完滿的一天

06.09.2013 （五）

1030
因應下午班，溜冰時間由星期一1700，調動到星期五早上，好感激好朋友仔 Darren & Aunt Karen 配合，先可以繼續一齊學溜冰。

驚喜，撞到師姐兼以前音樂系秘書 Eliza，鍾伯光太太呢，原來生咗個囝，又係根德學生，K2，世界真細小！

1115
小貓五隻嘅冰場，雋可以落堂後溜多一陣，同步雋爸同朗先去 Simply Life 霸位。其實都唔駛霸，同樣得三數枱客。多得今日雋爸放假，我哋可以食一餐好好味嘅 early lunch，不迫不趕好自在，仲買定下午茶蛋糕，好滿足！

1230
雋朗喺車瞓晒，雋媽又可以揸吓架車周圍去，又返去大學附近影印鋪影印，順便探人。影完都未見，以為運吉，臨走突然見到 Marine 舅母（中學同學嘅舅母）停喺我身邊，仲認得我，好開心！！好似返咗去讀書年代咁，傾咗陣，但話題已變咗係講小朋友／讀書／啲家長搵佢哋點整 profolio ，哈哈

1325
今年開學後，雋媽第一次正式送雋入課室，見到佢定咗，大個囝咗好多，班主任走出嚟同我講話雋呢幾日都好 OK! 校長，羅主任，Ms Cheng 都讚佢定咗好多，好開心，希望雋繼續努力，爸爸媽媽知你會做得好好㗎，畀心機♡♥

1600
接放學。今日泳會 term break，唔駛學游水，所以直去荔枝角公園踩單車同去遊樂場玩，媽媽又第一次推埋 BB 單車出街，畀弟弟坐吓，兩兄弟晒晒太陽，跑吓，踩吓單車，攰又熱，但好開心 ^^

媽媽真係好鐘意見到你哋笑，你哋開心，我又會好開心 ^^

期待已久嘅好天氣，充實嘅活動，造就完滿嘅一天，多謝天父，多謝雋爸！！！^^

AE 學生相

旨雋 VS 旨朗

Adore Studio VS Technic Photos VS 媽媽

從小到現在

從 Anfield 到 Kentville

從一個到兩個

從豬頭變得意 。。。 哈哈哈

不同嘅相，睇到相嘅質素幾參差，但見到更多嘅變化 。。。 

一對活寶貝，兩個小小時候極似樣，感覺好得意

Love AE ^^

♥♡♥♡♥♡♥♡♥♡

旨朗一歲生日會

14.07.2013

旨朗轉眼間就一歲，快到難以接受 。。。

以前專心湊哥哥，日日陪住佢，覺得時間過得好慢。到弟弟，因為分咗半時間畀哥哥，所以覺得陪得佢好少，連 blog 都好少時間再寫，冇記低弟弟好多重要成長點滴及片段 。。。

剛去完台北返嚟，之前亦冇好多時間預備，但好感激身邊好朋友好姊妹幫忙，買嘢，訂氣球，佈置，影相 ，湊囝 。。。 我先可以為弟弟預備好佢人生第一個生日會 。。。

旨朗，你長大咗好多，你長得好似好似旨雋哥哥小時候，望見你就好似重溫緊幾年前媽媽湊大哥哥嘅片段，好唔捨得你哋大得咁快 。。。你係粒開心果，經常笑，個個人見到你都好喜歡你，有性格，雖然好嗲又癡媽媽，但又好獨立，唔鐘意人哋幫你管你，比哥哥更坐唔定，但有時又可以好專心 。。。

只希望你開心，健康，愛神愛人，爸爸媽媽祝您一歲生日快樂呀！ I ♥ you, Ethan!!!

