雋雋的第一次 -- 文化中心篇

琴日Adore一役唔知點解可以將雋氏上上下下折騰到得返半條人命，係真係成個人散晒，連近兩個星期都成日半夜紮醒嘅小旨雋都可以一覺瞓返到7am，而雋ba ma真係無能為力，起唔到身返崇拜，very sorry ......

1215照舊要去上Baby Sign嘅堂，次次上堂到後段雋雋都會好攰又肚餓，所以會好忟又yell yell yell .... 今次已經叫好咗d，不過一上車就立即瞓著咗 .... 上完堂仲要去TST買嘢，1400 o係新世界泊好車 (由於雋ma仲有一疊CC嘅免費車飛成4年都未用完，所以今日又走去泊咗呢度 ....)，雋雋亦都醒咗，所以好順路咁返咗去CC揾育嬰室餵奶 ....

近水樓台，每次都會探吓班舊同事，今日PRAs仲係最好嘅組合當值，有Marina, Karen, Susan，當然要入去會一會佢哋，佢哋見到雋雋亦都超級開心，所以就返咗入office裡面坐嘞 .... 呢一次，係雋雋第一次踏足雋ma曾經工作嘅地方 ....

熟識但已遺忘嘅fax No. .... 「請你係節目公演/展覽前最少30個工作更將節目/URBTIX 飛版資料傳真到呢個no.畀我 .... attn. 邱小姐 .... 」--- kakaka，以前一日講幾十次，每日好似收數婆咁呀 ....

愛屎雋雋嘅Marina mama ....

仔，見到後面d文件嗎??係對面同事肥David叔叔ga，估唔到雋ma走咗兩年佢都係唔會執吓自己d文件，仲由個櫃擺到出張'dun"度，連fax機都淹沒咗 .... 話時話，雋ma以前個位又轉咗手，仲轉咗三手，查實雋ma之後已經變返做perm. AM位，唔知點解佢哋都係不停走??? 咁考埋個CRE嚟做乜呀???

Pantry + mini storeroom，公關部獨有，係舊咗d，冇計，政府嘢係咁ga la，不過係大家嘅小天地，係以前o係前台"幸都幸唔到"，樓上5/F更加唔駛旨意有得hea嘅地方 .... 仔，後面係PRAs女同事更衣地方，不得亂闖!!! 呢度係大家每日食飯、tea一tea、睇雜誌小說好地方，個櫃仲有好多明週同cup noodles o係度ga .... YEAH!

雋雋突然又想咬雋ma個鼻 .... 掛住雋ma??? ... so sweet!!!

Auntie Susan ... Putonghua超好，阿仔學普通話可以揾佢啦，大家打去CC 普通話錄音就係佢嚟嘞 ....

英文超好又講得非常好聽嘅Auntie Karen ，又係超鐘意雋雋 .... 成日抽水呀，仲自稱係金魚婆婆， hahaha ....

成日亂咬硬物，令一直唔畀奶咀雋雋食嘅雋ba ma都專登買個佢咬，點知佢係好好好唔鐘意、亦都唔識食奶咀，只係會咬個框幾啖就"nu"出嚟，寧願咬水樽 ....或咬鞋 ....
近兩個星期成日講「ma baba mama bababa ma ba ....」，日講夜又講，喊緊都講 .....以前工作就想放假，因為好忙好攰 .... o係屋企時間長咗宜家又會有少少掛住以前嘅日子同d好同事 .... 不過最後都係同雋雋一齊開心嘅，雖則有時都百厭，但係呢d歡樂時光真係唔係好長，過咗佢呢個BB階段就唔會返轉頭ga la，所以都係好值得 ....

今日CC開晒3個場 (即係concert hall / grand theatre / studio theatre 都有日間節目)，佢哋係好忙，都有d唔好意思，仲要招呼雋氏又同雋雋玩，多謝晒三個超好人aunties!!! (佢哋以前已經好幫得手，嚴格嚟講好多嘢仲係佢哋教返d AMs轉頭，絕不可以睇少 ....)

但係mama今次路過又仲未執返自己嘅細軟同鞋返屋企wor，快兩年嘞，真係好懶 ....

