Visit Vally's new apt.

終於等到有機會去Vally嘅新屋，又可以探好耐冇見、又已經9個月大嘅玥殷，雋ba ma好鐘意佢哋嘅新居 .... 因為有個好靚好平靜嘅海景 (唔係市區見到o個d，成日好多躉船o係前面阻礙視線 ... 呢到真係得個大海面 .... )，對到正一正又係中文大學，望住成個人都心境舒暢好多，學fung fung sir話齋，如果第時阿仔阿女入到對面呢間U都真係幾唔錯ga ....

雋雋大個咗，冇以前咁定，反而見到陌生人、去陌生地方有時會喊，今次就係其中之一，一入屋就喊，但呢個人仔一見玥殷姐姐又笑 ... 可惜玥殷見到雋雋弟弟係喊 ... 咁係代表乜嘢呢??? kakaka ...

仲有係一放佢上玥殷張highchair度又傻笑 .... 睇吓佢仲淚盈於睫ga ...

好快又喊 ....

又畀mama整蠱 ....

Vally，多謝你今晚嘅晚餐及款待，希望下次再有機會去你 / Wing / 雋氏屋企一齊玩啦 ....

雋雋的第一次 -- 淺嚐第一口糊仔

其實Dr LEUNG話滿6個月先開始，不過應Vally Mama嘅呼籲、話畀少少適應期雋雋，加上阿仔近個幾星期食手/其他物件情況愈來愈嚴重，有時見我哋食嘢又會yell，雋ba ma知道佢好需要有口腔嘅感覺，最明顯佢呢3 日少咗排斥奶樽，因為佢會好用力咬個奶咀 (即係主打都唔係飲奶 ...但佢後來都肯飲埋嘅，全靠轉咗用Medela嘅樽，因為個咀係超柔軟，所以比較肯飲，但都要係人奶 .... )，唔知係咪就出牙仔呢???

所以今日適逢22週，所以雋ma畀雋雋試咗佢人生第一茶匙米糊，佢都ok，不過試兩三啖就有d不耐煩，所以都係好快要餵返奶 ....

其實一切都係畀佢學吞嚥技巧先，不過見佢一樣一皮嘢咁改變，佢真係長大得好快，baba mama好唔捨得 .... 特別係每日都照顧佢嘅雋ma，呢種感覺更加強烈 ....

71冇得遊行 ...

雋ba on call ... 今年落空，冇得同雋雋一齊去體驗一吓遊行 ...

隔離屋賣咗盤嘞，好似有對young couple會搬入嚟，希望唔會大興土木啦，唔係雋雋同雋ma都唔知點算 ... 最怕嘈、又怕大塵，如果真係 .... 我諗我會想暫時搬開會好d .... haha

好悶呀，雋ma好耐冇聽concert (對上一次已經係10月同花子聽LA Phil.，再之前就有King's Singers Concert囉 ... 當時都係佗住雋雋聽，幾開心!!! )，講嘅係classical concert，好需要有d好嘢洗滌吓心靈(免得過又有選擇都唔想聽港樂 / 小交，費事聽壞對耳 ...... ) ...... 有d沉悶，聽歌多返又技癢 + 身痕，有冇新樂器畀我玩?? 又有冇choir可以唱??? 又或者有冇敬拜隊/樂隊可以join???? 好想jam歌 .... "司琴高娃"已經蠢蠢欲動好耐嘞!!!!!!!!!

收到BU 校友季刊，cover story係專訪Mus Dept，仲主打係講、及向老yip致敬，好想屎、好矛盾，Mus Dept冇佢冇今日，但係打過佢工，真係又係另一回事，人都癲!!!!!! 佢咁認真(唔知係咪做場戲...)，有d想嘔嘅感覺 .... 見佢都成80歲，亦都勁愛錢財又多多口水講唔完，算啦，佢唔化，我哋個個都要化 .. 對於呢位浸浸浸浸浸浸浸聯會執事 + 大音樂家，有尊重嘅，不過如果雋雋 / 身邊朋友仔女長大後，都唔會畀 / 建議讀佢d音樂班，因為已經變晒質，亦唔係佢當年後生時親自教授嘅質素 .... 衰衰哋o係公、私營+教會音樂圈都打滾咗7、8年，都見盡人情冷暖，仲好多貪$$$$$大話精，真係各有各衰，一d都唔artistic，所以真係要帶眼識音樂機構呀 ....

21週要向上爬 ..

自從雋雋發現自己可以隨意向左碌之後，佢就由朝到晚、無論有冇人o係佢身邊都o係度不停碌 ... 好攰ah，連餵奶、沖涼、換尿片時都係咁，捉都捉唔住，又大隻wor，係抱 / 捉佢到攪到手軟，仲有就係雋ba ma張床、雋雋嘅床同BB車都係畀佢碌到亂晒籠 .....

唔明佢點解唔識碌右邊，今日o係咁意協助佢去右邊，oh!! 原來佢係識碌去右ga，只係佢太喜歡左邊，就正如當日佢o係我肚裡面一樣 .... 唯一擔心係近幾日起身見佢又反轉咗、唔出聲自己o係度周圍望同玩，有時仲揾張被蓋埋自己個頭添，10個驚呀!!!之前佢唔夠力會大叫，宜家唔會，所以都有d擔心佢會紮親同出事ga ...