Happy 5th Birthday to Chaski

暑假完結，開學前最後一日，極忙極累！

上午先去 Adore 再補影少少相，下午Percussion class，六點去玥殷五歲生日會。

開心見到雋肯同其他小朋友玩，又見到玥殷細妹同婆婆，契爸爸媽媽妹妹，為2013暑假畫上完美句號。

玥殷，祝您五歲生日快樂，身體健康，小一面試順利，可以派到間合適嘅小學！！

02.09.2013 K2 第一天

正式開學，新一年，終於可以用水壼，雋幾開心！^^

一早先去搵 Mrs Fielding，返屋企食個飯，下午就返學，第一日，已經要咁充實。

熟悉嘅環境，熟悉嘅老師，雖然今年唔可以同最鐘意嘅同學Chloe, 和仔，汪寧同一班，仍然希望你每日過得開心，又可以識更多好同學♡♡♡

FROM 1C TO 2B

2013年8月29日

根德K2 Briefing Session

遇到最愛嘅 Chloe，不過佢升 2A ，今年無緣一班，但友好依舊^^

轉眼哥哥又由 K1 升上K2，過去一年有苦又有甜，唔容易過。雋，我，爸爸同老師應該都經歷了很多，亦認識雋更多。

一如校長，老師所說，雋成績唔需要擔心，擔心嘅只有情緒，情緒差就影響行為，行為失控先影響上堂聽唔到書。所以，大家都緊張呢一部分。

好感恩，天父聽禱告，K2 班主任竟然都係 K1 嘅Miss Wong，嘩！開學前一聽到呢個消息，眼淚不其然係咁長流，佢真係好好嘅老師，有經驗，愛與關懷，管教並重，最重要雋肯聽佢講，呢個囝唔係個知都攪得掂嗎！

唯一係轉下午班，時間少咗同唔好用，雋又攰啲，希望遲少少會適應好啲。

新一年，又大個囝少少，爸爸媽媽希望你返學開心，努力讀書，乖，又為考小一做好準備！

大人其實都要重新適應，一齊加油！

旨朗 ....

 

弟弟好對唔住，等到你四個月大先有時間心情去UPDATE個BLOG，寫返你出世嘅點滴 :P

唔係講笑，照顧多一個小朋友真係好攰又唔容易，感恩你都好乖，食得瞓得，係嘔到七彩，整體嚟講你都幾乖同唔算難湊，多謝天父!

要餵奶，又要照顧好痴身嘅哥哥，日間冇時間，夜間又好攰，實在冇精神，有時間都寧願瞓多一陣 ....

入正題^^

******************************************************************************

 

旨朗：
跟哥哥旨雋一樣，神旨意的旨，有美好的意思；朗，當然係開朗

ETHAN：古希伯來語，力量、堅定、長久之意
(哥哥揀嘅，其實揀咗三個，跟住畀哥哥揀選擇，我另有心水，但足足問咗哥哥7-8個月，每次都堅持用呢個，咁就揀ETHAN啦 ...)

今次生弟弟，又再一次証明嘅神安排係最適合我哋又令人驚喜 ....

佗哥哥，本身又風濕腰又骨刺又坐骨神經痛，加上佗BB嘅耻骨痛，實在痛到我叫苦連天!! 估唔到，第二胎佗弟弟仲大件事，痛到唔止喊，試過動彈不得，已經又要接送哥哥同圍去，攰到傻，膝頭舊患又痛吖。第一胎，想見、但又唔捨得生，生完都喊，好掛住BB喺肚裡而嘅感覺 ....

今次，都掛住，但好辛苦，又食得唔好，所以好想快啲生，一般第二胎都早，等我滿懷希望，點知等極都唔出，愈想愈遲。

預產期，28/7、21/7、25/7 都提過，始終都係靠U/S估重量再估日期，總有啲出入，大致接近 ....

最終，2012年7月19日(四) 晚上十點幾出世 ^0^

地點：浸會醫院 [跟哥哥一樣]
病房及床位：B208(3) [跟哥哥一樣，只係2009年、裝修前叫B208(C)]
產房：二號 [跟哥哥一樣]
醫生：DR. MO [跟哥哥一樣]
陣痛穿水經過：大致上都係 [跟哥哥一樣]!!!

