心晴集

2010年3月29日星期一

多謝 ......

今日雋ba畀平時晏咗返 (通常星期一都可以早返嚟一齊食lunch ...)，佢順道帶咗呢d嘢返嚟 ...

係雋ma最愛的白色馬蹄蘭，而且是來自以色列 (原來會襟擺d又唔嘢蚊 ...)，令束花好似更加有意思 .... 仲另加一大袋天寶閣點心，雋ma心頭好，好好好好好好好好味 .... 非常之咁驚喜又多謝囉 ....

唔知為乜ga，可能今日又係雋雋一歲0兩個月大，慶祝吓 .... 又可能係平時畀人激得多，補償吓 .... 又可能見雋ma攰又成日冇乜心機、加上都有一段時間冇收吓花 (上一次係生雋雋之後o係醫院收到 ....)，"tum"吓雋ma開心 .... etc. ，呢個要畀$$o個位先知嘞 ....haha ....

例牌菜，又係返Raymond度訂花，即係Sheraton 嘅Liberty Florist，佢d花好靚ga，係好姊妹Wendy嘅朋友，當年結婚所有雋ma花球、頭花、花女花環、教堂祭壇花 .... 基本上所有花飾都係佢提供，兩個MUAs同好多朋友都話顏色靚又新鮮，仲有教堂同酒店房嘅花都係佢送，而且佢係酒店指定佈置花店，所以每張枱都係有佢嘅花飾，托Wendy鴻福，當年酒店枱唔可以改嘅花都因為咁改咗畀雋ma，而且有Raymond同酒店d熟人搭搭路，又攞到好多平d又多d嘅offers，所以好多謝佢，而之後每逢雋ma生日/ 周年紀念嘅花都只會o係度訂，因為知道雋ma鐘意乜嘢花 .....

今次冇藍鬱金香，係Raymond專登幫雋ba染色嘅，不過雋ma最愛都係白色馬蹄蘭，有佢就得嘞 ....

不過 .... 都收咗咁多年咁嘅pattern，我諗Raymond都包到上腦，其實，雋ma又唔介意轉吓其他pattern或者其他花種嘅 .... hahaha

但係，雋ma都好開心同好多謝您，Thank you!!!

2010年3月24日星期三

屋企要安全 ....

自從活潑好動兼多嘢講嘅雋雋開始識自己行、又會o係梳化同床擒上擒落、仲有係爬得好快之後，雋ma其實每日都忙於追住雋雋、又要由危險嘅地方捉返佢返安全嘅地方 .... 好攰呀 ... 又好驚呀 ....

防撞賿、Door Stopper、防開櫃桶/櫃門嘅膠扣、廚房door gate .... etc.古靈精怪樣樣有，癡到成屋都係，Eva幫雋氏整嘅靚靚兼簡約design一早蕩然無存 .... 不過都冇辦法啦，阿囝安全至上嗎 ....

前日又要多一樣，Door Shield .... 又係Ourbaby Uncle Joe嘅好介紹，其實雋ma都想買呢類產品，因為雋雋成日走來走去又會用手扶住d門"na"度行，次次都好驚佢夾爆手指 .... 有留意市面產品，不過唔係好合心意，今次見到Joe鋪頭嘅實物，覺得好okay，所以一試 .....

聽啤太講原來早幾年樂基都開始用佢，就係因為佢有學生夾斷咗手指 .... yi ya .... 好驚!!!

不過雋bama真係第一次見，同埋知道原來唔係好多地方有得賣，亦都主要係d幼稚園用囉 .... 不過阿Joe話d客用咗反應幾好，佢一向老實又幫襯開佢哋買嘢，只有買好嘢冇試過衰嘢，咁今次都信多佢一次啦 ....

當然 ...呢d粗重手作仔嘢 ... 又係由雋ma操刀啦 ....

效果 .... 好好好 okay!!! 而且裝完之後塊門盾有回彈力，所以度門唔會再咁易畀雋雋閂埋 .... 而且冇日本出o個d風琴式門盾咁厚咁大舊，真係幾好 .... 宜家雋bama安心晒，因為好安全，雋雋嘅手指仔再唔會夾到入門"na"度嘞 .... 最緊要係第時拆得到又可以用得返，非常好!!!

嚟緊仲有一樣，就係裝窗花，係唔想，不過好清楚知道要做，不過又未就到時間揾人上嚟裝 .... 希望下星期內可以攪掂埋佢，咁就會更加安心嘞 ....

