Baby Aaden 大戰 Baby Pooh

旨雋應該揾到喜歡嘅playmate (雖然佢唔知係乜東東 ...) .... 成日玩到好開心同尖叫 .... 又非常之肉緊 .... 好得意，睇到baba mama好開心!!!

雋ba成日想好似肥虎咁train小虎，托住個波轉、練腿力 ... 點知雋雋突然有一日自己攞起Baby Pooh Cushion就做咗呢個動作，唔駛教 ... 叻仔!!!

成日又當pooh係敵人咁 ...

我咬屎你 .... 咬咬咬咬咬 (配尖叫聲 ... )

"nin"屎你ah .... (好肉緊 ... 配高8度嘅 "mmmm"聲 .....)

發現mama影相停低再擺個靚pose ...

再咬過 ...

好攰 .... 要休息嘞 ... Pooh，放你一馬啦!!!


望住佢已經好開心好滿足，能夠見到佢笑同健康成長，就更加係無比嘅幸福 ... Love U Aaden!!!

私家疫苗 + 抬頭日 ...

今日去Dr LEUNG度幫雋雋打2nd dose Rotarix & Prevenar，等咗好耐，愈來愈近雋雋食奶時間，真係心知不妙 .... 打針例牌喊幾聲，奇就奇在兩個月大時去食Rotarix 都食得好開心，因為甜甜哋 ... 但今次冇咁順灘，枝針筒都未放晒入口已經狂喊，唔知係咪以為係奶樽物體所以好抗拒呢?? 姑娘好唔容易先餵晒佢食，之後重一直係咁喊添，係放返上條sling度又帶佢去照鏡 (雋雋次次照鏡都好開心又傻笑，大咗實係同mama一樣咁貪靚 ... )，雋雋先至冇再喊同瞓咗 ....

雋雋不停掙扎，抱住佢嘅雋ma攰到想屎 .... 好得打完針佢特別攰，今晚9點最後一餐奶食咗15-20mins. 好快就瞓到隻DU (豬)咁，而且放返仍落自己床仔都冇yell ... 真係好安樂 ...

今日上磅又8.0幾kg，比上星期去健康院又重咗dd，好得人驚，雋ma就快斷髀嘞 .... 連醫生都話佢真係大隻咗好多，好得係長、而唔係肥ja ....

坐對面有個小BB，雋ba ma以為得2-3個月大，佢mama話雋雋得意、問雋雋幾大?? 雋ma答4個半月，佢好不可思議嘅表情 .... 因為原來佢個B已經8個幾月，但係雋雋重大件過佢好多，重話佢都想個BB大隻d .... 雋ba ma都唔知點回應佢好 ....

o係lift好多人，不過d uncle auntie又讚雋雋好精靈，baba mama真係好開心同好感恩ah .... 雋雋，你真係好得意ga　如果你再乖d唔好成日咆哮mama就更好嘞 ... heehee

另外好開心係mama已經幾日冇同佢練反身，今日又同佢玩，雋雋已經做到俯伏時抬起頭嘅動作，雋ma重立即拍video畀雋ba睇，跟住o係clinic又可以睇多次，重抬到個頭仔好高、又可以維持得耐咗，睇見你又有進步，真係好開心ah ...

又反轉我 ...

係咪真係要自己抬起頭??

成功嘞 ...

mama ... 好攰ah ..

一梳蕉 ...

懷孕除咗帶來幸福和歡樂，對雋ma都重有好多唔同嘅、又古怪嘅經歷 ....

懷孕前期會好熱又突然出風"nan" ..... 中後期又皮膚敏感、又骨痛 .... 不過生得好快，都好安樂又感恩，以為生完一切回歸正軌，點係坐月期間皮膚敏感重嚴重咗，之後又好好多，冇乜事 .... 63晚左手愈來愈紅又痕最後腫埋，唔知乜事 .... 64中午到右手出事，夜晚一對手一齊又痕又腫，唔係講笑，係可以用一梳蕉嚟形容，係一梳紅色的蕉，特別隻左無名指戴住戒指就痛/緊到雋ma傻咗 (我又痛又痕o個幾個鐘真係好想切咗自己對珍貴彈琴手ga ... 人都癲ah .... )，勁搽類固醇藥膏都唔係好得，最終都係要食d輕量抗敏感藥 ...係BB食都ok嘅先食，但食完會好攰，都冇計，唔食真係唔駛瞓 ....