大約16-17/7已懷疑滲羊水，有見紅，但又唔肯定，最終等三日又打畀DR. MO，正值星期四佢OFF DAY，所以返醫院用試紙CHECK有冇滲羊水，又係差不多下午5點去，結果 ... 當然又係真係穿咗，不過滲少少咁，傻更更又拖多幾日先生 :P。因為又怕感染，所以順理成章又要催生 ....

好驚，因為穿水痛到不得了，我仍然好記得!!!

唯一不同係 .... 生哥哥前醫生畀我同爸爸食個晚飯先催生。但生弟弟，因為見我上次生得快，一個當半小時生咗，DR. MO預我今次都好快，所以叫我哋唔好食晚飯早啲生 ><

好驚冇力.... 諗返轉頭都一額汗!

換好衫，話咁快畀人推入FIRST STAGE ROOM，DR. MO又話咁快到咗醫院，穿水，又唔係上次咁痛，覺得有啲小古怪 :P

知我上次生得算快，轉個頭入八點幾又推埋我入產房，雋爸就去換衫陪產 .... 我係水怪，冇水飲會死，上次生口乾到暈，今次雋爸偷運咗支水 (其實NURSE見到，不過以為佢飲 :P ....)，整個過程畀我偷飲咗幾啖，好開心呀!! 唔係呢幾啖水，我估我真係冇力生呀!

開頭又係唔多痛，宮縮慢，咁又打支止痛針，希望個人RELAX一啲會開快啲 .... 而且逐步加催生藥，開始愈來愈痛....

哥哥當年好乖，OA位，最佳出BB位；弟弟呢，打側咗啲，NURSE要我打側瞓又轉多啲身，希望幫弟弟轉返OA位出 ....其實條腰痛到都郁唔到，又已經陣痛頻密咗，程度亦痛多咗，要我轉身完全想死 .... ><

接近一個鐘，痛多咗，但仍然偏慢(大家都EXPECT我好快，卡卡 ...)，NURSE摸吓我話我FULL BLADDER，點解唔出聲要VV，但我真係冇感覺，雋爸話啲藥(笑氣)會令人冇乜感覺。佢哋話唔去會壓住個BB出得慢，要我試，試極都唔得，最終要插喉放VV，一放就500幾600ML，一放完，又轉身，跟住就愈來愈多勁勁痛，每五分鐘一次，個樣亦開始變怪獸，DR. MO又到咗，迷迷糊糊中又見到多咗幾個NURSE圍住我；我知 .... 好快就要生，唔捨得，但覺得今次痛過上次好多，所以又想快啲見弟弟好過，不過已經開始痛到冇力 .....

次次都係咁，呢個時候我就痛到癲咗 (不過都係冇喊冇叫，DR. MO話生得斯文, 哈哈 ^^)，雋爸同醫生姑娘喺我身邊傾計，又開始攞走笑氣，仲話未夠痛未開得夠，叫我痛多一陣，激死我!! 今次我竟然同雋爸講好痛，好想開刀! (我一直都揀順產，因為我好怕畀人劏一刀!)

最終今次冇打破上次生哥哥1小時30分鐘紀錄，今次生弟弟係要1小時45分鐘，多咗15分鐘，就係因為去唔到VV同埋個位唔夠靚 ....

出生重量：6磅13安士
高度：49.5CM

喊聲，淒厲過哥哥好多，媽媽抱住之後都喊咗好耐呀 ....

同哥哥一樣，單起一隻眼 ^^ .... 其實兩兄弟個樣都好似呀 ....

第二日下晝好似有啲唔同樣....

 

晚上又唔同樣 ....但同哥哥好似倒模一樣....

  

第三日又唔同多咗 ...

 媽媽小時候個樣!!!

 旨雋探媽媽，佢好掛住我，掛到眼濕濕去到醫院見到我就開心晒!!

