雋雋的第一次 -- Oh！媽篇

雋雋5個月大開始成日會o係喊、發忟憎時發好多音，其中一種係"Oh!媽"，有時又會係"Oh! 咩" ...etc.，雋ba ma都估雋雋會唔會係講緊"媽"字呢??? 你知我日對夜對佢，每日都唔知講幾多次"媽"字，我哋每句對話同動作又會加入晒佢個名同我哋嘅稱呼，唔係只係講"我"同"你"呢d字，所以雋雋好細好細個時已經好知道自己中英文全名、同埋我哋係邊個，一講就有反應 ......

到今朝，雋雋佢又6點幾醒咗 (佢宜家一般係由9點幾瞓到7點，有時會早會遲，不過近來以早居多，完全係晨運時間 ....)，雋ba na仍處於極度迷夢狀態 .... 但係雋雋一醒嘅特點係一定會成個人反轉"pa"咗o係度，所以我哋一定要起身營救佢 .... Zzzzzzzzz

雋雋起身 = 雋ma要餵奶，所以雖然好迷夢、但都自動走珠咁去toilet、然後再去倒一大杯水灌落肚，最後先返房餵佢。雋ba一直o係床尾應酬住雋雋大少，雋ma就糊里糊塗走返入房、冇同雋雋say morning (宜家每朝要同佢講Morning!!! 咁樣佢就會由懵豬豬樣變成一張笑臉 :D ...)。唔知係咪咁佢唔開心，因為見我用背脊"得"住佢唔理佢，雋雋突然間好大聲向住我個方向叫"Oh! 媽" (佢平時起身唔會出聲講嘢ga ... .)，嘩! 雋ba ma兩個一齊呆咗幾秒唔識反應，好突然、好神奇，阿仔o係度叫阿媽呀!!! 佢o係向住我好肯定、"媽"字又係發音發得好準咁叫雋ma，佢好似o係度叫我要理吓佢囉 .... 跟住雋ba話雋雋叫雋ma呀，o個刻先識得有反應，真係好開心、好感動，呢一生人第一次有人咁稱呼自己，係自己個仔呀!!!

雖然雋ba ma知道雋雋未必係有意識咁去叫，可能只係佢聽慣呢個音、又可能知道呢個音=雋ma，不過已經好開心，感覺好得意。o係未來，"Oh! 媽"可能=其他好多好多嘢，只要雋雋有需要、唔開心、要得到某d嘢 ....etc. 都會只係"Oh! 媽""Oh! 媽""Oh! 媽" .... HAHAHA .....

今晚又多一樣，就係佢第一次成功食自己嘅腳趾 .... 呢排佢成日玩對腳，任何時候都想用手捉對腳，今晚沖涼係幫佢抹身，一個不留神原來佢用對手捉咗右腳入口，好攪笑、好好睇呀:P。最衰雋ba on call，唔係一定走去攞部機拍低佢 ....

琴日偷影嘅，因為見到好多女性都好渴望嘅長眼睫毛，令mama好想影低佢。其實雋雋眼睫毛未算最長同密o個種，不過佢眼線長，而d眼睫毛係向上翹起嘅(出世時仲係癡住o係上眼皮添，癡咗成個月，好得意 ....)，所以睇落好似成排假睫毛咁 ...

坐都懶 ...

Dr LEUNG都話雋雋懶啦，雋ba ma有時都覺得幾係ga，明明應該都坐到吓，但就自己成日玩跣低囉 .... heehee不過佢對腳好有力，成日鐘意玩腳，所以佢玩跣低嘅同時其實都係為踢腿，雋ba ma都中過招好多次啦 ... 都真係痛到入心入肺ga ...

成個大爺咁 ...

對腳開始嚟料 .... 我踢踢踢踢 ... 踢屎你...



雋ba ma好鐘意呢張 ... 係雋雋自己擺嘅pose，成個香港小姐攞獎姿勢咁，懶斯文，好攪笑 :D

一影完又踢 ...

跣低咗又成個大佬咁 ... hahaha

BB，個個都話你人仔細細、表情多多，baba mama都冇咁攪笑，點解你會咁嘅?? 不過因為你得意，令到雋氏呢頭住家多咗好多歡樂同笑聲，好多謝天父、亦好多謝雋雋你呀 ... ^.^

Auntie Anny & Celia 探雋雋 ...

