努力轉 ... 轉 ... 轉 ...

呢位小朋友仲有4日就滿4個月大，真係愈來愈得意又可愛 ...

表情多多又古靈精怪，實在好精靈，由出世o個一日開始已經係咁，宜家同佢沖涼仲會踢水，雋ma個laptop o係佢側邊真係愈來愈危險 ....

好貪玩，唔知爛玩程度係咪似雋ba呢??

3個月0個幾星期時開始成日向左邊碌 ......

碌吓碌吓愈碌愈過份 ... 近兩個星期，雋ba ma成日轉個頭 / 只係行開一吓，返嚟就見佢攪成咁 .... 有相為証好危險，雋雋，冇成人監管下真係唔好做d咁高危動作!!!!!

初時見到真係嚇親，好驚佢透唔到氣，但試多幾次發現佢轉低身都仲係掛住食緊手指/拳頭 .... 不過安全計宜家行開行埋都係放返佢o係BB床 / 車會好d，起碼佢唔會有Queen size床咁多位畀佢勁碌囉 .... 仲碌到180度添

話時話，雋雋，你幾時會碌埋去右邊呢??

雋雋的第一次 -- 浸會聽力測試篇

H1N1高危時節，不過約1530咗返去浸會做聽力測試 (1/6又要去健康院ma，唔快d做、d長氣姑娘到時又會煩到雋ma嘔，猛叫我快d做ga la .... )，生仔package包埋，同埋私家做得詳細、準確過健康院好多，所以都係要帶雋雋返去醫院一趟 ......

呢次test一定要o係雋雋熟睡情況下進行，對雋ba ma嚟講真係難過登天 (除非坐緊車 / 推住BB車)，而且一出街佢又發癲，就係無論我o係出門口前餵到佢幾飽，出到去佢都都係好想再食奶 .... 不過指定係人奶 ....

去到ENT Centre，d姑娘超好，為防雋雋易受感染，佢哋竟然畀我入咗醫生房等 .... 一如所料未夠5mins.雋雋奶癮又起，大喊!! 咕到d姐姐同姑娘走入嚟佢，攪唔掂、雋ba泊車又未到，姑娘好到熄左個CCTV、然後畀我o係醫生房內餵奶 ....

食食吓終於瞓咗，即刻叫姑娘帶我哋去檢查房做聽力測試，點知唔夠5mins.(可能feel到有人攪緊佢耳仔啦 ... )，又喊醒，姑娘問我介唔介意一邊餵奶一邊幫佢test，mmm .... 乜我仲可以揀咩?? 雋雋唔瞓定定根本做唔到又會唔準，而且之前o係醫院都係畀姑娘咁教餵奶，所以都冇所謂照做 ...

test之後又大喊，因為已經過咗食奶原定時間，姑娘好好，叫我繼續o係醫生房餵夠奶畀BB食先走，餵咗成半個鐘，臨走又嚟爆炸屎屎，o係房換埋片囉，終於1530原定做30mins.嘅test，最後攪到成1800先走到 ....

成日繼續係要人奶、人奶、同埋人奶 .... 好攰 ... 好攞命 .... 不過能夠堅持到呢一刻又食到佢咁大隻都好感恩嘞，希望繼續落去啦!!

不過好開心個個姑娘姐姐見到雋雋都話佢好得意，仲個個估佢成8個月大，因為佢真係好長條又聚手，而且骨骼好硬淨，講親都冇人信佢連3個半月都未夠呢 ......

崇拜 = 冇崇拜???

餵完佢返崇拜，好希望佢好似上次咁乖，自己望吓燈傻笑+瞓覺，直到完場 ....

可惜今次冇咁順灘，一開始冇耐已喊，當然唔肯用奶樽，難為我一早預備好pump出嚟嘅人奶畀佢，即係全部報銷，mama諗起就肉痛嘞 .... 真係每滴都係血汗嚟ga 雋雋 ....

通常佢大喊都會抱咗佢出嬰兒房，費事嘈住人哋聽道，因為本身都幾嘈 .... o係出面喊到拆天，後來有職員畀我帶雋雋一咗資源室餵奶，後來雋雋終於瞓咗。但我哚出返嚟時堂道已經講完，都有d唔開心，不過都冇辦法 ....

天父，可以幫雋雋克服個奶樽、又幫一幫雋ba ma嗎???

兒童按手禮前奏 -- 「教兒育女」工作坊 1

報左名參加621兒童按手禮，父母必須出席兩次「教兒育女」工作坊 ....

