05022009 ForEva Wedding@Chinese Rhenish Church Wan Chai

恭喜Eva同阿For 0502大婚之喜!!! 本來一早答應Eva帶埋雋雋去佢哋婚禮，但係早一晚確診個豬仔流感後，以雋ba嘅專業意見及態度，認為唔帶雋雋出去會比較好d，所以最後變成marriage time，得雋ba ma兩個去、再後加食飯同shopping時間兩小時。唯一可惜係去唔到佢哋嘅婚宴，冇得見吓d舊同事+朋友Viola & Addy，希望遲d有機會再見面....

開心又可以見到阿Klaus!! 講起佢真係有一種緣份，大學畢業o個年同Eva o係Festival Office做，同Eva講起我鋼琴老師郭sir，佢又聽過佢個名，可能大家又係禮賢會，咁我郭sir都有d名氣ma，佢話佢church有個弟兄係佢妹夫，後嚟有一次o係文化中心有programme，大家終於認識咗 ..... 到2007我又神奇地去咗文化中心做嘢，所以我哋又o係度再次相遇嘞!!! 不過事隔多年阿Klaus已經升到senior post嘞!! 大家要記住佢，o係HKCC睇節目有好嘅音響效果同質素都係要靠晒佢哋PCCW成team人，當然所有重頭戲都要Klaus睇住啦，呢日婚禮同佢平日o係church都係畀人用到盡，冇計啦，音響呢d嘢係佢強項ar ma ....

成個婚禮都好鐘意，特別係佢哋個title，ForEva Wedding --- Forever Wedding，好有意思，願神祝福你哋嘅婚姻及新家庭 ... 唔知點解去親婚禮我都忍唔住喊，會再回憶自己結婚時情景，亦為好友能尋找到自己幸福而感動 ......

大家都係喜歡音樂嘅人，Eva咁artistic，佢揀嘅歌亦好啱我心水，好鐘意!!! 最鐘意Stubborn Love，獻唱嘅弟兄比起原唱重要好，聽到我同雋ba眼濕濕，因為好似講緊我哋、亦係講緊天父對我哋嘅愛 .... 多謝袮!!

Auntie Doda ...

(成日望住mama ... )

約咗好耐，今日Doda Anne終於可以抽時間嚟探吓我同BB，同埋參觀我哋間屋。之前一次見佢係Laura結婚時，即係0114，真係好似發場夢咁，今次見返個BB已經由我個肚度走咗出嚟嘞 ...

講開昇仔真係唔講唔知，其實係2002年雋ma膽生毛自己走去買ga，當時都未正式識雋ba，仲記得當日我過咗 Music Office MKK Centre 同阿姐(Doda係阿姐、大家o係office都係叫我阿妹... )一齊做嘢，放咗工我話想去新世紀睇SHK一個新樓盤，就係咁兩個"磨碌"就膽粗粗走咗去睇樓，阿姐亦都係咁係第一個見證住我買樓嘅人，場面極之怡嬉同攪笑 .... 呢間屋滿載住天父畀我嘅恩典，還有以前恩福星期五職青敬拜組同弟兄姊妹對我嘅支持和幫助 (因上會過程曾被"ja dou"銀行所累 ...好感恩之後有第2間銀行幫我攪掂 ...)，當然阿姐都有好多關心同支持，呢9年來睇住我長大、陪住我經過好多事，無論係工事定私事，佢都同我一齊分享咗好多嘢，好感激!!! Doda Doda我愛你ah!!! 你唔只係我嘅好師姐，亦都係工作上嘅好伙伴，唔聲唔聲其實真係一個好叻嘅人，我好尊敬你ga!!! 你一路見證住我尋找到自己嘅幸福，阿妹我同神偷(阿姐一向係咁稱呼雋ba ...好鐘意!!!) 、仲有雋雋都一樣衷心祝福你幸福快樂!!!!

(mama成日整蠱雋雋 ... )

我愛粉團 ......

小雋雋一日一日長大，雋BaMa當然開心見佢又健康又大隻啦，不過又會好唔捨得 ... 雋Ma宜家籌備緊0509雋雋嘅100日大慶祝飯局、順道又要慶祝埋0506雋Ba嘅牛一大日子，好得早訂枱，因為雋Ma完全唔記起o個個星期係母親節，所以又可以幫埋自己慶祝第一次榮登Mama身份；仲有雋婆、豬皮Ma、豬皮姑姐 ... 當晚好多個Mama，真係好多嘢要慶祝，所以呢餐飯將會食得好抵、又慳好多時間hahaha!!!