認識12年嘅同學雖然唔係成日有得見，不過有乜重要事同日子當然都會出現啦 .... Anny & Celia講咗好耐要嚟探雋雋，終於可以約到時間今日嚟 .... 冇辦法，d事業型女性又要打理頭家、工作又超忙、又要打理好自己嘅嘢，所以我呢個全職mama都要好好遷就佢哋 :D

真係好耐冇見，對上一次已經係08年Anny結婚嘅時候，事隔一年多我已經變咗mama，而佢哋就10年如一日keep得咁好，連雋雋一見佢哋都係笑ga，頂住一對沈睡的眼晴都要同佢哋玩呢 ....

又係mama影嘅相，一定望鏡頭又笑得好開心 ... kaka


預祝Auntie Celia 10年1月新婚快樂，到時雋雋我已經一歲，如果早d識行畀你揀做花仔就好嘞 ...




最後要多謝兩位靚aunties嘅禮物，今日雋雋我趕住要飲奶，希望下次有機會再同你哋玩耐d ...

又出第2隻牙 ...

714第一隻牙係下顎左中門齒 ......

今次723係下顎右中門齒 ...

前幾日去Dr . Leung度打3rd dose Prevenar 先至畀醫生話佢出牙出得早，言猶在耳第2隻牙原來已經生緊出嚟，唔怪之得呢期食手指食到失控啦，加上呢隻懶惰嘅小肥牛有d懶 ... 係Dr . Leung都話佢懶ga，成日唔係好肯自己坐、又唔係好肯用手攞住牙膠 / 牙仔餅 / 其他嘢嚟咬，所以成日只係顧住食手指囉，激屎人 ....

其實去Dr Leung度另一個原因係雋雋咀邊出奶疹，都係因為成日食手指又食到和平手勢，食緊嘢飲緊奶奐係咁照食可也，d口水咪成日"yip"住咀周圍，天氣熱就衰上加衰，變咗烏咀狗囉 ....

o係冷氣地方會好好多，同埋要經常幫佢查Vaseline作防水用，咁就唔會"yip"住個咀。呢3日已經好左好多嘞 .... 唯一係條頸之前有汗疹 (其實都係熱痱，又即係濕疹類　同雋ba一樣 ... )，天氣又濕又熱加埋遺傳就真係差，問咗雋ba個paedi.同學"陳大學"醫生、make sure咁細個可以用嘅steroids劑量後就立即幫佢查，一次就差唔多攪掂晒，再加Calamine Lotion當堂冇晒事，不過呢兩日又好焗好熱，同雋雋出咗街條頸仔又作出熱痱仔咁，好煩、又好擔心，希望天父保守佢d皮膚唔好咁敏感啦，所以唔開心、疾病　痛苦留畀baba mama自己受就夠嘞，因為呢d都係baba mama遺傳畀佢，佢冇得揀，好似累咗佢咁 ....

722 書展旋風兩小時 ....

今日等雋ba放工後立即趕去書展，2hrs旋風式掃咗好多書仔、DVD畀雋雋睇、同埋畀mama講故事/唱歌畀雋雋聽。其實好多都未行，實在太多太大，不過已經成8pm，要趕返屋企餵雋雋呀 ....

是日戰利品 ....

雋ba ma超鐘意呢本書，好後悔冇買晒成set，唔知仲有冇機會去買埋其他幾本呢 ....








wow好 match，好似著左條間條泳褲咁 ... wah ha ha!!!

720 拍拖7週年紀念日@HK Disneyland

720 拍拖7週年紀念日....

今日係仍雋ba ma拍拖7週年紀念日，本來雋ba好早之前話帶埋人仍雋雋去Disneyland住兩晚，不過基於雋雋每日terrible 5-8 時段實在有點食驚風散feel，亦完全估計唔到佢呢3個小時內會發生乜事，加上小朋友咁細個o係陌生環境瞓會瞓得好差，所以最後放棄 .... 後來雋ba改咗計劃，就係o係Royal Garden "稻菊"訂咗枱、諗住o係度豪食一餐美味日本菜 .... 但係到今日中午，又改變行程，主要係因為唔捨得雋雋，同埋第一次呢個紀念日可以同雋雋一齊過都幾開心，亦滿足到雋ba原本想去Disneyland嘅部份願望，所以臨時臨急執齊阿仔嘅細軟就出發去好園玩。

今次係第2次同雋雋去玩，繼上次去小小世界，今次baba mama發神經竟然帶佢去玩Buzz Light Year + 小飛象 + 旋轉木馬三個對BB仔嚟講都頗癲嘅玩意，又黑、又嘈　又飛得高、又轉得快，但最後雋雋冇一樣係驚，真係好爛玩，雖然佢整個過程都有d豬肉湯feel，但由於對佢嚟講好新奇，所以全程對眼都係唔肯合埋過一刻 ...