UCC lunch/tea??? (新世界呢間真係唔係幾好食...) ba ma好餓，雋雋自己有得坐又有星星餅食就自得其樂 .... 仔，你想彈琴??? 手形OKAY wor ....
又咬扇 ....
唔畀佢咬又喊 ...終於催到ba ma走，點解d細路總係咁???

Adore - I

11oo Adore影家庭相，期待咗好耐，見到泥柔希氏都影得咁靚、仲靚到o係外國雜誌都要介紹，咁緊係要一試啦，加上雋雋d 証件相仲影到咁好，所以更加想快d影 ....
遲咗幾個字去到，雋雋就食到好飽，但係雋ba ma掛住攪佢d嘢，自己就冇早餐食，雋ma d能量幾乎過晒畀雋雋 ... 冇晒電呀 ....頭45mins雋雋影相都交足功課，笑得好開心，Collen叔叔形容雋雋係好專業、又笑得好自信好好睇 .... d相影得好靚呀 .... 不過之後好景不常，要雋雋困o係一個陌生又冇得玩嘅環境，d人又將佢舞來舞去、又開始攰同肚餓，立即發癲啦!!!!! 雋ma 攪好耐先令雋雋瞓咗幾個字，Collen叔叔仲幫佢影d瞓覺相，瞓醒以為好d，點知都係好攰，又影到個頭"鐘"咗落地，喊到七彩，點都"tum"唔到佢開心笑 ....

就係咁，呢個真係唔會交行貨、又好人嘅Collen叔叔竟然話927下晝再幫雋雋影埋下半部份 (大約仲有4-5套衫未影 ....)，佢話雋雋心情好時笑得咁好唔好o徙咗佢，所以建議不如再影多一次 ....

好就當然好，起碼Adore真係有心要幫我哋影好輯相，不過927影1600，1700又食奶1800-2000又係高危時段，雋ba ma都有d冇眼睇，唯有望佢頭一個鐘影多d又影好d .... 真係要多多祈禱先得!!!

攪到成兩點幾 (明明話11-1300 ... 超晒時 ...)，又要去童夢攞返支訂左好耐嘅Peri-Oral cream，又發現竟然冇帶奶粉，又要衝上去B&M買奶粉(試過揾，但都唔知去邊到BF好 ...)，mimi momo成1500先去到食雋ba ma嘅早餐+午飯 ... 好得住家菜d人真係幾時都咁好人，1500打烊都做埋雋氏生意，佢哋收工食飯都照畀我哋繼續食同餵埋奶先走 ...超攰嘅一日，攰到去唔到My Gym，是日請假一堂，遲d再補啦 ...

是日最大收穫 ...望穿秋水等咗幾個月嘅Richell Snoopy chair belt終於返貨，係無啦啦上B&M買奶粉、佢又剛剛拆箱，雋ma先可以買到 .... 太好嘞，雋ma去大阪5日可以時間鬆動d，唔駛專登坐半個鐘地鐵+行15mins去橫堤間西松屋買呢條chair belt，咁又多返d時間去其他地方shopping，而且宜家帶雋雋出街就可以用，實在太方便嘞!!!

雋Ma's favourite song by John Rutter!!!!!!!!!!!!!!!!!

大相 ....

由於太愛雋雋嘅大頭証件相，所以要暫時放咗o係標題度，好大張好誇咁 .... 不過好得意呀，好想一開個blog就見到雋雋，所以大家由得我啦 ...

不便之處又嚇親大家嘅 ... 敬請原諒 ... haha :P

G10 ......

為咗去旅行同埋有時出街唔想帶450D咁大架機出去，令雋ma一直想買過部叻嘅傻瓜機好耐，宜家部Ixus用咗好耐嘞，就算其他品牌都不過真係一部好傻瓜嘅傻瓜機 ，但之前見Ah Pan同埋Boogie都用G10話好，所以都想買 ....

其實用過單反機影相嘅人都會有一種同感，就係唔係好想再用返一般傻瓜機影相，因為quality真係相差好遠，用嚟影活潑好動嘅小朋友就更甚啦。唔怪之得之前Vally Mama話會買吓買吓買上癮，愈買愈多鏡頭ga .... 雋ba ma都開始有咁嘅情況嘞 .... 冇嘅，都係想留住小朋友最珍貴嘅影像jeh，佢哋大得太快嘞，好多唔捨得，庶有幫佢哋影多d相，等將來可以有多d回憶 ....

