雙滿月 ...

成日以為329係雋雋雙滿月，因為佢係129出世，原來到今日先係雋雋8週大嘅日子即係兩個月大嘞，時間真係過得好快，多謝天父保守雋雋健康活潑又精靈!!!

今日係第三次去健康院，又要打針啦，不過雋雋好叻 ... "er"咗兩聲就冇再喊，完完全全遺傳咗mama唔怕打針又唔怕抽血嘅好因子，叻仔!! 雋雋雖然只有兩個月大，但係d nurse已經話佢好似個3個月大嘅BB咁：

身長 - 60.5 cm (75 percentile)
體重 - 6 kg (75 percentile)
頭圍 - 40.8 cm (90 percentile)

雋雋長條咗好多、出世時係51 cm (希望你大個咗仲高過baba啦...)，體重就3 kg，頭圍就36 cm樣樣都增長咗好多，全靠天父畀mama有d優質母乳餵畀你先可以快高長大ja ....要感謝天父ah!

hee ... mama都要多謝你，因為你，mama先可以瘦得咁快ja ... 不過就變咗隻國寶咁lor ...

好轉

用咗肥虎開嘅藥膏好咗好多嘞，費事影響雋雋關係，一日只可用一次，藥力強勁ah ... 不過mama都會繼續食用同外敷中藥，因為中醫係治本同調理，希望皮膚情況會受到控制 ...

至於份驗血報告都出咗嘞，我係對所有塵類、塵蟎都有敏感反應，個range係47.8 -- very high level，唔通我真係避無可避要買部有HEPA filter嘅空氣清新機??

雋雋返崇拜 ...

今早第一次帶雋雋返崇拜，新手baba mama好"le hea"，遲咗、雋雋又扭眼瞓，所以全程都好唔專心、聽唔清楚司徒講道講乜嘢 .... 繼續努力，希望下次會好一d ....

如果可以選擇 ....

我之前話著唔返嘅skinny jeans，今日竟然有一條新d嘅竟然著得返、雖然有少少"鑑粗嚟"，起碼扣到鈕又過到個盆骨，舊d o個條就真係唔得，所以好驚喜 ....

不過可以選擇嘅話，我會希望面面嘅濕疹冇出現過。今日係第2次去見黃醫師，琴晚開始又紅多咗又痕多咗，面積又大咗，成個人又好熱咁，好辛苦好唔開心ah ... 初時佢擔心我紅斑狼瘡，不過老公話佢知我以前驗過升血冇呢個gene，所以就排除咗呢個可能性 .... 老公問佢我可唔可以好返，黃教授話其實佢見過好多孕婦產前產後都有咁嘅情況，有好多仲比我嚴重好多，中醫係重調理、係會慢少少，但只要過一段時間係會ok嘅，宜家因為我仲餵人奶，所以好多重d嘅藥唔可以用住，所以時間又會長d lor .... 之前孟搏士都有講過，開好多藥都會遷就返我要餵人奶嘅需要，但係食完個人就真係冇咁熱lor .... 有好多人/醫生都話餵人奶唔好食中藥，因為驚會影響BB同d奶會苦，不過經過呢個幾月係咁食中藥、仲係勁苦，但係雋雋仍然好喜歡食人奶，而且BB亦一d影響都冇，孟搏士佢哋直情好有信心話中藥對BB都有益添；但係係因為佢兩個ja，如果睇其他中醫我同老公都唔敢試，真係信心問題lor ....

老公見我唔開心，又打咗畀肥虎，睇吓佢知唔知邊個derma.有得做skin prick test又睇eczema係好嘅，跟肥虎就叫我地去CSB佢clinic睇同驗血，驗血就可以測試晒我對乜嘢敏感，希望揾到致敏源再對症下藥，但好貴 ... 成二千幾蚊，另外又開d靚d嘅steroids同抗敏藥畀我，肥虎又係話佢都醫過好多係我咁嘅case，都口9呂知點解，可能係氣候/溫度轉變、有致敏源　同埋好多時係產前產後 + 餵人奶d hormone變到七彩又亂晒龍，所以會有eczema .... 肥虎知我性格，知我會好唔開心同唔適應，緊係啦，平時咁貪靚，呢d咁嘢真係想死ah....

