原來 ......

幸福? 唔知呢? 每個人標準唔同，又或者旁人睇同局內人自己經歷又係天與地兩回事 ....實在太多可能性嘞 ...

好唔鐘意明明覺得有d人唔好，但旁邊每個人都讚佢好 ... 係好主觀，她自己先係受眾，當然自己感覺經歷行先啦，係真係覺得唔好就係唔好ga 。好多人一直都唔理解，以為她是身在福中不知福咁，有苦又幾多個人同明白呢? 幸福嘅人、又或者一生冇乜大上大落、又家庭完整嘅人係永遠都唔明呢種人，可能有人會覺得怪，其實一d都唔怪，只係旁人見得少、經歷得少....

唔開心經歷同記憶係唔會被時間洗去，因為係發生過、係事實，有時亦唔需要刻意抹走去，抹走咗，就唔再係自己人生一部份，呢部份係可以提醒自己好多好多口嘢ga ... 天父有時都係要人經歷好多唔同又特別嘅事，為嘅係要人去更認定神、認識自己、又令人更堅強。不過通常又會有兩種結果，好嘅係更堅強更堅定，相反係變成咒詛、行咗去另一個方向囉。

每次事件都會有不同結果，有d係令人堅強咗，有d別人以為冇乜重要性又唔特別起眼嘅事就 ....唔駛多講啦。其實事情嘅開始同終結都真係好人為，到最後個結果係唔好，有時好可能係當日有d人處理得唔好，識同唔識處理、要黑/白/或要做別人討厭嘅牆頭草常站於灰色地帶而令人生厭 .... mmmm ....其實種種，都唔係自己可以控制得到 .... 因為係別人自己選擇，不過唔好事後成日講後悔囉 ...

有多一樣令自己開心嘅人或事出現，亦都唔等於可以洗刷以往嘅一切 ....因為一個人並唔等於另一個人 ... 有個傷口就係有，唔會貼塊膠布遮一遮就同自己講個傷口冇咗 .... 仲要有一種人好鐘意係人哋傷口洒吓鹽，咁又有冇可能好返或者冇疤痕呢???

輔導也好、臨床心理學家也好，佢哋成日提醒人，唔好叫唔開心嘅人「你唔好唔開心啦」、唔好叫滿眼眶眼淚嘅人「你唔好喊啦」、「你諗多d開心嘢啦」、去喪禮唔好同人哋家屬講「節哀順變啦」 ...etc.，呢d所有所有，其實無補於事，理智上係知道出於好意同關心，不過，情感上對人哋係一種傷害同壓抑。

傷心嘅人想喊，你叫佢喊出嚟啦，唔開心嘅人想講說話想抒發，係好朋友嘅就畀佢講同發洩啦，已經諗唔起開心事嘅人就唔好再迫佢諗開心事啦、諗到又有幫助就唔會唔開心啦 .... 其實種種都只不過係聖經所講 --「與哀哭的人同哭」嘅道理，冇錯，受傷的人、難過的人，就只係需要呢種最簡單嘅對待，陪佢哭、陪佢笑、好想有人同行，好朋友也好、家人也好、弟兄姊妹也好，唔係最簡單就係咁嗎?? 愛同關心就係咁簡單囉。唔需要多說話、多教訓、多道理，有對聆聽嘅耳朵、有個真心、有雙可以隨時相借一用嘅膊頭、有對溫暖嘅手 .... 好多受傷嘅人就係咁諗ja ma ....

又有幾多人真正明白呢??