隨文附送雋雋短片一段，睇吓佢自己用新飲管奶樽飲奶 (係奶粉開嘅奶，真係難得一見 .... hahaha ...)，仲有聽吓佢講嘅一兩個英文字啦 .... :D

2010年3月23日星期二

Potty Training??????

之前試過，不過佢未識坐穩+坐定定O係POTTY度，都唔知POTTY 係咁用，仲以為雋MA同佢玩.....

近一個星期開始，雋雋差唔多每次WEE WEE完都會指住自己條尿片、然後望住雋BA雋MA講"WEE WEE"，初時冇為意，以為佢學雋MA講，因為每日花洒浴前習慣除咗條尿片叫佢WEE WEE嗎.... 後來發現好多時尿濕指示都有變色，加上佢POO POO都幾定時，咁又令雋BA MA想同佢開始POTTY TRAINING嘞 ....

唯一有D煩係POO POO，雋雋好興食食吓就POO，都唔知點攪，食緊嘢，雋MA搬佢去POTTY度又要除片.... 攪得嚟都趕唔切啦，唔通坐o係potty度食咩 ....

宜家戒片... 言之過早，不過，同尿片講BYE BYE嘅日子似乎又唔會太遠嘞 .... 希望你自然嘅情況下學得會又做得好，唔會覺得唔開心唔舒服，咁雋BAMA嘅苛包仔又可以慳一大筆嘞 ....

(唔講唔知，雋雋宜家每日平均都用成6-8條尿片GA，因為佢飲得水多，加上平均有2-3次POO POO，所以同小小小時候好多人奶POO POO時候一樣都係每日消滅好多條片，小數怕長計.... 都真係好襟計GA .....)

2010年3月20日星期六

7年0 ... 8個月紀念日 ....

0316 .... Brain .... 從來冇人教過或者提及過嘅字，今日呢日雋雋自己攞起呢張拼圖卡，竟然自己讀出Brain .... 有時有R音，有時冇 ....不過 ... 雋BAMA已經覺得好驚又喜又神奇....

佢 .... 咁快自己識併音?? 雖然YBCR & YCCR 都有教，但唔係快到咁呀?? 定係雋MA懷孕期食嘅高劑量DHA產生功效??? HAHAHA ... 乜都唔係，係有神助!!! WAH HAHA ....

仲有好多好多冇諗佢記得或者留意過雋BAMA講嘅未都記得，識指住嚟講，問佢又識指返出嚟/做到嘅新字，Door Gate / Table / Chair / Play / Tree / Shoes / Kick / Box / Couch / Pillow / Bread / Comb / Stove / Cut / Pen / Heart / Hair / Wall / Ice-cream .... etc., 仲有係教佢認交通燈邊D顏色要停車開車都知道嘞，所以真係唔可以睇少小朋友嘅潛能，3歲前...果真可以嚇死人，雋MA已經考慮灌D MUSIC THEORY畀佢嘆吓，而雋BA ... 緊係負責教人體的奧秘啦....HAHAHA ....

重點，自己湊、自己教、寓生活於教學，乜嘢有趣都教吓講吓，咁就開心又快好多好多啦.....

0318，" kok ... 知 ... um"，雋雋第一次跟著雋媽說出自己個名 .... 個雋未，有時讀"UM"、有時讀"CUM"、有時都會讀"專"，笑死雋BAMA呀 ....

0319，還嘢畀Auntie Wendy，拖人好耐嘞，真唔好意思，多謝您幫雋氏慳返咁多$$$，MANY THX!!!!!!!!!

小聚片刻影D相....

之後返去MA Cafe 食飯，順便畀雋雋第一次現場睇"維港亂咁Fing" ....

2010年3月14日星期日

0314@HK Disneyland + SkyCity Marriott

今日又去老鼠籠玩.... 攪完一大輪，去到又係差唔多到PARADE時間，超多人.... 係本身今日已經唔知做乜咁多人，周圍都有條"龍"，玩嘅意欲大減，同埋以雋雋成日眼瞓又唔可以定係一個地方太耐嘅脾性，根本唔可以吓吓要等45MINS + 先有得玩.... 咁 .... 不如唔玩....

第一站，去廣場餐廳飲茶，即係又係美心啦，係冇趣冇新意亦都唔多好食得去邊，不過好過成日都食快餐啦.... 冇嘢好食、都叫有啖好食，因為好坐D嗎....