上完堂都好有得著，雋ba ma立志做一對好父母、好管家，希望我哋可以好好教養好雋雋-- 呢個天父所賜咁寶貴嘅產業 ....

努力呀!!!

SARS vs Swine Flu

點解美國可以當冇一回事?? 明明自己係第一單swine flu死咗人又賴墨西哥，跟住有人發燒又畀佢出境，o係關口亦冇做任何檢疫措施?? 所以柏良咁唔like美國今次做法係有道理，老公都話離譜，所以每周一鑊發估去美國都係啱嘅 ... 而o個個咁嘅病人亦好冇公德心，明知自己有病仲上機、仲只係"大部份"時間o係機上帶口罩，好離譜 ....

佢哋冇經歷過SARS嘅人同國家根本毫無意識又低估呢d變種流惑變成人傳人嘅嚴重性，可能雋ba行業關係，佢會成日講，所以雋ma嘅意識都好高，有時唔係過份擔心，而真係有需要認真面對。

2003年SARS，真係好可怕，當時嘅雋ba同雋ma ...即係東東同心怡，經歷咗好多可怕時刻。東東當時o係PMH返工，原本宣佈咗PMH係會變成全數接收SARS病人已經好驚，因為東東少不勉on call都一定會有機會接觸d SARS病人，最驚係當時連PMH ICU都要變成SARS ICU，即係極之嚴重同病危d人，最慘係連個ICU主管殷榮華都嘢咗SARS入埋去，醫院又唔夠人手，所以成日有問邊d人肯自願去幫手。當時東東都問過我一兩次，初時都不以為意，到情況愈來愈嚴重，東東又再問 ... 其實我知佢自己已經有決定要去幫手，基本上我都係支持，不過真係好擔心，連東東自己都同我講定可能隨時"nai"嘢、咁我又有乜可能唔擔心呢?? 畢竟佢一申請調入SARS ICU就會要幫病人插喉、又唔可以返屋企、我哋亦唔可以見面，真係好驚ah .... 唯一係當時o係YCH嘅麻醉人同埋佢o係ICU做嘅謢士老婆都調咗好過PMH幫手，咁叫做同東東多一個照應lor ....

而當時嘅雋ma亦唔好得去邊，因為我Office就o係牛頭角政府合署，簡單講我個地理位置係：牛頭角下邨對面、安基苑隔離、淘大花園就o係安基苑隔離 ... 即係所有有SARS病人嘅居住點，我同d同事每日返工都提心吊膽，因為搭車食飯都要路過呢d地方，所以當時我哋成日要困o係office內，冇事都唔會特別走出街，東東仲成日好擔心我添 ..... 總之係東東同心怡個處都比較高危。

不過兩個高危嘅人走埋一齊就變得冇咁怕死，東東有時post-call會揸車嚟同我食lunch，仲係走去淘大花園內嘅鴻星，因為當時佢地生意大跌布人敢去，d點人係平到$8就有交易。初時東東冇得返屋企、又冇乜同我見面，間中佢會揸車接我去基踶道傾計同祈禱，都唔敢周圍去、費事有菌嘢到人ma .... 我哋d日子就係咁過，隨住church嘅Dr TSE同東東同麻醉人同班同學Dr CHENG都係染上SARS過身，我哋就更加擔心，可以話我哋信心有動搖過，但當你身處我哋o個種境況，就會明白真係驚，不過亦因為有禱告、有神嘅力量支持住同祝福，東東佢哋先可以捱得過又冇事 ....

所以今日咁多古靈精怪嘅病，真係要好小心。當日我哋都未結婚都怕，更何況今日已經有自己家庭　仲有埋小旨雋呢?? 人傳人、洗牌效應、大爆發，只係差在幾時發生，而唔係會唔會發生，所以大家都真係要小心d，同埋唯有多d祈禱 .....

不過兩單嘢都有為PMH員工帶來少少好處，就係兩次都嚇阻到大部份平日好鐘意濫用急症室同醫院服務嘅人同埋老人院，近兩個星期好似少咗d無謂嘅症，可惜一向入住率偏高，都仍然係爆床爆到113% ...

God Blessing!!!

小矮人要拆 ...