同哥哥時一樣，夜晚十一點幾十二點餐奶，都係我自己入育嬰房餵。夜闌人靜，九成幾媽媽都瞓晒，我都好攰，不過好掛住BB，所以最後一餐我都選擇自己去餵，陪我嘅，只有另一個媽媽....

多謝弟兄姊妹 .....

DR. WOO話報告顯示弟弟白血球及乙型鏈球菌指數高，年紀太細，冇事就好，有事就好大件事，安全計要完成一個幾日嘅抗生素療程，因為要插喉仔，所以要留院，直到指數回落及種菌報告正常先可以出院....

 

但媽媽呢，瞓得唔好，同房有大陸人，唔太嘈，最嘈竟然係我隔離於醫院做文職嘅一位小姐，多家人，又一大群同事院牧探佢，車輪轉，休息唔到。加上哥哥好掛住媽媽，雖然好唔捨得留弟弟一個喺醫院，但商量過後都係自己先出院 ....

 

要餵奶又掛住BB，原想每4小時返去一次餵奶，發覺唔可行，太攰，時間上亦唔許可，所以汞定奶帶去，就可以留低畀NURSE夜晚餵弟弟嘞 .... 

 好似史力奇 ^^

爸爸第一次可以抱弟弟，開心又緊張到佢死，哈哈! (因為浸會係只有媽媽可去餵奶，其他人只可隔住窗探BB，所以未到出院都唔會抱到BB ....)

見到佢手仔腳仔插住藥喉，同埋轉位後啲傷口，好傷心，咁細個，出世一兩日就咁，又不停抽血，我都估到插喉仔/打針時一定喊到拆天 .... ><

好消息，DR. WOO一早打畀爸爸，種菌報告冇事，指數未到正常，但低咗好多，估風險低，所以畀弟弟出院，連隨執拾，先去醫院，再去ANFIELD接哥哥放學 ^^ ....

第一日返屋企，開心!!!

雖然妒忌少不了，但哥哥其實庶有個弟弟都好開心，雋都好鍚朗呀!

兩個都係天父賜嘅寶貴產業，希望你哋健康快樂，相親相愛，一齊在主愛裡成長，互相扶持!

同過往一樣，DR.MO收費減半，醫院又平啲啲，DR. WOO好到連醫生費都唔收，浸會姑娘繼續的好，天父樣樣都為我安排得最好最適合我，知我好需要安全感，又安排到每一個細節都好相似，令我唔會驚又有信心 ....

仲有雋爸，兩次陪我入產房，畀我搣到手臂紅晒，又幫我計時，提我聞笑氣，幫我打氣 ... 仲有幫手換片，半夜又幫手起身睇BB ...

當然仲有好多曾經為兩兄弟祈禱嘅UNCLES AUNTIES ....

多謝天父，多謝每位朋友及弟兄姊妹 ....

ICE-SKATING LESSON

19.03.2012


雋雋第一次參加溜冰班


唔係爸爸媽媽叫，佢未夠兩歲時見人溜冰，已經成日O係屋企扮溜冰 ..... 兩歲幾時就叫住話要學 ....


最低要求三歲 ..... 到時候又乖，興趣未變，雋爸媽都好樂意畀佢試 ....


當運動也好、練信心及膽量也好，而且媽媽人生口試過一次溜冰，自此我就知自己與這項運動無緣。如果雋雋鐘意又有恆心學落去，亦未必係壞事 .....


不過班制都有壞處，雋雋係全班最細一個，亦係最初學嘅一個，一班十個人，TEACHER ALEX都幾好，不過多人就好難每個照顧得好，而且得30分鐘一堂，大家程度不同，所以雋雋唔適應，失敗又成日發脾氣同喊 .....


雋爸媽唔介意佢跌多D同失敗，安全就可以嘞，不過一個TERM六堂，雋雋病咗三堂，今個TERM，佢其實學到冇幾多，而且大部份時間心怖不佳，唔同坐居多 .....