多謝佢哋嘅幫忙，更加多謝老公唔去上堂陪我周圍去睇醫生，我知佢好攰ah ....

今日唯一開心係買咗新衫同鞋畀小雋雋，係我揾咗好耐、花子姐姐都幫我o係日本揾又揾唔到嘅綠色Converse canvas，今次係美版、原來仲舒服過日版d Converse ga，仲揾啱條scarf畀雋雋，係Edwin ga、一千0一條logo scarf，等mama遲d買埋tight pants畀你襯，一定會好型 !!!

生仔變有濕疹...

終於告別用咗兩年0三個月嘅xanga、專心留o係呢度寫吓嘢嘞，其實都唔會好多時間成日寫，因為宜家生活上真係有好多轉變，有咗小BB根本連上網時間都少咗，寫網誌就更加少之又少啦，今日係雋雋比較穩定 (由食rotarix疫苗後日日肚痛、到呢幾日d食奶同瞓覺時間又亂晒龍，又胃液倒流啦，所以成日喊又扭抱，我同老公都攰到七彩 .... )，所以我先可以又online一陣，仲要婆婆隨時stand by幫手治吓呢個小霸王呢 ....

人哋成日話女性生BB有多嘢要犧牲，自由同時間就係首當其衝，不過對我嚟講最唔開心係皮膚敏感，由有咗BB開始就已經有d皮膚敏感，到第3、4個月開始眼皮又會無啦啦痕、紅、同腫，跟住又到面額，斷斷續續咁、又好又唔好吓 ...好困擾。到生完BB o係醫院o個幾日係完全乜事都冇，老公都話生咗應該會好好多。點知一返屋企後又開始斷斷續續皮膚敏感，又係痕、紅、同腫，好好好好好 ..... 唔開心又辛苦，個人已經好攰，都唔知理得邊樣。去揾Dr Tsui，佢都係叫我停咗d 用開嘅skincare、只用Aqueous Cream，但都係時好時唔好，沖完涼/一熱/轉天氣就會發作.... 我去孟博士度，佢話我原來係上火、肺虛風燥，好多嘢 (包括人哋產後要食嘅 / 進補，通通我都唔可以食 ...)，飲咗佢d藥的確好好多，但係皮膚都係唔可以回復原狀 .... 終於忍唔住又要睇埋黃霏莉，佢係勁多人睇 ... 係浸會中醫內睇皮膚最好最叻嘅，不過好難book到。好感恩畀我後補到一個期去睇咗，佢話我又係好熱、不過d皮膚紅腫位已經變咗做濕疹，我自己都冇乜信心可以斷尾 ....好灰ah .... 係無止境咁痕，好煩 .... 不過就好體會到老公又細到大有濕疹o個種痛苦。黃教授開咗d好苦好苦又好黑嘅藥畀我 + 外用"fu"面用嘅藥，係好似好d，老公安慰我話會斷尾 .... mmmm 我都唔知ah，估唔到有BB都會攪成咁ga bor，o係有d人話內分泌失調會引發濕疹，加上我又有鼻敏感，所以都係有d玄機ga la .... 求天父畀我快d好返啦，仲有老公嘅濕疹都係，希望佢少d翻發啦 ....

唯一好感恩係，我哋有BB前一直祈禱，因為我同老公都係"敏感高危一族"，好怕會連累咗雋雋、會遺傳畀佢，我求天父 寧願我有事都唔好BB有事、辛苦都留畀mama一個受就夠嘞 ... 終於 ... 結果係雋雋真係冇乜事，對奶又冇敏感，暫時各樣都ok，而皮膚敏感呢part ... 又的確由mama受咗 .... 算啦，雋雋健康就夠嘞，希望mama情況會好d啦 ....

出世紙 ...

今日係baba幫雋雋攞出世紙嘅日子，雖然要畀$140、另加copy又畀多$140，但總好過浪費時間去排長龍輪籌，之前網上又預約唔到出世40日內嘅日子，緊係啦，畀d大陸炒籌黨攞晒d期ar ma .... mama知baba好忙又好趕，所以好多謝佢咁辛苦為雋雋撲來撲去 ...