而o係諮詢過我哋嘅專業攝影師Boogie之後，獲得以下回覆：

「G10嚴格來講都係傻瓜機，不過係升級版，因為佢將單鏡反光機的一些功能放進去，所以就可以手動、半自動、全自動等功能，亦因這個原因才可以開大光圈影到淺景深，功能可以做到但質素就......唔係唔好......G10絕對靚過晒所有傻瓜機，像素亦跟大機有得比，一般電腦睇相或4R甚至8R肯定不成問題，但由於鏡頭及裡面的感光處理器相對效小，所以唔不及大機，就好比細老仔扮大人囉!

不如你買一部G10自己用，方便你隨身帶備，亞東咪用佢的450D幫你們影囉!」
[雋ma要澄清，各位見到10張有9張嘅雋雋靚相都係由雋ma操刀，所以G10都係留返畀雋ba啦 ... 450D係屬於雋ma嘅 .... kakaka .... ]

就係咁，今晚坐言起行出咗去Broadway買G10 + 去旅行社交埋package尾數 ....

o係度特別多謝Eva，因為你嘅人面廣闊，雋ba ma今次又再一次用優惠價買到好嘢、仲可以有一大堆相機配件 + 贈品^.^ ..... Michael 超級好人，加上佢好熟相機嘅嘢，所以都畀好多意見雋ba ma。其實10月會出G11，不過像數冇G10咁高、只係趣味性高咗，所以都叫雋ba ma買返G10 / 配450長鏡算數，而且現貨最後一部本來有客留咗，Michael都叫 d staff 畀咗雋ba ma先，所以真係唔好意思、亦都無限感激!!!!!!!

太好嘞，第一次帶阿仔出trip一定好多行李，雋ma已經預咗要犧牲自己嘅空間嚟放BB嘅嘢，宜家有部細機、而又可以影到d接近單反機質素嘅相，真係輕鬆好多，希望今次日本之旅可以幫雋雋影多d靚相啦 ......

Boogie，再次多謝你成日教雋ba ma用相機呀，仲有你o個d用嚟開班授徒嘅notes都畀埋雋ba ma，真係唔知點講，Many thx!!!!!!

(今晚出去旅行社同Broadway都好多人讚雋雋好得意、又話似女仔、又話對眼好精靈、又話條腿好似好肥美想一啖咬落去，好攪笑 ...不過都好開心囉 ... )

8個月大 ......

不經不覺旨雋又8個月大，體重當然與日俱增到21.幾磅，身又長咗(不過mama未度尺數 ...)

去到呢個階段，呢隻小牛仔愈來愈多古靈精怪嘢，首先係會咬人個鼻 (有時咬埋咀 / 下"爬" ... 不過主打都係鼻 ... )，初時不以為意，後來發覺雋雋o係mama出街後返嚟詐嬌、會用一對小手摸住mama塊面、然後佢個咀會張開、再向mama個鼻度咬落去，仲要咬兩啖!!! 近來對baba都有上述舉動，所以開始留意到雋雋係好鐘意、好掛住一個人 / 好開心都會咁樣做，當發現到佢呢個特點，宜家每當佢咬baba mama個鼻兩啖都會好心甜!!! 而當旨雋見到mama喊時，亦都會用一對小手摸mama塊面同傻傻地呆望mama，好似叫mama唔好喊咁，好窩心!!!!

危險動作又多咗，好似鐘意向後拗腰，抱住佢 / 自己坐o係bumbo sitter都係咁，真係試過差d反、佢自己痛又驚就大喊囉 ... yai yai呀。宜家雋雋都係8點幾就瞓，不過就好似晨運客咁有時5點幾、有時又6點幾就醒，佢醒又yell yell yell ... 即係雋ma又要餵奶，攰到嘔呀!!! 有時唔止，佢自己醒咗就隨時攞嘢玩，包括o係佢附近嘅風扇同baby monitor o個束電線，認真嚇死人呀!!!

佢對so fa name同埋一d rhythmic pattern敏感度高咗，聽到會笑、好似有興趣，都不枉雋ma成日o係佢面前打drum pad、彃琴、唱歌、同埋攞d小玩具當percussive instruments咁同雋雋玩，由前日開始雋ma竟然見到雋雋自己攞起兩隻會發聲嘅rubber duckies，一隻手一隻、然後一齊拍拍拍、拍到兩隻duckies發出聲，琴日試過攞另外兩個有聲嘅donut圈玩具又係咁拍拍拍，開心死雋ma，因為平日都有o係雋雋面前咁拍ga ....