雋ma係自小有鼻敏感，但都唔expect會咁，因為一向冇其他敏感症 ...

不過睇過中、西醫、連雋ba、肥虎都係話，可能懷孕期/產後d hormone轉到七彩，會誘發咗一d敏感症出嚟，話其實好多孕婦都係咁，雋ma已經唔係嚴重o個批，重話雋ma兩隻手心其實都有紅點又好熱 --- 其實都代表好敏感，只係以前冇發出嚟 ....

近兩三星期重有脫髮現象添，係好多，我知有d懷孕期已經狂脫髮，但我一d都冇，重以為會冇事，點知孟博士重話只要我一日重BF、頭髮都係會繼續"nuk"，都係hormone問題 .... 好需要haircut ... Vick，你幾時放完假ah???

sighs ....... 已經夠煩同唔開心，又唔係做壞事，一切都係為阿仔好，但係換嚟都係好多反效果 .... 不過有得揀，我當然係會揀自己有事好過雋雋有事 ....

唯一係驗過唔係有紅斑狼瘡，真係要感恩 ....

雋雋，希望你大個會知道、亦希望你會記得 ... 生一個健康嘅BB真係唔容易，你要好感恩、多謝天父保守，亦希望你長大後唔好激mama咁多啦 ....

蠋光海 ..

如果今年唔係有咗雋雋、又唔係佢咁細，雋ba ma一定會去今年64二十周年集會 .....

當年嘅全部都記得 ....

人數爭辯好無謂 ... 但高空影落嚟見到嘅蠋光海係事實 .... 就係範圍大咗好多好多好多 ....

當晚o係電視睇到嘅場面真係好感動 .... 蠋光海 ..... 代表良心、堅持、事實、信念、回憶 .... 同埋一定同『剋人「曾」』持不同立場同意見 ....

重記得71大遊行 .... 有d變態，但都幾想呢個壯觀場面今年重現ga ... 如果真係，雋ba ma一定會再推埋BB車去支持 ....

雋雋，有一d事係唔可以唔知、唔可以唔理、或者畀人扭曲，通識第日都分分鐘會問ga，所以baba mama一定要從小就教導你 ....

健康院 ...

今日係雋雋第3次去健康院，一早同佢講咗　又成日叫佢乖d唔好出到去又扭食奶，都總算ok!!

不過佢仍然喊到拆天。事緣佢食飽就出門口、加上o係車"O"吓"O"吓，基本上都已經係瞓得，可惜健康院o個度又多人 (西九龍o個間係全港人流最多嘅健康院ah ...)、d 咪又鬼屎咁大聲、又好多BB喊 (我哋認為好多BB都係因為太嘈而大喊 ...)，雋雋瞓咗又畀人嘈醒、再瞓又再畀人嘈醒，最後都喊到拆晒天 ...... 一離開個clinic落返街，都嘈，不過立即收聲唔喊。我哋兩個大人o係上面困1.5hrs (平時要>2hrs添 ...好攞命 ... )，講真我哋都覺得難頂，咁何況係一個小BB呢??

雋雋最新體重係7.88kg (17.3 lbs. ... 唔怪得baba mama都抱到手軟 ...)、頭圍43.9cm、身長approx. 70cm .... 近日已經又有3個人問我佢係咪一歲大 .... 唔好玩啦 ... 一歲?? 大部份問我係咪8個月都接受到嘅，一歲好似好誇 ... 我要重申，雋雋佢只有4個月大 ....

mama今日下晝返到屋企時全身腰酸背痛，以為只係雋雋重攪成咁，原來係mama作感冒、終於病咗嘞，由於全身好"慶"、又喉嚨痛，雋ba為防mama發燒，經佢多番勸告之下先屈服食咗一粒"墮落珠"，希望快d好返啦 ....

雋婆同Ah Li終於有著落嘞 ...

纏繞雋ba ma個幾月嘅搬遷計劃終於落實 .... 唔係我哋，係雋婆同Ah Li。

真係說來話長，其實都唔想講咁多，因為當中夾雜好多唔開心時間，加上時間緊迫，所以就好似熱鍋上嘅蟻一樣 ....