今日收到浸記email話七個小矮人o係5月底要拆嘞，都有d唔捨得 ... 呢7隻嘢唔係人，係o係浸會大學道嘅7座 low-rise bldgs.，雋ma同好多同學仔都o係度成日上堂，近年成日返去中醫藥大樓睇中醫都時不時會路過，見到有裝修，都唔知係要拆添 ... o係呢個校園、香港唯一一個基督教大學校園，係有好多開心嘅回憶，真係由讀書、睇醫生、結婚行禮、到生仔都係同浸記有緣，所以更有感情，出嚟做嘢之後更覺o係學校讀書時嘅可貴，所以知道要拆小矮人真係有d愕然，不過要擴充校園就冇計啦 ....

雋雋100日大 ...

今晚會出去食慶祝：雋雋100日大、雋ba 0506生日、同埋0510母親節 ...

今晚嘅組合o係外人睇嚟有d奇異，雋婆病病哋，唔會出席；雋叔o係雋爺錯誤引述之下唔知今晚餐飯係慶祝咁多嘢，所以冇同報館攞假，加上真係好忙，又要缺席；基本上係有雋ba ma同雋爺，另外全人類都係豬皮一族 - 豬皮ba ma、姑姐姑丈、大家姐姐夫、三家姐明叔、當然仲有豬皮，二家姐突然畀客call走要落site又嚟唔到 ....

可能人哋奇怪點解會咁?? 其實雋ma同豬皮姨已經係中學時代同學，仲成日拍住坐，佢爺爺嬤嬤都係睇住我大，嬤嬤仲當我孫女咁，基本上成家都當咗我係自己人 ... 而佢哋同我相同之處，係自己親人雖有一大ja、但卻唔係幾好，呢幾年我哋兩家都經歷咗好多事，互相更幫忙咗好多好多，最開心豬皮又一齊返埋尖福仲上個月受浸埋，親上加親，總之係大家都完全體驗咗乜嘢係遠親不如近隣、同埋出外靠朋友lor .... o係家族裡我哋都好多失望，不過感恩天父畀我哋兩家人互相扶持同幫助，又畀一班咁好嘅人待我哋如至親，呢d唔單止係人嘅愛，更加係神嘅愛同祝福呀 ...

雋雋你100日大嘞，你已經長過65cm 同重過15lbs>.，想唔接受你大得咁快嘅事實都唔得，對於第一次作為母親嘅雋ma其實未有好深感受，生完雋雋仍都係覺得完成咗個大使命，之後仲有好多路要一齊走，或者要到雋雋大一d，雋ba ma先可以完完全全體會父母親嘅感覺。不過多謝神畀我哋有機會去學習、同埋透過照顧雋雋去完全體驗天父對我哋o個份愛 .... 雋雋baba mama祝你繼續每日快高長大、身體健康、精靈活潑、靈命日增、愈大愈乖乖!!!!!!

o係度代雋雋多謝各位uncles aunties嘅厚愛同重手賀禮，Many thx!!!!!!

雋 Ba ... Happy Happy ... Birthday!!!

今日係雋ba 嘅牛一，生日快樂!!! 祝身體健康、主恩滿溢、EXIT 考試順利同合格、同埋順利轉做perm. MO!!! 願主祝福您呀!!!

今晚原本又plan咗同埋雋雋出去食晚飯，今年訂咗枱o係洲際食dinner buffet，不過酒店d staff話今晚都幾多人訂枱 (流感高峰，雋ba驚BB受感染 ... )，而且雋雋又唔食得，齋瞓同埋一餵奶樽又喊，所以我哋掙扎好耐之後又忍心唔帶佢出去，寧願早去早回返屋企陪雋雋。就係咁，今晚雋ba ma又可以有marriage time，已經係呢兩個星期嘅唔知第3定第4次嘞，好幸福!! 遲d、又或者唔知幾時先又可以有咁多marriage time嘞，所以我哋真係好好好珍惜，亦好多謝天父!!!

今晚成晚就一邊食一邊掛住雋雋，但係我哋兩個亦好開心，一來d嘢好味，二來側邊兩張大枱d人冇嚟，所以都好安靜，可以畀我哋好好傾吓計食吓嘢，感覺良好 .... 最開心應該係雋ba，又有buffet食唔在講，佢最開心係收到雋ma我嘅特製禮物，係真係好特製，雖然我耐唔耐都自製好多禮物同card送畀佢，又會買唔同禮物畀佢，不過今年我同雋ba都異口同聲話今次呢份禮物係最珍貴、最好、同最鐘意，係無價ga，由內至外都係雋ma一手包辦，總之裡面就裝滿晒呢7年來嘅美好回憶同天父恩典嘅見證 .... 我同雋ba見到都喊，真係幾感動ga ... 雋ba仲傻到叫我再包返佢又再送畀佢，佢真係好鐘意同好好好開心ah .... 見到你開心，我都好開心ah ....

