小雋雋初生 slide show

小雋雋從天父處來到我們的家!!!

姓名：旨雋
英文名：Aaden
出生日期：29/01/2009 (星期四 / 年初四)
出生時間：凌晨...
地點：浸會醫院 (2號產房)
體重：3kg / 6.6lbs.
身長：51cm
頭圍：35cm
出院體重：2.9kg .... 第9日大去健康院已經去返3.1kg嘞 ... very good!!!
特徵：
似mama - 棕色頭髮、豬膽樽鼻、長長的腳趾及手指、肚臍型態、喊聲、咀形(baba話似我，但我覺得似baba多d ... )、眼 (人哋話開咗嘅時候...)

似baba - 眼 (人哋話合埋嘅時候... 特別笑o個時嘅香蕉眼型 ...)、眉形、長睫毛、大汗

似佢自己 - 眼仔碌碌、鐘意o都長個小咀、大耳珠、強而有力飛毛腿、肚餓/換片片/扭抱會喊到拆天 (好似虐兒咁聲 .... o係醫院姑娘已經話佢係咁 ....)、好嗲 ... 喊聲好似女仔、好似有d怕黑

傻mama 1.5小時順產感恩篇 ....

26/1 年初一：
下 晝6點幾瞓醒見紅，即刻沖涼洗頭食d嘢，然後老公陪我去浸會check吓，好緊張 ... 見冇陣痛，所以老公都唔expect我要入院住，只係叫姑娘同我做個一小時CTG ... 果然冇乜料到，之後又帶住個走佬袋返番屋企等陣痛 / 穿水再入院 ... 今日就當係一個drill 啦 ....

27/1 年初二：
仍然見紅，不過都係冇乜動靜 ... 我同老公都覺得有d古怪，我又覺得見紅得嚟又好似有d滲羊水，但唔肯定。老公話打畀Dr MO，雖然佢o係香港，不過都係放緊假，我又唔好意思，所以話睇多日先算 ...

28/1 年初三：
同 琴日情況一樣，今日老公重要返醫院巡房半日，攪到大家提心吊膽，所以老公忍唔住打咗畀Dr MO，佢叫我不如返浸會check多一次有冇穿羊水再call佢 .... 老公放工返嚟仲買埋好味點心畀我食 (唔知點解我心情好忐忑不安，好似食最後的晚餐咁 .... 仲有d upset，好似知道就快生，有d唔捨得咁 ... 好古怪)。沖涼洗頭後、下晝成4點幾終於出發去醫院，去到有另一個孕婦都係同我差唔多情況，係第二胎，剛check完真係滲咗羊水又冇陣痛，佢老公係christian、叫聰哥，佢好好人，一路同我哋傾計又同老公分享經驗，好開心!

其 實新年好多人冇入院，d nurse都話算唔忙嘞，不過都等咗成半個鐘先到我驗，一驗就知龍與鳳 .... 緊係滲緊羊水啦，我呢個mama真係傻傻吓，姑娘即刻叫我辦入院手續，心情更加忐忑同好緊張呢!!!! 不過d姑娘好好人ah，係真係好好，都唔知點講 .... 肥mama姑娘一路拖住我又同我講笑、等我冇咁緊張呢 ...

Dr MO 話穿咗水就要催生嘞，因為已經第三日，唔出個B驚會有感染 ..... 佢吩咐姑娘幫我塞粒藥，睇吓會唔會有陣痛，另外又再做多次一小時嘅CTG。6點幾Dr MO嚟到睇我，當然冇動靜啦，都係開咗一度 ... 但係一d痛都冇。佢叫我食個light dinner，然後今晚最遲9點要幫我催生，唔好拖咁耐 ....

食完飯冇耐拆咗機就要去待產 室，好唔捨得嘅感覺，又有d驚驚添 ... 9點半姑娘幫我打黃豆落antibiotics，因為都係驚BB會感染，老公一直o係身邊陪住我，開始有好輕微痛，不過一路提自己要用多d腹式呼吸 (瑜伽老師話可以減痛一半，所以點都要做 ...)，咁又好ok，頭一個鐘都冇乜事、亦唔駛用笑氣 ....