今年雖然冇得嘆名菜，不過同雋雋一齊都一樣好開心，呢晚等佢瞓咗後，我哋兩個成2200先過去mei foo 800屋食晚飯、又去甜品森林買甜品食(班蘭蛋糕好好味，10個讚!!!)，雋ma自從生BB後都冇去過800屋堂食、雋ba次次都係外賣走，老闆同大女都好奇怪我點解消失咗半年，話以為我有乜事又唔敢問老公，好攪笑 .... 今晚o係呢度都有我哋最喜歡嘅日本嘢食，係呢度心水之選、又係老闆要求高平日唔畀外賣嘅嘢，等咗半年嘞，雋ma終於可以再度品嚐 .... 就係好好味鹽燒鯖魚 & 蟹籽沙律，另外仲有好大舊又好味嘅太卷、腐皮sushi、赤貝刺生 & 燒豬肋骨，o係 "稻菊"唔知幾多份之一價錢先可以食返咁多嘢，但呢度嘅食物一樣好味，又有親切嘅服務，所以一樣咁鐘意 ....

小朋友真係好叻ga，我哋2315返到屋企，雋雋又反轉咗，雋婆反番轉佢，發現唔係我哋把聲即刻醒咗大喊 .... mmmm 呢個仔宜家雋ma一行開耐d走喊，真係要多d train 吓佢先得 ...

雋雋滿6個月la ....

真係時光飛逝，就係咁 ... 雋ma就生咗雋雋出嚟6個月，可能日日自己湊住佢　而且每日都好似成身散晒咁，所以都唔覺得d時間過咗好耐 ...

雋雋 ... baba mama祝您半歲生日快樂，希望您每日繼續健康成長，將來又愛主、敬畏主。你出世之後嘅第一年對您同baba mama嚟講都係重要嘅一年，有好多辛苦同意想不到嘅事發生..... 不過都有好多前所未有嘅開心經歷，第一年嘅日子餘下一半，我哋要一齊努力同畀心機，然後再迎接您更精彩嘅第2、3、4、5、6 ................. N年!!!!!!

都話雋雋個鼻同mama一樣啦，一定唔會走失!!

半歲大終於第一次登上自己嘅專用龍椅 SLEX Chair，一切都好似好新奇 .... 其實之前baba mama都成日攞嚟坐，今日終於物歸原主 ... SLEX可以由6m坐到佢成年，真係好抵!!

雋雋的第一次 -- 出牙篇

Wow Wow Wow ... 716 雋雋先滿6個月大，估唔到佢已經出緊第一隻牙仔嘞。近兩個星期雋雋食手指簡直係食到進入瘋狂狀態 ... 會係一邊飲奶食糊仔、"pa" o係度學爬、瞓覺，而o個兩隻左手指都係要放入口，又係要做和平手勢囉，唔畀佢食又會大喊發晒忟憎 .... 都估佢係發牙痕，加上呢個月齡又係會鐘意吸啜手指，所以都由得佢 .... 不過，雋ma真係好懷疑雋雋第日可唔可以戒得到食呢兩隻手指呢??? 一直堅持唔俾佢用奶咀，因為怕佢出牙出得唔好，宜家食手指食得咁犀利，唔知又會唔會影響d牙仔呢???

好忟憎，隻手成日亂咁"wear"，攪到塊面成日有刀疤咁，今晚最新傑作係 ....

變咗咸蛋超人咁 ... 咸蛋雋 ah .... 好得冇損冇流血ja，隔咗一陣就冇事，咁經典嘅樣，緊係要影低佢啦 ....

有d唔慣，雋雋好似大得好快，又大大隻啦，宜家仲開始出埋牙仔 ... 好矛盾，應該見到佢快高長大、又健健康康係好開心，但一諗起好快再見唔到d BB獨有、冇牙又天真爛漫嘅笑容，mmm 又好唔捨得 ....

其實以後嘅日子會有更多嘢唔捨得，因為 ... 孩子會長大 ... 而且大得好快好快，在地上 ... 我哋名義上係父母，不過o係天父嘅角度我哋係一個管家，因為每個人都係屬於神，只係神將孩子托付畀每對父母，要我哋好好照顧、管教同埋愛護孩子，而唔係擁有佢哋，將來每對父母都係要同神交賬ga ... 所以父母唔單上要做得好，而且要學會放手，再唔捨得都要學識呢個功課 ....

雋ma可能知道呢一點，所以先會有咁多唔捨得 ... 由BB離開我個肚之前幾個鐘已經有呢種感覺嘞 .... 好攞命。不過已經成日同自己洗腦，叫自己放鬆開懷d，如果可以、心情又唔係太差都係多返一d marriage time，等自己放手多d、雋雋亦都可以學會堅強獨立同勇敢一d ....