近一、兩個星期雋雋條頸有力咗好多，成日擰來擰去，又發出yi yi yo yo、he he ha ha ...好多古靈精怪聲，自己又成日傻笑、有時又望住我哋笑，好得意!! 雖然有時佢好百厭，不過一日一日睇住佢長大、改變呢種經歷同感覺其實係好好、好幸福，呢d時間好快會過去，今日看似冇咗好多私人時間，不過將來又會好唔捨得 ... 就好似懷孕嘅日子一樣，所以都係要好好珍惜 .....

多謝天父畀我哋去學做baba mama、有新體會、有新經歷 ...

又去TST ...

雋雋敢死隊今日又想去街，本來想去YATA，但太晏，又去咗TST。今次去咗行海傍，本來想返HKCC探同事，但後來baba要醫肚同雋雋又喊 ... 唔知點解架車一停o係度唔推就會喊，又餓啦，所以出咗個幾鐘又要折返 .... 今日最大發現係，我2005年手上有二十幾張新世界車飛，係o係老yip度做時、去HKCC rehearsal攞嘅免費泊車飛，oh ... 竟然仲係有效可以用bor，真係好開心!! 我諗呢個係老yip一族對我唯一嘅貢獻lor ...

第一次去TST ...

(望住Anpanman同天空，非常之新奇咁 ... )

今日baba mama第一次正式帶雋雋去吓街，雋雋亦第一次坐佢o係baba架車嘅car seat，真係好唔容易先攪得掂，因為呢張係Chicco 0-4m用嘅，唔係infant carrier，好難將佢擺得啱位 .... 攪咗好耐，我哋有d後悔，因最初都係想買Maxi-Cosi，因為係最好最安全、又有Iso-Fix，可惜有Iso-Fix嘅都係9m以上先用得。點知呢張所謂0-4m、其實都有d難度 ... 擾攘好耐，去到先醫肚，再周圍行行逛逛又要走嘞，因為雋雋小王子好肚餓又喊到拆天，而且又到沖涼時間，所以今日行程非常之短，但對新手1嘅我哋總算係個新體驗 ... 有驚無險 ...

累透 ...

今日非常之咁疲累，因為冇覺好瞓 ....

事緣Dr LEUNG話雋雋又重到5.23kg 嘞，去到75%重、大隻咗好多，其實都冇補奶粉乜滯，都唔知點解咁重手。o係clinic時雋雋又好似阿叔咁hee hee her her聲，原來Dr LEUNG話呢d係胃液倒流聲，雋雋個胃消化唔切d奶成日倒流，唔怪得佢有時o係鼻度流返d奶出嚟，有時食奶又典來典去又喊、谷到紅晒，應該係d胃 液"yip"住令佢好辛苦。Dr LEUNG話佢有時食完奶喊其實唔係唔夠飽，佢話我只係餵佢食人奶已經非常足夠，佢喊以後唔好再補奶畀佢，仲要定時餵 (其實我都係2.5 - 3hrs餵，一般都好regular嘅 ...)，然後食完 + 掃風後仲要抱佢多半個鐘先好放低雋雋，連張床都要調較到斜d畀佢瞓 .... sigh ... 一向唔係好想抱住佢瞓，不過宜家咁都冇辦法，而事實實行咗兩日之後佢d hee hee her her聲 / 有時食奶又典來典去又喊、谷到紅晒情況的確少咗好多好多，但就抱到我人都癲、隻手有d癱癱哋感覺，琴日老公on call得我一個湊佢、仲要全日埋身餵人奶，我真係有d虛脫嘅感覺。半夜三點幾佢又唔知做乜換片後醒晒，仲極之精靈，又扭食又扭抱 ... 但根本唔係餓，因為餵時又唔肯食，根住抱佢瞓又踢死你咁，Mama終於又忍唔住喊嘞，因為真係攰得好緊要 ..... Baba好擔心，半夜見有空檔o係醫院飛車返嚟睇我，又幫手抱咗阿B好耐，我知佢都好攰，到佢想瞓一陣時醫院又有個急症急call佢返去嘞，好對唔 住，Mama真係覺得自己好冇用ah ...

雋雋你出世時得3kg，出院就2.9kg，第9日又去返3.1kg，3/3就4.82kg，14/3又去到5.23kg，好重ah，Baba Mama睇返你初出世個樣好細好得意，一支30ml奶都係飲到一半ja，好懷念ah ....

不過快高長大都係好嘅，但要求天父唔好畀你超重lor ...