好似約10點都冇乜大 痛，姑娘提議打一支止痛針，係可以等個人relax d、咁樣個子宮亦可以開快d ... 老公叫我打，咁就打啦。然後姑娘嚟話要幫我穿水，因為太耐都未穿 .... 真係痛到我痴線，我都忍唔住叫咗句"好痛ah"，唔識講 ... 痛入心，即時d暖暖嘅羊水就流咗出嚟嘞 .... o個一刻我知道 ... 我好快會生、我哋會好快見到阿仔，個心祈禱要開快d、痛少d、快d完成任務 .....

10點半推我入2號產房，差唔多11點 Dr MO都返咗嚟，姑娘仲好似再加多d催生藥，Dr MO見我都好似冇乜嘢，仲話我痛得好斯文又唔係好叫痛 ... 其實唔係，當時好快就開到3度，真係感覺到幾痛，除咗腹式呼吸我仲要開始聞笑氣嘞，不過我同vally一樣咁理智，我只係畀自己每次聞笑氣時只可吸4-6 吓，唔可以聞咁多，因為唔想自己好wing咁 .... 老公換咗衫入埋產房陪我，一邊鼓勵我又一邊幫我計時，當時平均每兩分鐘就痛一次嘞，到11點幾痛到我手都震埋，姑娘就叫我唔好咁樣聞笑氣，佢話d人痛到話 d笑氣止唔到痛係因為用錯方法，佢叫我一痛就大力吸、一直吸到覺得唔痛、唔好慳住只吸幾吓，咁樣我會好辛苦。

我一路聞但d痛一路多咗好多 好多，姑娘見我咁辛苦都諗係咪咁快嚟料、又幫我check吓，原來話咁快我已經開到7度幾8度，老公同d姑娘話好叻呀，叫我繼續努力，同時都幫我減返好多 催生藥，因為都冇乜必要再落，另外又再call返Dr MO入產房隨時幫我接生。o個刻真係痛到典床典蓆咁，又唔畀我用力，我又冇晒力揸住個笑氣罩、要老公幫我揸，條腰就好似wendy話畀人打斷咁痛、對腳因 為d止痛藥又麻痺晒，唯一好係我之前聞好少笑氣所以個人仲好清醒，只係有少少暈船浪feel，同埋超級口乾(已經兩個幾鐘冇得飲水....)。Dr MO入嚟睇我，佢竟然仲笑我話我終於識得叫吓同叫痛、不過仍然好斯文同唔夠癲 .... 激死我，但係好消息係佢話生得，估計用10個cycle 啦，但同時要攞走樽笑氣 ... 好痛，我o個刻真係好佩服以前d人點生仔，因為冇咗止痛藥真係痛到好似畀人殺死咁、又好似有一舊超大石頭要爆出嚟咁、仲要o係你個肚裡面不停轉，我都唔知 點形容 .... 總之呢種痛，應該係超越咗10級 ....

要出力嘅時候到嘞，但係個人都痛到軟晒，大家估我有機會28/1 2400前生到個BB，不過到最後唔夠氣用多咗兩個cycle ... total 我用咗7-8個cycle 生咗小雋雋，最後睇鐘已經係 29/1 凌晨 0時xx分嘞 ....... 一個小生命就係咁誕生，莫名興奮 ....最感動係雋雋個頭仔一出嚟就已經識喊，一直喊喊喊 ... 喊到出晒嚟抱埋去另一邊床幫佢包住都仲喊，係姑娘抱咗佢埋我身邊就冇再喊嘞，佢真係會認得我嘅心跳聲、所以會變得安靜，好開心、好感動，老公第一次見到同 接觸到自己個仔都好感動。當然姑娘有幫我哋影好多BB相同全家福啦，不過好快就要抱走BB，等我出埋胎盤後老公又要先離開產房，得返我一個同d姑娘o係入 面，好掛住佢哋ah ..... 成晚好hyper，唔係好瞓得著，好想快d見到BB同老公 .....