就係咁小雋雋就100日大，但係就好似過咗好多好多個月，唔知係咪日日湊住佢，真係見到佢好多轉變。近兩個星期無論見到d朋友 / 出街有好多sales同雋雋玩，個個都問我佢係咪5-6個月大、有一個又估佢8個月大 (呢個太誇張 ...)，因為雋雋真係好長條好大隻、好得佢唔係肥，係只係大隻到一d都唔似係一個唔夠11個星期大嘅BB囉，我哋都唔明未夠3個月大都會咁大隻嘅?? 雋Ba同d朋友話佢好男仔樣、d眼神動靜亦都唔似得兩個幾月。係咪雋Ma食嘅DHA令佢咁精靈?? 仲有孟博士開畀我嘅中藥又令佢好吸收??? 開心 ...但係Baba Mama好懷念雋雋仲係好似一舊小粉團時候嘅日子，人哋可以經歷到幾個月擁抱粉團嘅時期，但係我哋只係經歷咗一個半月都冇 .... 好唔捨得，因為雋雋真係好得意 ....

仲有係近呢個幾星期雋雋已經可以一覺瞓到0530-0630不等，雋BaMa知道距離佢戒夜奶嘅日子都唔會太遠嘞 ... o係頭一個月雋BaMa真係覺得好攰好辛苦，成日祈禱希望佢快d戒夜奶，一來雋Ba工作辛勞、二來雋Ma餵人奶亦勁攰，不過當所有嘢慢慢上手、而雋雋食夜奶時間又定咗o係0300-0400，雋BaMa都覺得唔係太難應付，可以講係習慣咗添。不過呢個幾星期雋雋食夜奶時間一路推遲，但係雋Ma一樣會自己0400-0430會起身，可能已經好習慣呢個生理時鐘，而且佢唔食我都要走去pump奶，以免又出現濕衫濕褲嘅情況 (已試過三次，好"le hea"，係濕到d衫褲可以扭出水，所以真係唔可以懶 ....)。夜闌人靜，雋Ma瞓唔著會坐o係床邊望住雋Ba同小雋雋，覺得好多不捨 (唔知係咪成日覺得自己會早死過佢兩父子，有時會諗到喊ga，真係有病ah ....)、又覺時間飛逝 ... 唔知幸福嘅日子可以維持幾耐呢???

413 Take it easy 基會難德演唱會2009

上星期雋ba收到美娟電話，太突然、o個刻都唔係好記得、亦冇諗過會揾佢。今次冇大件事，只係美娟崇德想答謝雋ba過往的幫忙，所以送上演唱會門票畀我哋去聽，我哋揀咗413去，可以畀好多張我哋，不過我哋唔貪心、只係要兩張，咁我哋又大條道理有多一次marriage time ....

其實我甚少去聽pop concert，唔好、冇乜興趣，好多時質素又低，連HK Phil.都聽到耳都側埋，所以好少再去呢d concert以免令自己d聽覺再受損 .... 不過崇基崇德都係唱live 好ok嘅人，而且當中唱咗好多陪住雋ba ma成長嘅歌、仲有詩歌，所以都覺得好ok，唯一係d amplifier實在太強勁，加上又年紀大，平時又只係去開聽Classical Concert、係比較平和d，所以當晚一離開HKC對耳實在好辛苦好"wun" ah ....

最鐘意唱"我信愛是恆久"嘅時候有Harp Ensemble accomp.，畫面好靚之餘，最驚喜係見到我個音樂系同學Eva，知道佢學咗harp一段時間，不過估唔到咁嘅場合睇到佢表演 ...由於太夜、又要返去同雋婆接力湊番雋雋，所以聽到11pm就要走嘞 .... 唔知點解後面d歌好聽d，可惜冇得聽埋落去 ...

前面最左就係同學仔嘞 ....

想睇邊個係做soloist，但係全程都竟然影唔到佢個樣 ...

雋ba影d相成日都係咁 ... 明明係握手位o係我地面前都攪成咁，真係冇計 ...

沙田公園半日遊 ...

今日崇拜後約咗Vally & Wing兩個家庭一齊去沙田影相又聚一聚，本來想去Snoopy Town，但係超級人多 ... 多到都唔知企o係邊個位影相，所以轉戰沙田公園，簡直係天與地，呢度寧靜好多，同埋覺得透到啖氣 ... o係呢一度，我哋亦終於可以影到一幅似樣d、又唔係o係屋企影嘅全家福嘞 ....

十年嘅ICMA庄友，今日已經各自擁有自己的第一個孩子 ... 多謝Vally Ma要扮 / 預演一家四口幫我抱住雋雋，令到我可以輕省好多 ...


想唔話雋雋大得快都唔得，上個月買畀佢嘅BabyGap工人褲仲未好啱著，今次去影相專登畀佢試穿，原來已經變成啱啱好、而且要扣後d粒鈕，睇落都唔會再著到好耐，真係好得人驚 .... 件Tee我買80碼，都好似係啱啱好，仲話著到去差唔多一歲，睇嚟都唔會lor .... 唔止，連d 3-6mth的 bodysuit之前都仲有好多鬆位，宜家又係變咗啱身嘞 .... 仲有4日雋雋先至10週大ja，果真係快高長大ah...