多謝泥媽建議報半私人班，又好感恩膽粗粗問一問以前ANFIELD同學囝DARREN姨媽會唔會畀DARREN一齊學，佢原來一早計劃畀佢學，再誤打誤撞之下所有老師都冇時間教，但臨去台灣前GLACIER回覆有個TEACHER KENNY仲有時間教到佢兩個

就係咁，02.05.2012，AADEN + DARREN 一齊開始佢哋嘅溜冰半私人班 ^^


雋爸講得啱，教咁細個人仔，一個3歲一個快4歲，兩個都初學烏SIR SIR ..... 跌到又會喊同大叫 ..... 老師最緊要有愛心耐性，同識捉細路心理去教佢哋，技巧都係次要，雋爸媽又唔鐘意D好遷就孩子嘅老師，所以上堂前都有擔心 ....


不過經過短短兩堂，見到TEACHER KENNY真係幾好又有耐性教，最重要兩個男仔都幾鐘意佢又聽佢話，雋雋仲進步神速，雋爸媽見到都好開心，覺得冇揀錯畀佢 ....


最緊要有朋友仔一齊，人都醒D開心D .... 

兩個都冇叫冇喊過，真係神蹟 HAHAHA .....

DARREN好似哥哥，好鐘意AADEN，會拖佢手行又篤篤佢塊面 ^^

你兩個要一齊畀心機，唔好咁易放棄呀!!


02.05.2012  第一堂半私人班 -- 之前AADEN行都行唔穩，今日竟然OKAY! DARREN第一次學仲勁，原全唔似平日謄小愛哭嘅佢，兩個都叻仔呀!!!

09.05.2012 第二堂，平時扶住溜冰都企唔穩，第二堂，竟然拖住老師、再完全放開手都OK，進步好多呀 ^^  ....叻!!!

雋爸牛一 2012 .....

一年一度雋爸生日又到，今年好忙，又剛剛去完台灣旅行回來，家中瑣事又一大籮，所以都無大事慶祝 .....


其實去旅行都順道提早慶祝吖 ....


昨晚教會崇拜後同雋爸兩個人出外走走，到TST超市補貨，買外賣，坐車兜兜風 ....


今日正日呢 ..... 先同雋雋去僱傭公司辦理新/舊姐姐事宜，然後一齊買LUNCH外賣，他午睡時雋爸媽又偷走外出AFTERNOON TEA .... HEEHEE .....

原本想到喜歡的淺水灣THE VERANDAH，不過是日有婚宴包場，四季大排長龍又不準訂枱，所以揀了就腳又有位的GREEN@HOTEL ICON .... 

晚上再一齊外出食飯慶祝，今年生日 .... 都係不停食食食 .... :P

食得是福，又可以減壓 .... 好事!!

祝雋爸你生日快樂，身體健康，工作順利，主恩常在!!! ♥

**********************************************************************

P.S.

今次懷第二胎，食得冇上次咁好，前段狂作嘔，後段又頂心頂肺頂胃冇啖好食，所以今日咁食其實都幾辛苦 ..... 而且令我知道有得食、又食得暢快絕對唔係必然 ..... 

所以以前同事講得好啱 ..... 有得食就好食 .....

怎樣可以返到天父身邊?

今晚靈修後雋問爸爸媽媽怎樣可以返去天父身邊，因為在天父那處很開心。

跟著簡單問雋，你相信主耶穌嗎？相信祂為我們的罪釘十架受死而三日後復活嗎? 又相信主耶穌的血可以洗清我們的罪嗎??

他說相信，跟著自己祈禱說感謝天父，希望可以到天父身邊。

雖然未知道雋是否真正明白，但知道雋已經相信及知道祂的存在。

一次很簡單的決志相信及跟從主 .... 爸爸媽媽都覺得很意外及感動!!!

長大後，希 望你認識主更多，更明白祂的愛，可以自己再正式決志就好了

當然，耶穌愛小孩祂會知道的，我相信天上的爸爸今晚聽到你的說話，同樣會歡喜快樂 ^^

小朋友的心，永遠都是最純真及可愛

LOVE YOU  ♥