學老公話齋，原來我咁忍得痛 同埋咁大力，未試過真係唔知。生完o個晚我同老公講我下次再生就唔要順產、因為好痛好辛苦，不過瞓醒第二朝已經好似唔係好記得o個種痛，又覺得ok、下次 都可以再嚟過。但點都好，一個小生命能夠o係肚裡面孕育成10個月、仲一直陪住自己成長，最重要係佢可以好安全好健康好正常咁出世，呢一個真係天父最大最 大嘅祝福，亦係最寶貴嘅禮物，雖然過程好辛苦好痛、但亦有好多開心好溫暖同值得回憶嘅時間，我到最後仍然覺得係值得，我好感恩神讓我呢個不配嘅人能當上 mama、擁有屬於自己同老公嘅孩子、更重要係天父讓我哋成為佢神造人計劃當中嘅其中一份子，我希望我哋學得好亦做得好一對好父母，「教養孩童，使他走當 行的道，就是到老，他也不偏離。」（箴22：6），我同老公會一齊努力 ....

多 謝天父!!! 多謝佢聽祈禱唔駛我痛咁耐又生產順利 ....... 多謝為我哋祈禱的所有人、多謝每個人的祝福及禮物、多謝浸會醫院幫過我哋嘅姑娘，佢哋真係非常之好，仲有係多謝Dr MO & Dr LEUNG、仲有孟搏士 ... & Dr MAK (雖然最後唔係佢幫我接生 ... )。

天父真係安排咗好多天使o係身邊幫我哋ga，好感恩!!!

心の孕照 by Boogie (Part 2)

痛入骨 ...

痛到入骨，終於可以理解到 .... 前幾日一直耻骨好痛，星期三冇咁痛，就即刻出吓街食飯，食完都係o係Citysuper打咗個白鴿轉買d生果凍肉，o個晚都好地地 .... 不過唔痛嘅日子都係好短，星期四又開始好痛，琴晚同今朝又係痛到幾乎郁唔到咁滯，或者郁一郁就痛到大叫同標眼淚 .....

呢種 Hormone真係好強勁，老公講過個名我都唔記得嘞 .... 小雋雋可能又轉低咗啦，好明顯見到個肚仔係座低咗咁ga，老公話都真係似隨時生得，不過個人意願就想小BB 7/2-9/2 先出世、因為醫院太多人攞annual leave、所以老公 7/2 先正式放到假；但係見到我咁痛，有時又想早少少。算啦，都唔係我哋可以預測同決定，都係要睇天父要小雋雋幾時出嚟，不過唔知骨骨痛嘅時間同程度可以少一d 呢? 都真係攪到冇晒心機、又要成日瞓o係度 / 坐o係度，好悶ah ...... 好在之前都將d嘢準備得 7788，如果唔係宜家行動不便都唔知點算ah ....

老公，你估我到時加埋陣痛嘅話，我仲可唔可以行到呢?? 不如你班定一張wheelchair 返嚟畀我以備不時之需可能會好d呀 .....

多謝Boogie琴日專登攞隻DVD畀我，係佢幫我影嘅懷孕相，wow原來影咗成三百幾張，好多ah，另外有一批執過嘅相都成60張，睇到我眼花，不過真係好開心、同埋好多謝佢呢份禮物。琴日行唔到，所以都係要工人落去攞 .... 有d唔好意思呢 ...

聽到心跳嘞 ....

其實次次產橡都會聽到小BB心跳、的確冇乜新奇，琴晚咁開心係因為老公用聽筒試聽BB心跳，yeah終於聽到嘞 .... 因為去診所係用 doptone 聽、係可以將d心跳聲放大好多倍、易聽好多，但一般用聽筒就可能要36週後先可以聽到，仲要睇埋當時BB係乜嘢位置。之前試過聽唔到，琴晚終於可以好清楚 o係肚仔右下方聽到ah，好開心、感覺好得意、好近ah ......

呢兩三日冇出街，耻骨好d、但都仲好痛，但起碼慢動作轉到身、同埋行吓、執吓嘢都ok lor .....

痛死我同嘈爆嘅一日 ....

琴晚 ... no ... 應該係今早凌晨5am又起身VV，耻骨都痛、但都習以為常。去完返去瞓，知死嘞，一瞓低舊耻骨痛到我想死、今次係真係痛到我標眼淚，嚇醒咗老公、佢仲即刻 問我係咪生得，因為我真係好慘叫，我都未試過咁ga，係痛到瞓唔低又轉唔到身，就係咁，我就坐o係張床坐到 0730am .... 冇耐老公都起身，然後一齊食早餐，食完，好似冇咁痛、又好攰，所以都要去瞓，但都係轉唔到身，一郁就痛到死 .... 好灰ah ...