21週0幾日，佢已經到咗起碼19 lbs.，好聚手，連個頭都大咗!!! 之前頂cap戴咗一次已經唔啱、已買過一頂，不過雋ma一直又好想買頂賊仔帽畀佢，終於畀我o係comme ca ISM見到，sales話46cm夠戴到一歲，48cm去到兩歲，為咗想佢有得快d有得戴、咁當然係買46cm啦，點知返到屋企一試竟然係剛剛好，睇嚟 ... 呢頂賊仔帽都 .... sigh ....

而雋雋少爺最新玩意係 ... 爬 ... 冇錯o係張床亂咁向上爬吓爬吓，學習階段中，尚未完全manage到對手腳，個頭仲成日唔夠力"hum"落床 (試過o係地蓆玩"hum"到個額頭紅晒，所以暫時唔敢再畀佢o係地蓆最呢個動作 ...)，張床單就滿佈口水漬囉，真係服咗佢，不過baba mama 都好欣賞佢咁努力、同埋不斷嘗試(其實係貪玩 ...)，最重要係唔怕痛，點撞都係繼續玩唔停，反而baba mama畀佢嘅鐵沙掌同埋飛毛腿攪到好痛ja ...

前所未有咁少人嘅嬰兒房 ...

今日返早堂，全因豬仔流感，好多人冇帶小朋友返教會，今日嬰兒房連埋雋氏先得11人、共4個families，前所未有試過咁少人，好有空間感同寧靜好多，最開心係雋雋好快瞓咗，雋ba ma終於可以安靜地聽阿司徒講道 ..... 不過佢d笑聲同講嘢聲好大，嚇醒咗BB幾次，好得最後瞓得返 ... 雋ba話司徒以前o係U講書已經係咁，咁多年o係講道期間都係咁冇變，再加埋佢少少 Singelish，係攪笑加上攪笑，所以都幾鐘意佢 ....

雋雋，如果以後返教會你都咁乖咁安靜就好嘞，唯一可惜係今日完咗又要返屋企餵奶，之後想出去，一出車又傾盆大雨，去到TST直情要折返，最後無聊至極又o係昇仔商場嚟個白鴿轉，超 .........級冇癮，為雋ma極度唔好嘅心情又加上唔知幾多幾多幾多幾多幾多幾多幾多幾多幾多幾多幾多幾多嘅無奈、激氣、唔開心同埋落寞感覺 .......

雋雋，對唔住，今個星期日又唔可以帶你出去影相嘞 .......

亦男亦女....

由雋雋嘅4D U/S相出咗之後，先後都好多人同雋ba ma講以下說話：

BB好似你(雋ma)呀 ...
BB個樣好男仔呀 ... (咁係咪佢阿ma好似男人樣呢???) ...
BB個樣好大個/好老積/好得意呀 (點解又話似阿ma、但阿ma一d都唔得意嘅??? 點解老積又可以同得意共存??? ) .... etc.....

出世後都係講類似說話，而「BB好似你(雋ma)呀」就更加加重力度咁講啦，冇辦法個鼻實在好搶，視覺上完全兩個鼻好似原全倒模咁，係分割唔到 .... 「BB個樣好大個」都唔駛講啦，滿4個月已經好似人地8個月咁大隻，雋ba ma都係接受咗呢個事實唔係好耐ja .... (好懷念佢好baby個樣呀 ....... )

咁d人話雋雋似雋ma，咁佢又係咪好似女仔呀?? 近期o係屋苑試過好多次有d唔識嘅人，o係一齊搭lift時問雋ba ma：「你呢個係仔定女呀???」....... O晒咀 ... 滴汗 .... 明明雋雋著住男仔衫都幾smart，唔明d人點解咁問，係咪雋雋真係個樣好中性而有人誤會呢?? (但都要個問題make sense先得ga ... )

其實雋雋都好嗲ga！有時都成個女仔咁，而雋ba ma最初都好想生女，所以雋雋咁得意又嗲，可以話滿足晒我哋嘅願望 .... 為咗測試雋雋個樣似男定似女，雋ma又古靈精怪整蠱阿仔一次 ....... heeheehee ....

小小村姑look ...


雋雋同雋ma小時候似嗎???

1st Father's Day ...

雋ma 代表埋旨雋、一齊祝雋ba、雋爺父親節快樂!!!

對雋ba而言，覺得應該慶祝嘅只有母親節，因為覺得mama係辛苦過baba好多，所以都好似唔知點咁，人生第一次做baba、應該好開心，但又唔知做咗4個月多少少baba做咗d乜、好似唔駛慶祝咁 ... 好矛盾 ...