佢哋住開嘅一座，由於富貴總裁業主神秘地賣咗層樓 .... 係真係好神秘，因為係雋ba嘅相熟agent譚小姐講畀我地知，之後我o係星島睇樓王都見到呢個成交，但業主都冇聯絡我地，係直到5月頭不停揾佢佢先回覆，仲要又未揾到新業主 ... 到5月中揾到佢o個邊agent然後先聯絡得上簡太，點知得來答覆係佢會自己要嚟住 ......... wahhhhhhhhhh 真係"OOOOOOOOOOOO"晒咀，唔好玩啦，614就係租約期滿，兩個大人、一屋都係嘢、再加埋我地同雋雋寄居o係一座嘅嘢，真係好多ah，畢竟都住咗一年，咁多嘢又要執，今日嘅雋ma湊住個B，我又點可以好似以前咁自己一手一腳又快快脆攪掂晒所有嘢呢???

呢d都算，最攞命呢期個市好似好返d，d業主個個突然封盤，本來租又唔租，一係又賣又租，死咩!!! 佢地自己"long"到d價好高、咁d客都有自己心目中價ga ma，所以攪到佢地自己都唔知想要乜嘢價，又唔知係想賣定租 .... 攪到我地都好頭痕!!! 我地thru譚小姐、另+中原一個agent幫我地係咁揾係咁揾，點知都係睇得宇晴軒3個 + 泓景1個租盤(報紙單張好多假嘢!大部份都租左出去嘅 .... )，有1個昇仔就thru看間同37/F業主聯絡、同一座好方便，可惜勁貴(因為業主去年高位入貨 ...又多"緊"家俬)，所以都租唔到。有睇mei foo3間，但都係有陰影、好驚，所以都唔諗嘞 ....

好感恩，兵荒馬亂之際譚小姐托京士活d人脈網絡(其實一座都係咁揾返嚟 ...)，今日終於租到我地樓上27/F一個單位，開價10k，最後都落唔到心目中8.5-9k，要9.3k 呀，仲要3個月畀一次租，其實今日佢個外籍租客先滿約還key，業主兩公婆見雋ba咁嘅職業、再走埋落嚟睇我哋單位 (佢地要確保我地係好租客、唔會整衰佢間屋、又"gan"錫d嘢wor .... )，個鐘生先肯由10k-到9.5k再去到9.3k ja .... sighssssssssss 冇辦法啦，又要近，又盤源極少，加上睇幾間都係昇仔呢度質素最好又企理，咁所以都快手租，因為今日好多間代理約咗鐘太上去睇樓ah ....... 而且今日雋ba係on call ga，中間4pm都係揾人頂一頂趕返嚟、然後o係我地間屋簽埋臨時租約同畀訂，趕到佢傻　好快又畀人call返上醫院收症嘞 .....

66會正式簽約，個外籍租客有d家俬留左o係度唔要，都幾新淨，鐘太話我地邊d唔要可以叫佢地搬走，有用就留返我地自己用，都算係咁嘞 .... 宜家第一個任務係聽日快d約周生幫我地搬屋，今次1去2座，真係易好多，但時間無多，好似612會交樓，又要Ah Li過去清潔又要pack嘢，都係唔可以放慢手腳嘞 .... 今次唯一好係雋婆已經活動自如又精靈過Ah Li好多，咁都可以幫手監督吓個搬遷行動嘅 ....

周生都好記得我地loo，短短一年時間，我地郭宅經歷咗由昇2+屯門兩間屋合二為一去mei foo，再由mei foo一間屋打散返兩間去昇1 +昇2，大肚要放棄我嘅琴房、又叫周生幫我托隻琴出廳，宜家又嚟一轉昇1搬埋去昇2 ....wah 講到我自己頭都暈，上次周生都已經話我地慘、咁搬嚟搬去，唔知今次佢又會唔會話我地慘呢???