3-hr Marriage Time ...

自從雋雋出世後，雋雋baba mama未有正正式式嘅拍拖時間，之前o個d都係baba陪mama去覆診，然後順路行一行街 / 食飯，其他都係帶住雋雋一齊出動。

有咗小朋友係有另一種開心，不過有時都會懷念以前二人世界嘅日子，而且根據聖經嘅教道、有咗小朋友之後唔=夫婦之間唔需要再互相建立同擁有屬於兩個人嘅世界，因為夫妻之間嘅關係亦好緊要，只係顧住孩子、又將孩子放o係家庭嘅第一位，呢個都唔係天父嘅意願。

有見及此、加上雋雋baba mama都蠢蠢欲動好耐，所以琴晚決定兩個人去拍吓拖、食吓buffet (係雋雋baba 指定，佢話突然好想食餐勁嘅，不過太遲book，"W" 已經full晒，所以求期去咗第二間，希望下次可以去到啦 ...)，因為我哋要好好實踐、擁有屬於我哋嘅marriage time。雖然只係短短相聚3小時，不過雋雋baba mama已經覺得難能可貴，因為真係可以靜落嚟、傾吓計、食吓嘢，係0負擔，係好掛住雋雋，不過呢d二人時間真係不可少，因為好需要透吓氣，特別係宜家成日留o係屋企嘅雋雋mama ..... 希望日後真係可以做到每星期起碼有一至一日半marriage time咁就好嘞!!

不過琴晚出一出去可能冷親，有d作病。

另外就係雋雋好蠱惑 (其實o係醫院都話宜家d BB個個都好蠱惑，估唔到真係咁 ...)，佢食開人奶，好唔容易轉嚟轉去d奶粉先揾到明治係比較願意食，都唔係食得多，一日先一至兩餐，好似琴晚出街就有兩餐要雋婆餵，平時都唔係好肯食，好肚餓咪局住食lor，點知琴晚隻衰豬只肯食20ml，又唔肯瞓覺，係都要等mama返嚟餵人奶，仲要食之前喊幾聲又"yi yi yo yo"咆哮一陣、好似投訴雋雋mama出咗街、累佢食奶粉咁，然後就好努力咁飲嘞 .... 跟住呢個星期雋雋baba餵夜晚最後o個餐又係磨爛蓆唔肯食乜滯，係都要雋雋mama餵返、又要唱歌"tum"佢先食快d，唔係成樽人奶就會浪費咗，跟住補o個樽小奶粉更加唔多願意食 .... sighs ... 救命ah，雋雋，baba mama以後係咪唔可以出街呀?? mama係咪又唔可以病、唔可以攰，一定要隨時候命等你呼喚我，無論係親自餵定係用樽餵?? 雋雋你要乖，mama都要休息，而且baba好掛住你，每日辛勞工作過後都想餵你一餐有d親子時間，你要珍惜、唔好拒絕baba 呀 ....

心のBaby -- Aaden (V)

雙滿月 ...

成日以為329係雋雋雙滿月，因為佢係129出世，原來到今日先係雋雋8週大嘅日子即係兩個月大嘞，時間真係過得好快，多謝天父保守雋雋健康活潑又精靈!!!

今日係第三次去健康院，又要打針啦，不過雋雋好叻 ... "er"咗兩聲就冇再喊，完完全全遺傳咗mama唔怕打針又唔怕抽血嘅好因子，叻仔!! 雋雋雖然只有兩個月大，但係d nurse已經話佢好似個3個月大嘅BB咁：

身長 - 60.5 cm (75 percentile)
體重 - 6 kg (75 percentile)
頭圍 - 40.8 cm (90 percentile)

雋雋長條咗好多、出世時係51 cm (希望你大個咗仲高過baba啦...)，體重就3 kg，頭圍就36 cm樣樣都增長咗好多，全靠天父畀mama有d優質母乳餵畀你先可以快高長大ja ....要感謝天父ah!

hee ... mama都要多謝你，因為你，mama先可以瘦得咁快ja ... 不過就變咗隻國寶咁lor ...

好轉

用咗肥虎開嘅藥膏好咗好多嘞，費事影響雋雋關係，一日只可用一次，藥力強勁ah ... 不過mama都會繼續食用同外敷中藥，因為中醫係治本同調理，希望皮膚情況會受到控制 ...

至於份驗血報告都出咗嘞，我係對所有塵類、塵蟎都有敏感反應，個range係47.8 -- very high level，唔通我真係避無可避要買部有HEPA filter嘅空氣清新機??