息係佢話生得，估計用10個cycle 啦，但同時要攞走樽笑氣 ... 好痛，我o個刻真係好佩服以前d人點生仔，因為冇咗止痛藥真係痛到好似畀人殺死咁、又好似有一舊超大石頭要爆出嚟咁、仲要o係你個肚裡面不停轉，我都唔知 點形容 .... 總之呢種痛，應該係超越咗10級 ....

要出力嘅時候到嘞，但係個人都痛到軟晒，大家估我有機會28/1 2400前生到個BB，不過到最後唔夠氣用多咗兩個cycle ... total 我用咗7-8個cycle 生咗小雋雋，最後睇鐘已經係 29/1 凌晨 0時xx分嘞 ....... 一個小生命就係咁誕生，莫名興奮 ....最感動係雋雋個頭仔一出嚟就已經識喊，一直喊喊喊 ... 喊到出晒嚟抱埋去另一邊床幫佢包住都仲喊，係姑娘抱咗佢埋我身邊就冇再喊嘞，佢真係會認得我嘅心跳聲、所以會變得安靜，好開心、好感動，老公第一次見到同 接觸到自己個仔都好感動。當然姑娘有幫我哋影好多BB相同全家福啦，不過好快就要抱走BB，等我出埋胎盤後老公又要先離開產房，得返我一個同d姑娘o係入 面，好掛住佢哋ah ..... 成晚好hyper，唔係好瞓得著，好想快d見到BB同老公 .....

學老公話齋，原來我咁忍得痛 同埋咁大力，未試過真係唔知。生完o個晚我同老公講我下次再生就唔要順產、因為好痛好辛苦，不過瞓醒第二朝已經好似唔係好記得o個種痛，又覺得ok、下次 都可以再嚟過。但點都好，一個小生命能夠o係肚裡面孕育成10個月、仲一直陪住自己成長，最重要係佢可以好安全好健康好正常咁出世，呢一個真係天父最大最 大嘅祝福，亦係最寶貴嘅禮物，雖然過程好辛苦好痛、但亦有好多開心好溫暖同值得回憶嘅時間，我到最後仍然覺得係值得，我好感恩神讓我呢個不配嘅人能當上 mama、擁有屬於自己同老公嘅孩子、更重要係天父讓我哋成為佢神造人計劃當中嘅其中一份子，我希望我哋學得好亦做得好一對好父母，「教養孩童，使他走當 行的道，就是到老，他也不偏離。」（箴22：6），我同老公會一齊努力 ....

多 謝天父!!! 多謝佢聽祈禱唔駛我痛咁耐又生產順利 ....... 多謝為我哋祈禱的所有人、多謝每個人的祝福及禮物、多謝浸會醫院幫過我哋嘅姑娘，佢哋真係非常之好，仲有係多謝Dr MO & Dr LEUNG、仲有孟搏士 ... & Dr MAK (雖然最後唔係佢幫我接生 ... )。

天父真係安排咗好多天使o係身邊幫我哋ga，好感恩!!!

心の孕照 by Boogie (Part 2)

痛入骨 ...

痛到入骨，終於可以理解到 .... 前幾日一直耻骨好痛，星期三冇咁痛，就即刻出吓街食飯，食完都係o係Citysuper打咗個白鴿轉買d生果凍肉，o個晚都好地地 .... 不過唔痛嘅日子都係好短，星期四又開始好痛，琴晚同今朝又係痛到幾乎郁唔到咁滯，或者郁一郁就痛到大叫同標眼淚 .....

呢種 Hormone真係好強勁，老公講過個名我都唔記得嘞 .... 小雋雋可能又轉低咗啦，好明顯見到個肚仔係座低咗咁ga，老公話都真係似隨時生得，不過個人意願就想小BB 7/2-9/2 先出世、因為醫院太多人攞annual leave、所以老公 7/2 先正式放到假；但係見到我咁痛，有時又想早少少。算啦，都唔係我哋可以預測同決定，都係要睇天父要小雋雋幾時出嚟，不過唔知骨骨痛嘅時間同程度可以少一d 呢? 都真係攪到冇晒心機、又要成日瞓o係度 / 坐o係度，好悶ah ...... 好在之前都將d嘢準備得 7788，如果唔係宜家行動不便都唔知點算ah ....

老公，你估我到時加埋陣痛嘅話，我仲可唔可以行到呢?? 不如你班定一張wheelchair 返嚟畀我以備不時之需可能會好d呀 .....

多謝Boogie琴日專登攞隻DVD畀我，係佢幫我影嘅懷孕相，wow原來影咗成三百幾張，好多ah，另外有一批執過嘅相都成60張，睇到我眼花，不過真係好開心、同埋好多謝佢呢份禮物。琴日行唔到，所以都係要工人落去攞 .... 有d唔好意思呢 ...