希望佢對音樂有興趣，就算唔叻，雋ma諗雋雋都應該會遺傳到少少音樂感掛??? 雋雋，如果係長大後真係鐘意percussion，mama一定會無條件支持你去學，亦師亦友嘅蔡立德當然係必然之選，再學上去勁d一定幫你揾埋龍老師，只要你乖、專心、肯用心學就得嘞 ... wah ha ha .... 愈諗愈遠，真係諗到short 咗!!! hahaha ...

冇嘅，其實雋ma都想自己嘅下一代完成埋自己未完的夢想 (當然係佢哋有興趣同天份嘅情況下啦 .... )，mama有好多drum sticks、timpani mallets、cello、piano、baton .... 全部都希望有人繼承ga .... 會有呢一日嗎???

雋雋的第一次 -- 証件相篇 .... 影相唔笑仲難過笑 ....

由出世開始畀雋ma訓練有素嘅雋雋對鏡頭毫不陌生，整整吓佢仲好鐘意人哋幫佢影相，成日都好鐘意笑，佢嘅笑容已經令baba mama同好多其他aunties暈晒大浪 ... hahaha .... 所以琴日約咗去Adore影証件相，佢都係對準鏡頭不停笑笑笑笑笑 .....

通常同細路影相最怕佢哋唔笑又唔望鏡頭，但係呢個Collen叔叔就話証件相唔可以笑 ... 吓??? 雋ba ma聽到都好愕然，仲叫我哋幫手合一合雋雋個口，但係又有乜可能呢?? 一個小BB佢真係由心咁笑出嚟、仲影得咁靚，真係好難wor!!! 試過合埋佢個口 ... 但變咗扁咀鴨，到再影多十幾張，雋雋已經坐到好攰，只係傻傻地望住鏡頭 ... 仲張開口變"O"咀，最後揀來揀去先揀到下面呢張、個口冇咁大又唔係笑緊嘅做証件相 .... sighs .... 100,000個不情願ah ....

其實雋ba ma都係好鐘意上面笑o個張，今晚雋ma於是打畀vally mama ... 因為要問一問我哋嘅ID精英Fung Fung Sir，睇吓係咪真係唔得，仲email埋兩張相畀佢過目，佢嘅答案係 .... 其實重點係要認得到個樣，o係佢嚟講佢會批雋雋呢張連vally mama & Fung Fung Sir都讚好嘅passport相，不過唔排除有d惡攪同事唔批 ....

不過雋ma唔理嘞，今晚立即用個softcopy去Fotomax晒咗8張，仲決定聽日先去YMT親身申請，如果真係唔得，等星期三/四 Adore 寄返下面d証件相嚟先再去過啦，時間無多嘞 ....

雋ma要鄭重聲明!!!!!! 唔係本人攪到咁遲，係有人一早攞咗假唔出聲、然後突然問人哋去唔去旅行，先至攪到宜家咁urgent，d咁冇planning嘅嘢，唔係雋ma作風 ..... 不過每次到最後做餐死同執手尾嘅又係本人囉 ......

19/9會再去影家庭相，到時係可以畀雋雋盡情地笑嘞　希望佢影得開心又影得靚靚啦 ....

My Gym Autumn Session 正式開鑼 ...

上次係試堂，8月份full晒，終於等到伉今日正式上第一堂，好好玩，雋雋其實眼瞓豬咁去，不過去到又另一回事啦，成個人醒晒又玩到尖叫傻笑，一d都唔驚又冇喊，至愛打韆鞦、單桿fing fing fing、doggy ride、同埋打筋斗，呢隻小牛仔都係同ba ma一樣貪玩ga la .... 到要走時即刻又咆哮，睡魔又急call + 就快要飲奶食粥，所以嘈到不得了，激死!!!

玩嘅魔力實在太大!!! HAHA ...