由於H1N1關係，原定今日嘅兒童按手禮無限期押後，所以今日崇拜最後都冇帶雋雋返去，交咗畀雋婆湊，雋ba ma係難得可以再入正堂崇拜 .... wah ... 覺得好似去咗另一個世界 .... 寧靜好多呀!!! 以前都唔覺好ga (因為我身邊成日有人攪事 .... haha)，自從雋雋出世後都冇試過咁嘞，真係要好好珍惜，因為唔知幾時再可以兩個一齊入去，分分鐘要等到阿仔兩歲返主日學先得嘞 ....

崇拜後兩個人先去TST食飯同買d嘢，叫做又有吓marriage time 囉，之後再返屋企餵吓雋雋，然後就近o係平台公園同商場行咗一陣、同埋接收泥氏所贈嘅playpen (Many thx ah!!!)，雋ba人生第一次屬於佢嘅父親節就o係平淡中渡過，同雋ma嘅人生第一次母親節都不相伯仲 ....

至於雋爺，本想一齊去飲茶，不過怕出面多菌，加上雋ba都唔係好想雋雋出咁多街住，最後冇去，希望遲d再出過去啦 ....

最後仲有一位係一定要多謝 ...... 就係天上嘅父親!!! 因為有袮、有袮無盡嘅愛同豐富嘅恩典，我哋先可以有今日嘅一切，同埋可以作孩子嘅父母 .... 希望旨雋長大後不單止愛地上嘅爸爸，亦都更愛天上嘅爸爸!!!!!!

雋ba EXIT exam ...

雋ma同旨雋祝雋ba考試順利同合格，希望佢EXIT到，過咗呢個專科再落第二個Sub-speciality training啦 .... 同埋最緊要係HA轉做perm MO成功!!!!!!!!!!!

Sophie the Giraffe ...

好耐冇上過Ourbaby，加上近期H1N1都唔敢帶雋雋出去玩，好似好悶咁，所以見佢有新貨返咗又上去睇吓 .... 今次為慶祝雋雋618踏入第20週，所以買咗頂cap(佢大得太快、舊o個頂戴咗一次已經唔啱 ...)、一張Bumbo Baby Sitter同埋一個玩具畀佢。

講開呢隻新玩具，之前睇網上介紹又唔覺有乜特別，不過去到現場睇又幾ok，同埋一畀雋雋睇真係兩眼發光咁，一聽埋聲就好有反應同傻笑 .... 呢位雋雋新玩伴、就係來自法蘭西嘅天然樹膠長頸鹿Sophie小姐，原來好出名，都成46歲添。初時以為佢係膠玩具好硬又好臭臭，點知雋BaMa玩過都覺得好得意，同埋陣味係好好聞，唔怪得雋雋好似玩得好開心，瞓覺又攬住佢，仲食Sophie食到好似食燒鵝髀咁，好攪笑 .... 同video裡面個baby真係有得揮 ...

http://www.ourbaby.com.hk/product_info.php?products_id=831

另外又試坐張Bloom coco BB安樂椅，好舒服，雋雋一坐落去立即收聲唔喊，可惜屋企宜家已經好多嘢，實在擺唔落，唯有試坐影幅相就算la ....

睇吓佢，嘆到呢 ...真係成個大爺咁款呀 ....

雋雋成長篇

睇住雋雋個頭仔可以愈抬愈高、時間又維持得愈來愈耐，仲有佢成日向左碌、宜家又可以好順暢咁碌完再抬頭，佢呢幾日仲想向前爬同埋再碌多一圈，真係好開心又感動 .... 雋雋好大隻好重，又成日貪玩唔肯瞓，再加上BF，其實我湊佢真係湊到都好攰 .... 不過自己每日陪住佢、親眼睇住佢長大、改變、進步，又可以成日同佢影相同拍video，o個種感覺好開心、好幸福，就算再攰、或者有時唔開心都會覺得值得 ....

我真係領略到蘇緋雲博士所講嘅 ... 如果可以的話，真係唔做份工、自己去陪、去湊仔女，就係送畀仔女最好、最大嘅禮物，因為佢哋最需要就係父母嘅愛、同埋為佢付出時間 .....

我，好感恩天父畀我有呢個機會，亦多謝雋ba在外辛勞工作，因為咁，我先可以好安樂咁每日陪住雋雋、陪佢成長 ....

以下係近期嘅精華照：

做乜打出個大肚"dum" ???

食完奶一瞓次次都傻笑 .... 好似好滿足咁 ....

救生員咁 ...


有d辛苦又好用力咁 ...


已經抬頭抬得好輕鬆嘞 ...

湊BB攰還攰，雋雋踏入三個月戒夜奶後，瞓覺時間愈來愈早，由12點幾 - 11點幾 - 10點幾，到宜家8點至8點半期間開始沖涼、食奶、瞓覺，咁雋BaMa就好似舒服少少，又有返多少少屬於我哋嘅時間，起碼雋Ma可以睇返2300無記新聞同埋聽吓光明頂囉 ... 不過有得必有失，宜家唔可以去街去得夜，係連返星期五團契都有d問題、時間撞晒，已經有好多次返唔到 (因為有時又係雋Ba on call ... )，都唔開心ga，不過短期內都可能係咁，冇辦法，唯有睇雋Ba肯唔肯自己一個返啦 (佢話唔想掉低我一個o係屋企湊雋雋wor ...) ....