食完換埋片，GO GO GO .... 第一個遊戲，旋轉木馬 .... 係雋雋第一次玩... 係自己坐上隻馬仔度玩喎 .... 好新奇，周圍望.... 但雋MA就受傷，應該係上馬時撞親腳踏，初時都唔知乜事，一邊玩邊痛到入心入肺，返到屋企先見到左小腿瘀到成個檸檬咁大撻呀 .... 作死!!!

第二個，想睇獅子會至慶典，今日唔開、連想帶雋雋坐佢喜歡嘅TRAIN都唔開，又作死!!!

第三個，Golden Mickey，剛關門，又超多人，姐姐們見雋雋咁得意都愛莫能助，只有送上貼紙慰藉 ....

第四個，去小小細世界，先影相....

雋少第一次O係迪迪尼WALK ..... 要影低留念...

又畀人影到blur咗 .... 呢張叫好d嘞 .... 不過今日同雋雋著子母裝 (blink blink VS 毛臣臣紅心)，點都要放一張上嚟 ... hoho

雋MA出手 .... 係會好好多... kakaka ....

唔好笑得咁開心，係冇得玩AGAIN!!! 作死AGAIN!!!!!! 知嗎，今日條"龍"去到頂，即係起碼等成粒鐘+先有得玩，唔好玩雋氏啦，咁 ...只有走人....

第五個，去玩雋雋最愛的CAR!!! 要度高，差1cm都唔知有冇 ... 不過哥哥話有高度限制，差d ... d都唔畀玩喎 ... 咁唯有同雋雋最愛嘅車影張相留念啦 .... 作死again again & again!!!!

囝，下次，一定會玩到 ...因為你不停標高，應該OKAY HAHA ....

第六站，BUZZ LIGHT YEAR，等得最短時間，因為飛船郁得快嗎HAHA ...不過宜家次次抱住雋雋、雋MA都冇乜得點玩....

最後玩埋佢喜愛嘅pooh就要走，攞咗fast pass都等咗30mins.呀，仲要前所未有多人到要同唔識嘅人坐埋同一條船..... 冇趣again!!!

古靈精怪.... 但好鐘意....

巧乖咁樣喎 .... (背後係 ... 扭眼瞓同唔肯飲奶 ... 當然係奶粉開嘅奶啦 ....)

頂頭kiss....

下一站 .... 東涌 .... 準確D，係赤立角，亞洲博覽館對面....

Dinner Buffet @ SkyCity Marriott Hong Kong ..... 見d人成日話要一個月前訂枱，今晚去之前10mins.叫AE 幫手訂枱，一訂即有，仲係好舒服大梳化位，雋雋玩到反轉都冇問題喎 .... 嚟嘅目的又係想佢可以近D 睇 Ship & Airplane，寓食飯於教學嗎!!!! 點知....

有人O係樂園唔肯瞓，上車即瞓，瞓到天都黑埋先醒.... 睇黑影就有....

出街四寶，大水壺、餅盒，仲有未入鏡嘅一大袋玩具 + DVD player

其實本想去迪迪尼酒店翠樂庭食嘅，唔知做乜又FULLLY BOOKED，今日認真冇運行，所以先轉戰呢度.... 以庶呢度冇，最後又有，咁就將就將就啦 .... 有啖好食係緊要過有嘢好食.... 係對於有小朋友嘅人嚟講.... HAHAHA ....

出奇地冷盤okay，仲有生蠔供應，熱盤就 ... 少咗d，甜品 ... 好想食 ... 特別係好多雪糕揀，不過有人醒咗，大少有行動暗示父母要快D走 ....冇得食.... *0*

呢餐仲有75折，都算好OKAY嘞 ....

雖然多阻滯 ... 不過今日整體都係開心嘅!!!

2010年3月12日星期五

雋雋の第一次- 落地篇

雋雋第一次o係商場落地行 + 今早自己由梳化安全降落地面 .... :P

2010年3月5日星期五

立立雜 as @ 10032010

其實已經係前一排嘅事，就係去BLT食burger，係就真係幾好食，價錢亦都好好睇，不過好唔baby- friendly，有兩個senior一d嘅男人唔係幾好禮貌,反而其他staffs好好，又成日過嚟同雋雋玩，決定係，冇乜嘢都唔想再去食，或者等到雋雋大個多幾年，可能先再帶佢嚟試呢類垃圾食品，囝 ... 多食冇益呀! 仲係一食就返唔到轉頭ga la!!