最後要講嘅係d agent真係良莠不齊，試過咁多次、加上雋ba識咗譚小姐十幾年、thru佢租屋都唔知幾多間，始終都係佢最好、最老實，其他唔熟嘅 .... no way!!!!!!!!!!!! 好唔老實ah!!!!!!!!! 可惡!!!!!!!!!!!! 上次mei foo間衰屋屋漏兼逢連夜雨，利嘉閤個Ivy衰到嘔，有邊個好似譚小姐咁好o係我地返咗工時上嚟幫我地吸水、抹地　吸塵，漏水當晚又幫我裝水、之後又揾師傅，之後嚟昇1，水電煤都係佢幫我申請，今次雋婆過昇2佢又幫我做轉名轉地址，好到暈，呢筆佣真係抵佢賺ga，雖然唔多，但佢都好落力，將心比己jeh，唔似其他d咁衰 .......

雋ba，雋ma當年自己買樓都係好簡單咁，可能新樓又SHK嘢唔駛煩，點解租樓會咁煩?? 煩到我壓力爆煲，近來喊過不停又好moody，連孟搏士都話我上晒火、叫我唔好咁大脾氣 ......... 不過，真係頂唔順，係咪多咗個仔個人蠢咗?? 加上多咗好多嘢攪，一時間，我都唔知點處理 ... 但天父嘅供應永遠都係最合時、亦會係最合適，雋婆佢兩個有著落，雋ba ma都總算舒一口大氣嘞 .... thx God!!! 今晚可以瞓好d嘞 .......

519 Colonoscopy ...

仲記得2002年雋婆check到有大腸癌嘅日子，o個幾月真係發咗場夢咁，由於知道嘅時候得自己一個，成個過程亦都係我做咗一家之主咁 (原本應該做呢個角色嘅人當然係冇做到任何嘢啦 ....)，當時好感恩仲有一班弟兄姊妹、同埋最重要有天父保守同識咗雋ba，所以最後先捱得過。佢係開刀 ... 傷口廿幾cm長，雖然冇擴散又唔駛化療，但之後都要成一年多先叫做完全康復。

雋ba成日都好擔心我，因為如果直系親屬有cancer，其實佢哋嘅仔女都係高危好多倍，就算冇腫瘤都好易有瘜肉同病變；加上雋婆o個邊家族嘅gene真係唔多靚，叔公又lung cancer，舅父又liver cancer，其他有d佢o個邊嘅人又有好多唔同病病，所以雋ba郁d見我頭暈身磬都會捉我去檢查、又成日"立"晒架餐返屋企同我抽血去驗ga .... 而照大腸鏡佢都斷斷續續游說咗我成6年去做，只係我遲遲未敢去做、又或者好怕check到有嘢囉 .... 真係縮頭龜ar .... :P

前兩個星期B.O.好多血，真係嚇到我傻仲喊埋出嚟，可能畀雋ba話我高危話得多，又見姊妹咁年青都係咁出事，所以驚上加驚 .... 仔細老公嫩呀，加上我都係通常諗自己會死先，所以好唔開心 .... 又好唔捨得 ....

519 Colonoscopy .... 結果係一齊正常、冇瘜肉，仲話條腸好靚添，好攪笑 ... 好感恩，要多謝幾個人：

第一當然係天父，因為佢保守咗我一切健康同平安，亦畀我可以遇到好醫生、又可以係好好嘅環境下做檢查、唔駛入院，而且又可以照顧到雋雋同餵到人奶 (因為只係打瞓覺藥 --係鎮靜劑Propofol，靚藥、快瞓又快藥氣過，唔會過落去畀BB) ....

第二雋ba，我知佢o個一刻真係好擔心我有事。到519正式檢查o個日，唔知做乜、做做吓有個姑娘好急走出去打電話去醫院，問524星期日有冇OT攝到做腸鏡，仲話係醫生做，希望有空檔，雋ba事後話o個刻以為係我check到有乜事，所以Dr Lee叫姑娘打去醫院book手術室檔期，佢仲喊添，好驚 .... 當然我都唔好意思，又要佢破費 ....

第三係肥虎，每次我有乜事，老公都問佢有冇好醫生介紹，因為佢係GP所以會熟d行情好多。佢真係我肚裡條蟲，知我只會睇女醫生、同埋盡量返浸會做，最後佢介紹咗Dr Lee畀我，好橋! 就 o係Dr MAK樓下、仲係"朱大腸"個partner，原來好叻女好勁，係雋ba師兄"鳥哥"同班同學，後尾先醒起佢當年讀書科科丁 --- distinction 呀 ..... 佢真係好好人，係同行家屬，又係例牌收個半價$3,000、麻醉醫生又收少d、藥費仲冇收添，真係慳好多 ....