可 能太攰嘞，我可以瞓著、連老公返咗工我都唔知。但係安睡嘅日子亦唔長久，去到十點幾，我都要醒 ..... 係畀人嘈醒 .... 其實我已經好勁，因為我唔係九點幾即時醒，我都好佩服自己 ... 真係好似隻豬 ....... 係邊個嘈醒我ah??? 係支風砲 ....... 係風砲ah .... 即係o係街人哋爆石、堀地o個d風砲 ah，我就係一路畀人o係我頭頂o係到爆爆爆、轉轉轉足成5-6hrs，我想死 ....帶咗耳塞、開住30幾volumn Hi-Fi聽Mozart都抗衡唔到d咁癲嘅噪音 ....好想喊，又忍唔住o係間屋癲咗 大叫，剛好老公買lunch返到嚟、佢一開門就聽到我叫嘞。佢話一上平台已經心知不妙，不來嘈到o係平台、大堂都聽到，知道係二座，但唔知咁近我哋，老公 返到嚟都慶慶哋，因為大堂同lift都冇出通告知會大家，如果mgt. ofc.早響我就走出街啦，唔駛o係度受罪咁。跟住老公上咗10/F睇，一開lift門已經係d 地磚爆到爛晒、再睇，係全層地磚都爆開，落樓下管理處問阿姐，佢只係話d地磚唔平有危險，所以要爆晒再鋪過，但話唔可以叫佢停，老公話好擾民、又唔事前通 知，根據法例，就算佢哋o係限定時間咁做，但只要係騷擾到人、都係可以報警，可能因為咁、老公上返嚟就停咗一陣，估計阿姐通知咗mgt. ofc.。以為可以食吓飯、安好一陣，食咗幾啖又爆過，我哋覺得自己好似街上嘅石屎地畀人爆開緊咁，老公又打去mgt. ofc.，我又打去鬧多次，都係咁，好官腔嘅答案，但知衰、因為佢哋真係冇出notice 知會住客，啞口無言，大家都聽唔清楚大家講乜，佢話上嚟同我講、我話唔駛，因為同一時間老公已經打咗去報警 .....

報警時阿 sir都係畀上面嘈到聽唔清楚講乜，到d警察叔叔嚟，就爆到細聲咗一半，不過事後阿sir打嚟畀老公話其實佢哋o係平台已經聽到、好嘈好得人驚，擾攘一 輪，老公叫阿sir同佢哋講大家各讓一步，唔該佢地停30-45mins.、等老公可以帶我出街，話夜d先返，話佢哋攪到個大肚婆喊晒、好精神困擾。 sighs ...... 我就係咁畀人轟轟轟轟轟 ...咗咁多個鐘，好無奈，好癲 .....

3:45pm係去Dr MO度產檢，終於有個地方可以去避一避。37週嘞，Dr MO話小雋雋好乖，仍然係保持o係枕前位、pa 咗o係度、係好生嘅位，個頭落咗d，已經落咗5份3 嘞，同埋佢做盆骨檢查已經摸到小雋雋個頭頂，個位都幾低，佢又話我個盆骨幾夠位又夠鬆 (所以耻骨又咁痛lor，希望到最後我唔會痛到要揸腳架行路啦 ...有d人真係會痛到咁ga .... )，而小雋雋size亦都會適中唔太大，佢都估我唔難生wor；所以可能隨時都有機會生得，叫我準備好嘞 .... 好緊張添，愈來愈近嘞，希望天父保守BB同我都一切正常，生產順利又平安啦 .... 感恩係今日見到小雋雋冇再畀臍帶纏住，因為上次好似有一圈，希望佢繼續乖乖唔好反斗，唔好臍帶打圈，咁樣mama就可以將佢順產出嚟見大家嘞 ..... God Blessing!!

心の孕照 ... 又多幾張 ...

http://www.slide.com/r/KNet0N7Oyz_2mEZ4KUsNr9LSlGb5zDZQ?previous_view=lt_embedded_url

Boogie今日又send 咗d 相嚟，今次佢upload 咗d相上佢官方網站bor .... Boogie-Capture Life (d 相我都upload咗上Facebook la ... )

其實上星期六影咗好多好多張相，唔知Boogie幾時整好呢?? 有d心急添 ... 宜家咁好吊癮ah ....