唯一攪笑係雋雋o係度聽到d好重節奏嘅音樂又不停"un un"吓同傻笑，攪到奶都唔肯飲 ... 有片為証....

呢兩日又好凍嘞，都唔知攪乜立咗春都突然咁凍，好得d冬天衫之前未有時間收爐ja，加上四川、印尼、日本、智利 ... 嘩周圍都天災人禍，呢個地球好病呀，人同神嘅距離真係愈來愈近咁 ....

雋雋10個月大開始就唔肯畀人幫佢戴帽，雋ma之前都講過，對於咁喜歡戴帽、不過自己已經好少戴、又轉移買畀雋雋戴嘅雋ma嚟講，真係好無奈 .... 今日咁凍，又試一次，奇蹟地冇反抗，好睇之餘又可以保暖，得物有所用，高興!! 所以等lift時要影低佢，好驚佢第二日又唔肯同雋ma戴嗎 .....

雋雋近幾個星期唔多願飲奶 .... 準確d，係唔多願飲奶粉開嘅奶。即時回想起佢得幾個月時飲開母乳就好抗拒用奶樽飲奶 .... 係所有嘅奶喎，都明嘅，呢個都係好多飲開母乳BB嘅通病，最後得Maggie姊妹介紹用Medela奶樽先解決咗，因為佢個奶咀最柔軟、同其他牌子好唔同，飲到宜家雋雋都鐘意用，起碼鐘意佢多過BFreePlus / Avent。

不過用時用，有時補少少 / 出街要餵奶粉開嘅奶畀佢，都飲到誓願咁，肚餓好間唔時會飲晒，唔係一般都係20、50、60ml咁，80ml都好少出現，飲到都好好，係比同齡飲得少囉，不過佢生得夠大隻又長肉 (不過呢個星期條腰幼咗，但一樣咁重手 ....)，而且有兩餐都食稠粥，所以都okay啦 ....

不過都要做d 嘢，見佢抗拒奶樽，所以決定揾d更好又係用吸管嘅奶樽 ... 因為雋雋好似鐘意用飲管飲嘢多d，終於畀雋ma揾到，就係呢隻日本仔品牌，最新呢個型號係 BPA free，又襟跌又可以steam又用吸管又係有刻度，仲係有200/260/320ml咁多隻容量，有手柄、樽身流線形方便小朋友自己渣住，連支管爛都有得再配，非常好，試買一個，好似okay，琴日又買多個 ....

可能有人問好多飲水杯都係有吸管，駛乜咁買，不過好多都唔可以steam、又唔係BPA free，之前聽林小慧講，其實Combi d杯都唔可以steam，不過好多人都咁做 (其實除咗奶樽外，根本BB到10個月大度d食具同杯都唔駛steam 嘞，太乾淨 is sometimes no good for babies!!! 奶樽要steam係因為d奶嘅成份好複雜同易滋生細菌ja ma .....)，所以，以雋雋要飲奶嘅容量又要有晒其他好奶樽嘅規格、而係用飲管嘅，市面上真係唔多囉 ....

希望雋雋之後可以飲得開心 d啦 ... 仲有，咁快可以戒到用奶樽嘅都係好事，成事嘅話，下一步就係potty training嘞 ....

旨雋又有新字發表，佢係發音唔完全 ... 特別係d R, F, S，未發到，同埋好鐘意得一頭一尾音，不過好開心佢係指住O個樣物件嚟講 / 做埋動作配合，所以相信佢應該係理解到佢自己發到音嘅字係乜意思 ....

gape = Grape (自己攞起抽膠提子講...)
笨 = Banana
pet = Pepper
ki = Kiss
哥 = Straw
jac = Jacket
不 = Seat Belt 個belt :P
啤 = Bellybutton
奸 ... 有n音 = Down (手指指向下 ....) ... 識手指指向上，不過發唔到up音，hahaha ....
家 = Scarf
hard = Hot (加潑吓潑吓手勢，好明顯又學雋ma ....)
moon = Moon 最準呢個 ...
card = Card 似講緊中文"卡"音 ...
ga's = glasses
bay = 畀 (成日叫雋雋畀嘢雋bama或者其他人，要佢學sharing吖嗎 .... 宜家又學人講畀，畀咗d嘢人又好開心笑，有時仲玩玩吓捉住你對人畀d嘢你，笑屎人啦 ....)