第四要多謝姊妹!!! 好多謝佢o係面對病患、又受緊化療反應煎熬嘅同時去為我祈禱，又分享佢嘅經驗，好感激!!! 姊妹嘅另一半都有為我祈禱，多謝!! 其實睇見姊妹真係覺得自己小毛見大毛，不過見佢咁堅強又有信心，o係檢查前o個幾日我都變咗個心定d。雋ba ma會繼續為你哋一家、特別係姊妹祈禱，希望你冇咁辛苦又早日康復，期望陰天過後彩虹重現，將來身體更健康、o係主裡活得更豐盛 ....

要多謝埋Danni，雖然我最後唔駛入院又冇claim $$$，不過好多謝佢之前幫我預備好晒claim $$嘅嘢又畀我好多入院檢查嘅資料 .... 麻煩晒!!!

雖然冇事好似一切歸於平靜，但都係要小心d，同埋雋ba話我5-6年後都係要再做，以後keep住係咁添wor，Klean Prep(瀉水)真係唔係幾好飲，好唔鐘意陣味，不過為咗安全，相信我將來都係要繼續飲ga la ....

雋雋的第一次 -- 521 迪士尼篇

517-524雋ba V/L，一早話咗要帶埋雋雋去迪士尼玩吓影吓相 ... 用埋Annual Pass + 3歲以下唔駛入場費，好似好抵咁，唔怪得Vally Mama一日到黑都成日去玩 .... 我怕 ...我哋遲d會步佢後塵 ...

521當日終於的起心肝去，本來想住埋酒店，不過雋雋仲咁細，o係o個度留宿真係揾嚟攪，加上成日要食同瞓，唔通不停來回樂園同酒店咩?? 所以都係選擇入去玩3-4hrs算數 ...

雋雋一上車就瞓，不過揸車由昇仔去迪士尼係好近，只係20mins.車程，仲快過以前坐港鐵去，所以好快又要整醒雋雋落車 .... o個朝仲落緊雨，離遠見東涌都係烏雲蓋頂，但好感恩全程o係樂園都好好天、仲係好晒o個隻添 ...

去到成三點，雋ma又係出門口前已經餵飽雋雋，驚死佢又發奶癲ar ma .... 初時入到去雋雋都覺得好新奇，周圍又有音樂同好多卡通嘢，都可以暫時distract 佢，好乖咁 ... 雋ba ma要醫肚，去到Cafe一坐低叫埋嘢食後、阿雋雋大少爺又喊，又扭食奶lor .... 到4pm先係下一餐，不過知道唔餵佢嘅結果係佢會喊到癲、我哋亦冇好日子過，換轉o係屋企我係唔會輕易就範提早餵佢，不過出咗街真係冇辦法，佢真係唔會肯飲奶樽ga ...

迫於無奈要掉低雋ba一個o係餐廳等我，好得當時有parade佢先冇咁悶，但佢就唔食嘢、話要等埋我出嚟先食 ... 去到baby ctr.冇房餵奶 (唔明點解咁大個樂園只得兩間BF Rm.???)，不過d staff好好人，幫我過隔離1st Aid Ctr.問有冇房，然後畀我過咗去餵奶。

雋雋大少爺真係成日整蠱mama，食奶前前後後總共爆炸屎屎咗3次 + 一次嘔奶，攪到mama好
'ne hea'，好得d急救房有床又有handwash 同洗手盆，我先可以慢慢同冷靜處理佢呢d咁嘅情況 ....

最後4pm有多先出返去同雋ba食飯，食完就去小小世界，亦都係我哋呢次o係樂園玩嘅唯一一樣玩意，因為唔知雋雋會唔會怕黑同埋怕d卡通人物，所以都係試咗呢一樣....

雋雋入到去一d都唔驚又唔怕音樂嘈，全程周圍望同主打食手指及紗巾 ...

玩完緊係去花園同卡通人物影相 ... d公仔聊雋雋玩，初時怕佢驚，點知一d都冇，仲好開心咁，望住d公仔傻笑...又有d遊客見雋雋咁得意同佢影相，只係難為雋ba一路抱住16lbs.有多嘅雋雋抱到手軟 ....