返到屋企當然唔少得同雋雋嘅傻瓜合照啦 .... Baba，生日快樂ah (雋雋 上!!!)

(仔：唔好掛住睇電視啦 ... )

05022009 ForEva Wedding@Chinese Rhenish Church Wan Chai

恭喜Eva同阿For 0502大婚之喜!!! 本來一早答應Eva帶埋雋雋去佢哋婚禮，但係早一晚確診個豬仔流感後，以雋ba嘅專業意見及態度，認為唔帶雋雋出去會比較好d，所以最後變成marriage time，得雋ba ma兩個去、再後加食飯同shopping時間兩小時。唯一可惜係去唔到佢哋嘅婚宴，冇得見吓d舊同事+朋友Viola & Addy，希望遲d有機會再見面....

開心又可以見到阿Klaus!! 講起佢真係有一種緣份，大學畢業o個年同Eva o係Festival Office做，同Eva講起我鋼琴老師郭sir，佢又聽過佢個名，可能大家又係禮賢會，咁我郭sir都有d名氣ma，佢話佢church有個弟兄係佢妹夫，後嚟有一次o係文化中心有programme，大家終於認識咗 ..... 到2007我又神奇地去咗文化中心做嘢，所以我哋又o係度再次相遇嘞!!! 不過事隔多年阿Klaus已經升到senior post嘞!! 大家要記住佢，o係HKCC睇節目有好嘅音響效果同質素都係要靠晒佢哋PCCW成team人，當然所有重頭戲都要Klaus睇住啦，呢日婚禮同佢平日o係church都係畀人用到盡，冇計啦，音響呢d嘢係佢強項ar ma ....

成個婚禮都好鐘意，特別係佢哋個title，ForEva Wedding --- Forever Wedding，好有意思，願神祝福你哋嘅婚姻及新家庭 ... 唔知點解去親婚禮我都忍唔住喊，會再回憶自己結婚時情景，亦為好友能尋找到自己幸福而感動 ......

大家都係喜歡音樂嘅人，Eva咁artistic，佢揀嘅歌亦好啱我心水，好鐘意!!! 最鐘意Stubborn Love，獻唱嘅弟兄比起原唱重要好，聽到我同雋ba眼濕濕，因為好似講緊我哋、亦係講緊天父對我哋嘅愛 .... 多謝袮!!

Auntie Doda ...

(成日望住mama ... )

約咗好耐，今日Doda Anne終於可以抽時間嚟探吓我同BB，同埋參觀我哋間屋。之前一次見佢係Laura結婚時，即係0114，真係好似發場夢咁，今次見返個BB已經由我個肚度走咗出嚟嘞 ...

講開昇仔真係唔講唔知，其實係2002年雋ma膽生毛自己走去買ga，當時都未正式識雋ba，仲記得當日我過咗 Music Office MKK Centre 同阿姐(Doda係阿姐、大家o係office都係叫我阿妹... )一齊做嘢，放咗工我話想去新世紀睇SHK一個新樓盤，就係咁兩個"磨碌"就膽粗粗走咗去睇樓，阿姐亦都係咁係第一個見證住我買樓嘅人，場面極之怡嬉同攪笑 .... 呢間屋滿載住天父畀我嘅恩典，還有以前恩福星期五職青敬拜組同弟兄姊妹對我嘅支持和幫助 (因上會過程曾被"ja dou"銀行所累 ...好感恩之後有第2間銀行幫我攪掂 ...)，當然阿姐都有好多關心同支持，呢9年來睇住我長大、陪住我經過好多事，無論係工事定私事，佢都同我一齊分享咗好多嘢，好感激!!! Doda Doda我愛你ah!!! 你唔只係我嘅好師姐，亦都係工作上嘅好伙伴，唔聲唔聲其實真係一個好叻嘅人，我好尊敬你ga!!! 你一路見證住我尋找到自己嘅幸福，阿妹我同神偷(阿姐一向係咁稱呼雋ba ...好鐘意!!!) 、仲有雋雋都一樣衷心祝福你幸福快樂!!!!

(mama成日整蠱雋雋 ... )