雋雋的第一次 -- 下水篇

炎炎夏日，雋ma本來諗住等雋雋下星期三715滿6個月大就帶佢去學游水，不過自從H1N1肆虐　baba mama都唔係好敢帶佢去d多人嘅地方，playgroup、學游水等都心大心細，加上雋ma好似超過10年冇游水(對上又係最近一次都係honeymoon去Cairns潛水，嚇到半條人命，緊係啦，一係唔游，一嚟就潛水，唔驚都對我唔住啦 .... )，有見及此、又想試吓雋雋嘅反應，雋ma今日好唔環保咁開咗一大缸暖水畀雋雋玩吓船仔 ....

一落水後好驚，o係個水泡船仔度又震震吓又喊，仲一邊喊一邊咬住個軚，mama都嚟唔影低佢呀 .... 睇佢揸實拳頭幾緊張!!! 除咗o係mama個肚內畀羊水浸住，佢咁大個仔都未試過o係咁多水度，又係第一次o係浴缸ja ....

開始適應放鬆晒 ....

後來仲偷笑，又自己扶住浴缸邊 .... 唔知幾時可以真係帶雋雋你去游水呢??

*************************************************

近來雋ma懶之外，成個人真係好攰好攰好攰，因為雋雋又長咗大隻咗，極之重手，湊佢湊到手軟，而且心情唔太好，所以都冇乜上網，所以儲埋d相一次過順便update埋佢 (宜家都唔想upload d 相上Facebook，實在太慢 ... 特別係450D影嘅相就超超超超慢，次次等到雋ma想打爆部電腦呀 ..... )

宜家好多時畀雋雋自己坐o係Bumbo baby sitter度，佢又好鐘意、坐得好開心 ... 佢個頭仔同頸仔已經叻咗好多，抬起頭都比較穩定 ....

mama好鐘意呢張 !!!!!!!!!!!!

仲成日o係床爬，又爬前咗好多 .....

又唔同咗樣???

隻腳又大咗，花子姨姨o係日本買嘅BB adidas sport shoes已經啱著，型!!!!!!!

沖涼特別開心，爽呀 ....

之前雋雋一直唔鐘意用奶樽，大家見到以下圖片千祈唔需要覺得奇怪，係真嘅，係佢自己攞住個奶樽，冇錯，雋雋畀我哋重新train佢用返奶樽，每日一餐用Medela奶樽飲人奶，開始時有喊喊喊喊喊，慢慢適應咗，到近來佢發牙痕得好緊要，乜都放落口咬，手指更甚，所以一畀奶樽佢就會出晒力咁咬奶咀，咁雋ma又順便入d水畀佢飲，雋雋好乖，佢同雋ma一樣鐘意飲水，雖未至mama飲得咁癲，不過佢只係一個BB，佢肯飲我已經好開心、亦都放下心頭大石 ....

愛上食手指，仲係食到變和平手勢 ... 定係Beyond Fans??? 總之食到好激動 ...

唔畀佢食就會 .... 及晒忟憎又喊 ...

一直好多朋友都話雋雋個頭型靚，生d頭髮又有娛有路。不過繼佢19日大時兩條眼眉脫落咗好多，換咗毛又生返好靚之後，佢個頭又換毛wor，3-4個月開始脫落咗好多，近來已經生返好多出嚟，希望愈來愈多啦 ... 不過baba mama至愛係佢髮尾好似以前興嘅鴨尾頭咁，係自然生成咁ga，好得意!!!

日頭清楚見到中間係禿禿哋，見好多BB都係咁，d人話佢哋頭痕成日o係度擰來擰去，攪到呢個位脫髮 ....

呢幾日雋雋條小肥豬碰生咗少少汗疹，希望佢快d好返 ... 初時以庶買支Chicco爽生液試吓得唔得，點知仲衰多幾成，唔用之後仲好返好多，所以都係用清水加勤力幫佢吸乾汗水係最work!!! 不過太熱，睇怕呢d汗疹都會纏繞雋雋一排嘞 ... 希望你快d好返又唔會痕啦 ...

另外繼米糊後，雋雋又開始食蘋果茸同埋紅蘿蔔茸，不過食蘋果茸之後有兩日只得一次poo poo，佢平日有成2-4次不等ga ma，見佢好忟又好辛苦咁，初時幾擔心，好得祈禱後都有返一次，thx God!!! 所以聽日開始都係食梨、唔好再食蘋果茸住嘞 ... 雖然雋雋食得好慢，亦只係1 -2 tsp.，不過都係畀佢學習jeh，希望佢繼續努力、同埋唔好一邊食一邊又食手指啦 ....