開心的一天，不過去咗3hrs.多d已經攰到嘔，雋雋你就好啦，可以瞓o係架好寬敞嘅BB車度，baba mama好攰都要自己行，仲要推住你呢度去o個度去，你大個咗仲會唔會記得呢??

雖然攰，不過都係覺得幸福，仍然記得08年10月生日時雋ba帶雋ma嚟玩同住咗一晚，當時雋雋仲未出世，轉眼間今次再度重臨雋雋已經3個幾月大，好神奇咁 ... 以前玩得開心，今次唔係玩好多嘢，但有雋雋一齊好似仲開心d ... 呢種感覺係之前未有過ga ...

努力轉 ... 轉 ... 轉 ...

呢位小朋友仲有4日就滿4個月大，真係愈來愈得意又可愛 ...

表情多多又古靈精怪，實在好精靈，由出世o個一日開始已經係咁，宜家同佢沖涼仲會踢水，雋ma個laptop o係佢側邊真係愈來愈危險 ....

好貪玩，唔知爛玩程度係咪似雋ba呢??

3個月0個幾星期時開始成日向左邊碌 ......

碌吓碌吓愈碌愈過份 ... 近兩個星期，雋ba ma成日轉個頭 / 只係行開一吓，返嚟就見佢攪成咁 .... 有相為証好危險，雋雋，冇成人監管下真係唔好做d咁高危動作!!!!!

初時見到真係嚇親，好驚佢透唔到氣，但試多幾次發現佢轉低身都仲係掛住食緊手指/拳頭 .... 不過安全計宜家行開行埋都係放返佢o係BB床 / 車會好d，起碼佢唔會有Queen size床咁多位畀佢勁碌囉 .... 仲碌到180度添

話時話，雋雋，你幾時會碌埋去右邊呢??

雋雋的第一次 -- 浸會聽力測試篇

H1N1高危時節，不過約1530咗返去浸會做聽力測試 (1/6又要去健康院ma，唔快d做、d長氣姑娘到時又會煩到雋ma嘔，猛叫我快d做ga la .... )，生仔package包埋，同埋私家做得詳細、準確過健康院好多，所以都係要帶雋雋返去醫院一趟 ......

呢次test一定要o係雋雋熟睡情況下進行，對雋ba ma嚟講真係難過登天 (除非坐緊車 / 推住BB車)，而且一出街佢又發癲，就係無論我o係出門口前餵到佢幾飽，出到去佢都都係好想再食奶 .... 不過指定係人奶 ....

去到ENT Centre，d姑娘超好，為防雋雋易受感染，佢哋竟然畀我入咗醫生房等 .... 一如所料未夠5mins.雋雋奶癮又起，大喊!! 咕到d姐姐同姑娘走入嚟佢，攪唔掂、雋ba泊車又未到，姑娘好到熄左個CCTV、然後畀我o係醫生房內餵奶 ....

食食吓終於瞓咗，即刻叫姑娘帶我哋去檢查房做聽力測試，點知唔夠5mins.(可能feel到有人攪緊佢耳仔啦 ... )，又喊醒，姑娘問我介唔介意一邊餵奶一邊幫佢test，mmm .... 乜我仲可以揀咩?? 雋雋唔瞓定定根本做唔到又會唔準，而且之前o係醫院都係畀姑娘咁教餵奶，所以都冇所謂照做 ...

test之後又大喊，因為已經過咗食奶原定時間，姑娘好好，叫我繼續o係醫生房餵夠奶畀BB食先走，餵咗成半個鐘，臨走又嚟爆炸屎屎，o係房換埋片囉，終於1530原定做30mins.嘅test，最後攪到成1800先走到 ....

成日繼續係要人奶、人奶、同埋人奶 .... 好攰 ... 好攞命 .... 不過能夠堅持到呢一刻又食到佢咁大隻都好感恩嘞，希望繼續落去啦!!

不過好開心個個姑娘姐姐見到雋雋都話佢好得意，仲個個估佢成8個月大，因為佢真係好長條又聚手，而且骨骼好硬淨，講親都冇人信佢連3個半月都未夠呢 ......