36週 ... 進入倒數階段la

時間真係過得好快，特別係懷孕後期，愈來愈有唔捨得嘅感覺 .... 唔捨得個"橙"，就係我個肚仔，好攪笑，成日同老公都覺得似個橙咁，Boogie Heidi又話"立立令"咁好得意，haha ... 係40吋嘅橙ah，真係冇乜機會係咁嘅樣呢 ....

不過對新生BB出現嘅感覺亦都好強烈，愈來愈近、愈來愈真實，有d緊張添ah ....

耻 骨係勁痛、特別係瞓完覺 / 坐得耐起身，冇warm up就係咁，郁開就冇問題；琴日同今日又試過突然唔痛、仲健步如飛，感覺好古怪 ... 不過當然係唔痛好過痛啦，但都係d hormone影響、又關小BB個頭落咗去事，所以我都控制唔到。總之，呢兩個星期我已經痛到做唔到yoga，因為好多動作都令我好痛，只可以自己o係屋 企做d簡單嘅 stretching .....

仲有係皮膚敏感，之前都試過、我講嘅係o係塊面，可能呢幾日好dry又好凍，所以又差d，痕屎人ah .... 以前未有BB都冇咁敏感ga，希望生完又係會好返啦 .....

今日Boogie send 咗其中幾幅相畀我睇住先，其實佢d構圖好好ga，我哋都好鐘意。heehee .... 只係個主角 ... 即係我 ... 有d問題，學孟博士話齋醜樣咗ma，仲咁後期先影，我呢個mama已經係一隻小肥豬 ... 特別係塊水腫面 + 水腫眼 + 水腫鼻，加埋有d混亂嘅頭髮，唔係嘅話應該會更加好，希望唔會嚇親老公、Boogie、同其他人啦 ...

但係第一次懷孕 ... 又真係值得影低d相做紀念嘅，第日畀小雋雋睇，我諗佢都會覺得好得意 ...

今次老公真係粉墨登場，連開工衫都攞埋返嚟陪我影相，全套武裝咁ah ...
仲要多謝Michelle o係日本買嘅Adidas BB鞋，得意之餘仲好襯今次影相d衫，多謝!!!

心の孕照 by Boogie

今日好開心又緊張，因為我要o係一個咁嚴寒嘅日子去影懷孕寫真，雖則o係室內、但係club house d冷氣勁凍，熄咗都仲好似好寒咁，大家又驚我冷親，所以攪到我都有d緊張 ......

十二點幾先同Boogie Heidi一齊o係宇晴軒飲茶，然後兩點就去咗會所 ，Boogie Heidi就 set up，老公就騰嚟騰去、又返上樓攞自己部相機、跟住又上去攞部暖風機畀我吹、最後又跑多次攡恤衫 (因為Boogie 叫我著白恤衫，我攞自己o個d，但係佢係想我著老公好大件o個d，所以又摷咗一輪 ... ) ....

呢 個club house 都幾攪笑，租親宴會廳都會送一大碟三文治 + 一壺咖啡 + 一壺奶茶 + 一壺水，所以我哋一路影又一路有下午茶食。影影吓出面BBQ樂園有人燒嘢食，好得有兩層捲簾，所以都唔至於畀人裝到晒 ... 但係房有CCTV，所以都預咗可能有職員睇到，不過算啦，有著衫，換衫都係有打底皇 + 呢埋o係Boogie d 黑布簾後換，所以都問題唔大 ......

Boogie有個賢內坐Heidi 做佢小助手，set up、試位、較燈好熟手，完全冇難度，最唔好意思係佢做埋我小褓母，一唔影就攞件大羽絨畀我著、又畀暖水我飲、又要一齊引我笑同教擺pose，認真照顧周到ah，多謝晒!!!

老 公o係Boogie幫我試位試燈光時又古靈精怪影埋一份，構圖實冇人咁好啦、d位都攞唔正，不過都好多謝佢影咗d snapshot 囉，特別鐘意同Heidi 影o個張，老公 ... 你進步咗好多ga la，加油、繼續努力練習ah，希望經過今日你畀專業人士指導完一輪之後會影得愈來愈好啦 ....

總結 .... 開心的一天!!! 再次多謝 Boogie & Heidi!!!!!!!!
仲要多謝老公專登走去買嘅花花 .... 係我心愛嘅馬蹄蘭，多謝!!!!!