不過雋雋做gym，其實baba mama gym多過佢好多囉，佢又未識爬/企/行，成日舉佢、抱佢、抬佢、又一齊碌地沙，好癲!!! 由於雋ma近日身體疲累，所以大部份時間都好暈，主打都係雋ba陪雋雋玩，所以佢更加攰到半死，等雋ma重溫一吓今日父母辛勞之部份片段 ....

我要玩單桿呀 ... baba快d帶雋雋去排隊啦 ...

mama靠你幫我影低佢嘞

準備打筋斗嘞 ...

baba做乜放雋雋落個窿呀??

雋雋，其實只要你開心就得嘞，遲少少baba mama想抱你多d都唔畀我哋抱，所以呢d時間要好好珍惜 ....

oh經過今日影完相，雋ba ma發覺唔快d快返支長鏡都唔得，實在影唔到呢長距離嘢，Boogie其實叫雋ma買支Tamron好耐ga la，懶惰一直冇買，但宜家又想買部G10去旅行用，都係影到咁嘅嘢又細部過450D好多好多，所以好掙扎呀 ....

希望成行啦 ......

雋ba今日去接咗個Trunki Harley LadyBud suitcase返屋企嘞，真係好得意，老闆Joe哥哥話呢期好多人揀呢隻，唔知去到機場會唔會見到好多細路都用呢 ... hoho

終於又再約返星期一去影雋雋証件相，希望今次順利同埋趕得切攞passport，同埋最緊最緊要係訂package都冇問題，因為10月頭d機位同酒店房都好緊張ah ....

一切整裝待發，雋ma個心已經飄咗去老遠嘅"家鄉"日本好多日，今日仲發神經到開始打checklist ... 又係包括行程、帶乜行裝、同買乜囉，sighs ... 其實都唔知package o個部份得唔得，都唔知諗咁早做乜，不過真係就咁諗都好開心呀 haha，又成日o係個腦picture一次d 路線，望住個地圖望到入晒神 (雋ma一向都係好鐘意睇地圖ga ... )，都好似去咗一次，真係傻傻哋ga ....

之前話買咗副型仔sunglasses畀雋雋 (係符合國際防UV標準ga，唔係玩具嚟ga ...)，唔知佢可以帶未 (怕佢又係攞嚟咬呀 ...)，今日併一併上佢幅相都好okay wor，好鐘意，mama畀10個讚!!!!!!!!!! Yeah!!! 希望你可以快d戴到啦 ....

The BEST Sunscreen for kids (adults 當然都用得啦 ...)!!! 雋ma都用開大人版好okay，出咗kids緊係very good啦!!! o個d乜嘢Mustela、Chicco 全部同我掉晒佢，因為所謂兩大品牌 (仲係當中好多種產品... ) 都係容易令人敏感同誘發濕疹，係身邊有好幾個朋友嘅BB、雋雋、同埋網上有d人都係用咗敏感 ... 而且BB嘢根本唔應該有好香嘅味道，防敏感產品係應該冇味ga，所以呢兩個牌子根本都唔係o個回事，愈用愈衰，可惡!!! .... 雋ma問過d行內人，再加自己親身試過，呢隻唔"笠"、冇色、冇味、防晒度高、易清洗，加埋Bioderma 最新畀BB同孕婦 o個條ABC line就最適合不過啦!!! (但好可惜ABC line暫時只有水貨，雋ba ma仲等緊佢支好用又好賣嘅BB peri-oral cream ah ... )

其實之前都15/16唔知點，不過問過帶BB去外地好有經驗嘅Long B Mama之後就定好多，大仔8.5個月去、細仔6個月又去，去咗都唔知幾多次... 雋雋10月都9個月大啦，應該都會順利 .... 佢都好鼓勵雋ba ma帶BB去，因為可以好刺激BB大腦發展同埋話去完佢哋會醒好多、突飛猛進wor，haha 如果係又幾好吖!!! 如果今次ok，雋ma已經諗定下年去埋最愛嘅Hokkaido & Tokyo，希望雋雋兩歲前起碼飛到去日本3、4次啦 (平好多ah，再去多d都得呀 .... kakaka .... 雋ba你收到未呀??? )

總之宜家唔理嘞、好想好想去 ...... 一切準備就緒，希望最終成行，亦希望雋雋你乖乖哋可以o係機上瞓得好、飲奶又乖乖，唔駛baba mama操心、最緊要唔好嘈住其他人啦 .... 同埋最緊要健康呀!!!